Հինգշաբթի, 22 Մարտի 2018 11:24

Արմինֆո. Վաշինգտոնում՝ ԱՄՆ Առևտրային ներկայացուցչի գրասենյակում, տեղի է ունեցել Հայ-ամերիկյան առևտրի ու ներդրումների խորհրդի նիստը, որին հայկական պատվիրակության կազմում մասնակցել է արտաքին գործերի նախարարի տեղակալ Ռոբերտ Հարությունյանը: Հայ-ամերիկյան առևտրի ու ներդրումների խորհրդի հիմնադրումից ի վեր (2015թ.) կողմերի միջև սա երկրորդ հանդիպումն էր:

Ինչպես ԱրմԻնֆո-ին հաղորդեցին ԱԳՆ մամուլի ծառայությունից, հայկական պատվիրակությունը ղեկավարում էր ՀՀ տնտեսական զարգացման նախարարի տեղակալ Հովհաննես Ազիզյանը, պատվիրակության կազմում ներգրավված էին նաև բարձրաստիճան պաշտոնյաներ Աշխատանքի ու սոցիալական հարցերի, Տնտեսական զարգացման և ներդրումների նախարարություններից, Սննդամթերքի անվտանգության ծառայությունից և Պետական եկամուտների կոմիտեից:

Ամերիկյան պատվիրակությունը ղեկավարում էր ԱՄՆ Առևտրային ներկայացուցչի տեղակալ Դանիել Մուլանին: Ամերիկյան կողմից նիստին ներկա էին ԱՄՆ Պետքարտուղարության, Գյուղատնտեսության, Աշխատանքի ու Առևտրի դեպարտամենտների, ԱՄՆ մաքսային և սահմանային պաշտպանության ծառայության, Սննդամթերքի ու դեղորայքի տեսչության ու ԱՄՆ միջազգային զարգացման գործակալության ներկայացուցիչներ:

Առևտրի ու ներդրումների խորհրդի նիստի շրջանակներում տեղի է ունեցել նաև կլոր սեղան-քննարկում մասնավոր ընկերությունների ներկայացուցիչների հետ: Նիստի ավարտին խորհուրդն ամփոփել է ԱՄՆ-Հայաստան առևտրային օրակարգը ու հստակեցրել հետագա քննարկումների ու խորհրդակցությունների ոլորտները:

Մարտի 20-ին ՀՀ պատվիրակությանը` ԱԳ նախարարի տեղակալ Ռոբերտ Հարությունյանի և Տնտեսական զարգացման նախարարի տեղակալ Հովհաննես Ազիզյանի գլխավորությամբ, հյուրընկալել է Տնտեսական և առևտրային հարցերով ԱՄՆ պետքարտուղարի տեղակալ Մանիշա Սինգը: Հանդիպմանը մասնակցել են նաև ԱՄՆ պետքարտուղարի առաջին փոխտեղակալ Բրայան ՄըքՖիթերսը ու ԱՄՆ-ում ՀՀ դեսպան Գրիգոր Հովհաննիսյանը: Երկու կողմերը գոհունակությամբ արձանագրել են, որ առկա է առևտրի ու ներդրումների ներկա ծավալներն ընդլայնելու երկուստեք պատրաստակամություն:

Հանդիպման ընթացքում անդրադարձ է կատարվել Առևտրի ու ներդրումների խորհրդի նիստի արդյունքներին և երկկողմ տնտեսական համագործակցության այնպիսի առաջնային ուղղություններին, ինչպիսին են տեղեկատվական տեխնոլոգիաները, վերականգնվող էներգիան և գինեգործությունը:

Հիշեցնենք, որ Հայաստանի և ԱՄՆ միջև առևտրի և ներդրումների շրջանակային համաձայնագիրն ստորագրվեկլ է 2015 թվականի մայիսին Վաշինգտոնում: Ըստ փաստաթղթի, Հայաստանը և Միացյալ Նահանգները հավաստում են իրենց մտադրությունը՝ ստեղծելու բարենպաստ պայմաններ ներդրումների և երկու երկրների միջև ապրանքաշրջանառության, առևտրի խրախուսման համար։ Նախատեսվում է ձևավորել Առևտրի և ներդրումների հայ-ամերիկյան խորհուրդ, որի հանդիպումներն անց են կացվելու առնվազն տարին մեկ անգամ։ Խորհուրդը կոչված է՝ բացահայտելու երկկողմ ներդրումների և առևտրի նոր ոլորտներ և աշխատանքներ տանելու դրանց զարգացման ու այդ ճանապարհին հնարավոր խոչընդոտների վերացման ուղղությամբ։

ՀՀ ազգային վիճակագրական ծառայության տվյալներով, 2017 թվականին Հայաստանի և ԱՄՆ միջև առևտրի շրջանառությունը կազմել է 204.8 մլն դոլար` 68,2% տարեկան աճով: Մասնավորապես, արտահանումն ավելացել է 76,5%-ով` մինչև 68.5 մլն դոլար, իսկ ներմուծումը` 64,3%-ով, մինչև 136.3 մլն դոլար: