Արմինֆո. 2018 թվականին «Տեղեկատվական տեխնոլոգիաների ոլորտում համաշխարհային ավանդի համար» Հայաստանի Հանրապետության պետական մրցանակը շնորհվել է
ամերիկացի ինժեներ, National Instruments ընկերության համահիմնադիր Ջեյմս Թրաչարդին:
Այս մասին նոյեմբերի 23-ին կայացած մամուլի ասուլիսում հայտարարել է Հայաստանի տրանսպորտի և տեղեկատվական
տեխնոլոգիաների նախարարի պաշտոնակատար Հակոբ Արշակյանը:
«Տեղեկատվական տեխնոլոգիաների ոլորտում համաշխարհային ավանդի համար» Հայաստանի Հանրապետության
պետական մրցանակի շնորհումը շատ կարևոր է Հայաստանի հեղինակության բարձրացման առումով ՏՏ
հանրությունում»,-նշել է նախարարի պաշտոնակատարը: Նա վստահեցրել է, որ Հայաստանի կառավարությունը
կշարունակի աջակցել տեղեկատվական տեխնոլոգիաների զարգացմանը: Շնորհավորելով հաղթողին`Ջեյմս
Թրաչարդին, Հակոբ Արշակյանը նշել է, որ տեղեկատվական տեխնոլոգիաների ոլորտը համարվում է Հայաստանի
կառավարության գերակա ոլորտ: «Կառավարությունը ձգտում է զարգացնել տեղեկատվական տեխնոլոգիաներն
այնպիսի բնագավառներում, ինչպիսիք են`աջակցությունն սկսնակ ընկերություններին, կրթության և
հետազոտության աջակցությունը և արդյունավետությունը, ինչպես նաև օտարերկրյա փորձի ու արտասահմանյան
ընկերությունների ներգրավումը Հայաստանի ՏՏ ոլորտում», - ասել է նա: Հակոբ Արշակյանի խոսքերով, այդ
նպատակով օգտագործվելու է ինչպես պետության, այնպես էլ սփյուռքի, ինչպես նաև մասնավոր ներդրողների
ներուժը:
Մամուլի ասուլիսին ներկա «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանն ընդգծել է, որ
իրենք պատրաստ են նման միջոցառումներին աջակցել: «Հայաստանում ՏՏ ոլորտի հանդեպ ուշադրության
գրավումը պետք է առաջնահերթ նշանակություն ունենա և նեղ շահերից վեր դասվի, դա կապված է պետության ողջ
ապագայի հետ»,- նշեց նա:
Նշենք, որ նախորդ տարիների դափնեկիրներն են այնպիսի հնչեղ անուններ, ինչպիսիք են՝ «Ինտել»
կորպորացիայի նախկին գլխավոր գործադիր տնօրեն Քրեյգ Բարրետը, «Apple Computer» կորպորացիայի
հիմնադիր Ստիվ Վոզնիակը, «Synaptics» ընկերության պատվավոր նախագահ, «Ֆեդերիկո եւ Էլվիա Ֆաջին»
հիմնադրամի նախագահ Ֆեդերիկո Ֆաջին, «Հիտաչի» ընկերության նախկին գործադիր տնօրեն Ցուգիո
Մակիմոտոն, «Սիսկո Սիսթեմս» զարգացման գծով նախագահ Մարիո Մացցոլան, «Կասպերսկի» lաբորատորիայի
գլխավոր տնօրեն Եվգենի Կասպերսկին, ինտերնետի նախահայրերից մեկը, «Open-Root» կազմակերպության
գլխավոր տնօրեն Լուի Պուզենը և «Nest Labs» ընկերության հիմնադիր, IPod ապրանքանիշի ստեղծող Թոնի
Ֆադելը։-կ-