Չորեքշաբթի, 21 Նոյեմբերի 2018 14:52

Արմինֆո. Ներկայումս քննարկվում է Թեղուտի պղնձամոլիբդենային հանքավայրի շահագործման նոր օպերատորի նշանակման հարցը: Այս մասին նոյեմբերի 21-ին հայտարարել է ՀՀ էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը, պատասխանելով ԱրմԻնֆո-ի հարցին:

 

Ըստ Բաղրամյանի, Թեղուտի հանքավայրի նախագիծը գրավադրված է ՎՏԲ Բանկում:

«Այսօր Թեղուտի ակտիվները դարձել են ՎՏԲ-ի սեփականությունը և ընթացքի մեջ է բանկի կողմից հանքավայրի շահագործման նոր օպերատոր նշանակելու գործընթացը», - ասել է նա, հավելելով, որ ինքը դեռևս տեղյակ չէ թեկնածուների մասին, ովքեր հետաքրքրություն են ցուցաբերել նախագծին:

 

Մեկ շաբաթ առաջ փոխվարչապետ Տիգրան Ավինյանը ՀՀ խորհրդարանում նշեց, որ քննարկվում է Թեղուտի հանքավայրի վերագործարկման նոր օպերատորի ներգրավվման հարցը:

 

Թեղուտի պղնձամոլիբդենային հանքավայրի շահագործման ծրագիրը ՀՀ կառավարության կողմից հաստատվել է 2007 թվականի նոյեմբերին: Իր պաշարներով Թեղուտի հանքավայրը երկրորդն է Հայաստանում, Քաջարանի պղնձի հանքավայրից հետո 1991 թվականին հանքավայրի սահմանված պաշարները կազմել են 450 մլն.տոննա հանքանյութ, այդ թվում` 1.6 մլն.տոննա պղինձ` 0.355% պարունակությամբ և 99 հազ. տոննա մոլիբդեն` 0.022% պարունակությամբ: Ինչպես ավելի վաղ լրագրողներին ասել էր «Վալեքս՚ ընկերությունների խմբի նախագահ Վալերի Մեժլումյանը, պղնձի և մոլիբդենի խտանյութերը կարտահանվեն հիմնականում Եվրոպայի երկրներ: Նա նշել էր, որ Թեղուտի նախագծում ներդրվել են նորագույն տեխնոլոգիաները, ինչպես նաև իրականացվել ենթակառուցվածքային բարեփոխումներ: Ինչ վերաբերվում է բնապահպանական ծրագրերին, ապա այստեղ նշվել է անտառատնկման ծրագիրը, որի համաձայն 375 հա անտառի փոխարեն, որը հանքավայրի մշակման նպատակով պետք է հատվի, կտնկվի 714 հա մակերեսով անտառ: «Թեղուտ՚ ՓԲԸ մեծ ուշադրություն է դարձնում նաև Թեղուտի տարածքում գտնվող պատմա-մշակութային հուշարձանների պահպանմանը:

 

Մինչդեռ 2018 թվականի  հոկտեմբերի 19-ից կասեցվել  Ալավերդու պղնձաձուլական գործարանի աշխատանքները (Ալավերդիում պղնձարտադրությունն իր 250-ամյա պատմության ընթացքում կանգ է առել չորս անգամ): Հիմնական պատճառը բնապահպանական խնդիրներ են, այսինքն՝ ձեռնարկության կողմից ծծմբի երկօքսիդի արտանետումների թույլատրելի նորմերի խախտումները, ինչի հետևանքով ձեռնարկությունը տուգանվել է և վերջինից պահանջվում է մինչև ընթացիկ տարվա դեկտեմբերի 25-ը արտանետումների քանակը նվազեցնել 90%-ով:  

 

Նշենք, որ «Վալլեքս Գրուպ» ՓԲԸ (Vallex Group) հիմնադրվել է 1998 թվականին և միավորում է 20 դուստր և փոխկապակցված ընկերություններ: Դրանց թվում են «Թեղուտ» ՓԲԸ-ն, որն ստեղծվել է 2006 թվականին, բաժնետոմսերի լրիվ փաթեթը պատկանում է կիպրոսյան «Թեղուտ Ինվեսթմենթս Լիմիթիդ» ՓԲԸ-ին, որի քվեարկող բաժնետոմսերի 100 տոկոսը պատկանում է «Արմենիան քոփր Փրոգրամ» ՓԲԸ-ին, որի սեփականատերը Վալերի Մեջլումյանն է, ինչպես նաև` «Բեյզ Մեթըլս» ՓԲԸ-ն, որը շահագործում է Արցախի  Մարտակերտի շրջանում գտնվող Դրմբոնի պղինձ-ոսկու հանքավայրը, «Armenian Copper Programme» ՓԲԸ (ACP), որը շահագործում է Ալավերդու պղնձաձուլման կոմբինատը, որտեղ արտադրվում է սև պղինձ: