Երեթշաբթի, 20 Նոյեմբերի 2018 18:45

Արմինֆո. Ապրիլյան հեղափոխությունից հետո Հայաստանում  իշխանության միակ սուվերենը ժողովուրդն է: Նոյեմբերի 20-ին մամուլի ասուլիսում այդպիսի կարծիք է հայտնել վարչապետի պաշտոնակատար Նիկոլ Փաշինյանը:Նրա ասելով, իր քաղաքական թիմը խոստացել էր, որ եթե ժողովուրդը իր կամքն արտահայտի, ապա ինքը կապահովի բացառապես խաղաղ ճանապարհով իշխանափոխություն, ինչը լիովին իրականացվել է: Նոր կառավարությունը խոստացել էր արմատախիլ անել ընտրությունների կեղծման պրակտիկան, ինչը նույնպես արվել է, և դա ցույց տվեցին Երևանի ավագանու ընտրությունները: Ընդ որում, նա խոստովանել է, որ հետհեղափոխական շրջանում չի հաջողվել ընդունել նոր ընտրական օրենսգիրք, սակայն, նրա ասելով, նոր կառավարությունը խոստացել էր արտահերթ խորհրդարանական ընտրությունների անցկացում, այլ ոչ թե նոր ԸՕ ընդունում:

 

Վարչապետի պաշտոնակատարը հիշեցրել է, որ նոր իշխանությունը խոստացել էր անզիջում պայքար ընդդեմ կոռուպցիայի, ինչն սկսվել է և կշարունակվի, եթե կառավարությունն ստանա բնակչության վստահության քվեն առաջիկա տարիների համար: Փաշինյանի ասելով, կառավարությունը կատարել է նաև արհեստական մենաշնորհները վերացնելու խոստումը, ինչի արդյունքում այսօր շուկայում հայտնվել են նոր խաղացողներ` ապահովելով բոլորի հավասարությունն օրենքի առջև, և բիզնեսում այլևս արտոնյալներ չկան: Ընդ որում , վարչապետի պաշտոնակատարը հիշեցրել է, որ սեփականության վերաբաշխում չի եղել: «Արդյունքում` իշխանությունը լիովին վերադարձվել է ժողովրդին, և առաջիկա խորհրդարանական ընտրություններում յուրաքանչյուրի ձայնը որոշիչ է լինելլու՚, - հայտարարել է նա:

 

Անդրադառնալով սոցիալ-տնտեսական քաղաքականության ոլորտին` վարչապետի պաշտոնակատարը հայտարարել է, որ հաշվետու ժամանակահատվածում դիտվել է ներդրումային ակտիվություն: Նրա ասելով, նոր կառարավության խնդիրը այդ հետաքրքրությունը որոշակի գործողությունների փոխակերպելն է: Նիկոլ Փաշինյանը նաև նշել է, որ վերջին ամիսներին ՀՀ քաղաքացիների սոցիալական վիճակի բարելավմանն ուղղված քայլեր են ձեռնարկվել. հուլիսին կուտակային կենսաթոշակային համակարգի բարեփոխումների արդյունքում ավելացվել է ավելի քան 200 հազար քաղաքացու աշխատավարձ: Հարկային  օրենսգրքի  բարեփոխումների շրջանակում աշխատանքը կխրախուսվի, մինչև 20 մլն դրամ տարեկան շրջանառություն ունեցող միկրոձեռնակատիրությունը կազատվի հարկերից, հարկային պարտավորություններից կազատվեն նաև անհատ տաքսիստները, հաշվետու ժամանակահատվածում հարկային վարչարարության բարելավման արդյունքում ստվերից դուրս է բերվել շծուրջ 37 հազար աշխատատեղ: «Ժողովրդի հանդեպ մեր գլխավոր պարտավորությունն այն է, որպեսզի ապագայում պետական մջոցները չյուրացվեն, իսկ բյուջեի հատկացումները ծախսվեն արդյունավետ՚, - նշել է Փաշինյանը:

 

Իսկ իր կառավարության գլխավոր ձախողումը Նիկոլ Փաշինյանը համարել է լեռնարդյունահանման ոլորտի քաղաքականությունը: «Մեր քաղաքականությունը, որն, այնուամենայնիվ, բխում է ազգային շահերից, ստեղծում է որոշակի բացասական ֆոն ներդրումային քաղաքականության համար՚, - հայտարարել է վարչապետի պաշտոնակատարը, համոզմունք հայտնելով, որ այդ ֆոնը շուտով կվերանա: Այդ համատեքստում անդրադառնալով Ամուլսարի նախագծին` Փաշինյանը նշել է, որ միջազգային փորձագետների գնահատմամբ, Ամուլսարի հանքի շուրջ կառավարության կողմից բարձրացվող հարցերն օրինական են: «Մեր հարցը շատ կոնկրետ է. արդյոք կա վտանգ Սևանի և Ջերմուկի ջրերի համար, եթե կա, նշանակում է`  ձեռնարկությունը պետք է փակվի: Եթե չկա, ապա մենք կաջակցենք նախագծի իրագործմանը: Հուսով եմ, որ այս հարցի վերաբերյալ մինչև գարուն կարող ենք կայացնել որոշում` հիմնված փաստերի վրա՚, - ասել է նա:

 

Բացի այդ, ինչպես նշել է Փաշինյանը, շատ անելիք կա «Հյուսիս-Հարավ՚ փոխադրամիջանցքի ներդրումային ծրագրի շրջանակում, որտեղ ճանապարհի ողջ երկայնքով դիտվում են խնդիրներ: Շատ բան պետք է պարզել նաև ՀԿԵ գործունեության առնչությամբ: Ինչ վերաբերում է ֆիզիկական անձանց դրամական փոխանցումների հարկմանը, ապա, ինչպես պարզաբանել է վարչապետի պաշտոնակատարը, այսօր նման օրինագիծ չկա: Ամեն դեպքում, ինչպես հայտարարել է Փաշինյանը, այսուհետև Հայաստանում չի լինելու այնպես, որ կառավարությունը որոշումներ կայացնի` առանց ժողովրդի հետ խորհրդակցելու: «Այժմ Հայաստանում հաստատվել է ժողովրդի ուղիղ իշխանություն, և ցանկացած որոշում, այդ թվում քաղաքացիների հարկային բեռի ավելացման վերաբերյալ, չի կարող կայացվել առանց երկրի բնակչության համապատասխան մանդատի՚, - եզրափակել է Նիկոլ Փաշինյանը: