Հինգշաբթի, 25 Հոկտեմբերի 2018 12:22

Արմինֆո. Հայաստանի նոր կառավարության որդեգրած քաղաքականությունը միտված է Չինաստանի Ժողովրդական Հանրապետության հետ հարաբերությունների առավել խորացմանը և արդյունավետության բարձրացմանը: Այդ մասին հայտարարել է ՀՀ փոխվարչապետի պաշտոնակատար Տիգրան Ավինյանը` նախօրեին Չինաստանի առևտրա-արդյունաբերական բանկի (ICBC) Ծիանսու նահանգի մասնաճյուղի նախագահ Յան Ջիհանի գլխավորած չինացի գործարարների պատվիրակության հետ հանդիպման ժամանակ։

 

Ինչպես ԱրմԻնֆո-ին հաղորդեցին կառավարության տեղեկատվության և հասարակայնության հետ կապերի վարչությունից, հանդիպման ընթացքում Տիգրան Ավինյանը նշել է, որ Հայաստանի կառավարությունը մեծ նշանակություն է տալիս չինական կապիտալի ներգրավմանը տնտեսության մեջ, ինչպես նաև երկկողմ առևտրաշրջանառության  ծավալների մեծացմանը, և հետաքրքրված է գործարարների հետ քննարկելու փոխշահավետ ծրագրերի իրականացումը։ Փոխվարչապետի խոսքով, ներկայումս մի շարք գործընթացներ են ընթանում հայ-չինական հարաբերություններն առաջ մղելու ուղղությամբ, մասնավորապես քննարկվում են մուտքի արտոնագրերի ռեժիմի ազատականացման և ուղիղ ավիաչվերթի բացման հարցերը:

 

Յան Ջիհանը շնորհակալություն հայտնելով ընդունելության համար՝ նշեց, որ իրենց բանկը ակտիվներով գրավելով առաջին տեղը աշխարհում, շուրջ 70 մլրդ ԱՄՆ դոլար ծավալ ունեցող ֆոնդ է առանձնացրել Գոտի և ճանապարհ նախաձեռնության տարածքում գտնվող պետություններում ներդրումներ կատարելու համար, որը կբերի ներգրավված պետությունների փոխադարձ զարգացմանը և աճին:

 

Հանդիպման ընթացքում քննարկումներ տեղի ունեցան տեղեկատվական տեխնոլոգիաների, արդյունաբերության, գյուղատնտեսության և ենթակառուցվածքների ոլորտներում չինական ներդրումների ներգրավվման հնարավորությունների մասին: Այս առումով փոխվարչապետի պաշտոնակատարը զրուցակիցների ուշադրությունը հրավիրեց Հյուսիս-Հարավ մայրուղու վրա, որի կառուցումը լիովին տեղավորվում է Գոտի և ճանապարհ չինական նախաձեռնության տրամաբանության մեջ և նոր հնարավորություններ ստեղծում տարբեր տարածաշրջանները իրար կապելու համար:

Անդրադառնալով հանքաարդյունաբերությանը՝ չինական կողմը նշեց, որ իրենց երկիրը մտահոգ լինելով բնապահպանական խնդիրներով, մեծ առաջընթաց է գրանցել պատասխանատու հանքաարդյունաբերության զարգացման ուղղությամբ և ստեղծել առավել ժամանակակից, մաքուր տեխնոլոգիաներ այս ոլորտում: Պատվիրակության անդամները հավելեցին, որ պատրաստ են քննարկել ինչպես հանքարարդյունաբերության ոլորտում ներդրումներ կատարելը, այնպես էլ Հայաստանից հանքաարդյունաբերական արտադրանքի ներմուծման հեռանկարները: Տիգրան Ավինյանը նկատեց, որ Հայաստանը բացասական փորձառություն է ունեցել հանքաարդյունաբերության հարցում, և ցանկանում է այս ոլորտում ստանդարտները առավել բարձր մակարդակի հասցնել, այնպես որ չինական կողմի հավանական ներգրավումը դրական ազդեցություն կարող է ունենալ:

Անդրադառնալով գյուղատնտեսական համագործակցությանը, չինացի գործարարները նաև ասացին, որ արդեն իսկ նախատեսում են տեղի գործընկերների հետ համագործակցելով՝ կտրուկ ավելացնել հայկական գինու արտահանումը Չինաստան:

Վերջում կողմերը պայմանավորվեցին շարունակել քննարկումները՝ առավել հեռանկարային ներդրումային ծրագրերի շուրջ:

 

Հավելենք, որ  Չինաստանի առևտրա-արդյունաբերական բանկի ներկայացուցիչները մասնակցել են հոկտեմբերի 22-24-ը Երևանում ընթացած «Եվրասիական շաբաթ-2018՚ համաժողովին` ՌՀՄ նախագահ Արա Աբրահամյանի հրավերով:  Չինաստանի առևտրա-արդյունաբերական բանկը երկրի խոշորագույն առևտրային բանկն է և ներառված է Չինաստանի խոշորագույն բանկերի «Մեծ քառյակում՚: Այն հիմնադրվել է 1984 թվականին, 2005 թվականին վերափոխվել է սահմանափակ պատասխանատվությամբ բաժնետիրական ընկերության: 2006 թվականի հոկտեմբերի վերջին անցկացրել է բաժնետոմսերի առաջնային տեղաբաշխում և ներգրավել ռեկորդային 22 մլրդ դոլար (խոշորագույն IPO համաշխարհային պատմության մեջ)` տեղաբաշխելով 48,4 մլրդ բաժնետոմս (ընդհանուր թվի 18 %), դրանց 12 %` Հոնկոնգի բորսայում, իսկ 6 %` Շանհայի: 2018 թվականին բանկը վեցերորդ անգամ անընդմեջ  գլխավորում է Global 2000 խոշորագույն հանրային ընկերությունների վարկանշային աղյուսակը, որ ամեն տարի հրապարակում է FORBES-ը `  165,3 մլրդ դոլար շահույթով (18-րդ տեղն աշխարհում), 43,7 մլրդ դոլար զուտ շահույթով (3-րդ տեղ), ակտիվները կազմում են 4210,9 մլրդ դոլար  (1-ին տեղ), կապիտալիզացումը` 311 մլրդ դոլար (14-րդ տեղ):