Արմինֆո. Պետեկամուտների կոմիտեի նախագահ Դավիթ Անանյանը կոչ է անում <Գազպրոմ Արմենիա> ընկերությունում ստուգումները բնական գազի սակագների նվազման հնարավորության հետ չկապել: <<Գազպրոմ Արմենիա> ընկերությունում ստուգումները շարունակվում են. դրանք սովորական, ընթացիկ ստուգումներ են՝ կապված բյուջեի հետ փոխհարաբերությունները ճշտելու հետ>,-հունվարի 16-ին ասուլիսի ժամանակ ասել է Անանյանը:
Դավիթ Անանյանը նշել է, որ ստուգումների ընթացքում որոշակի քննչական գործողություններ կատարելու անհրաժեշտություն է առաջացել: <Գործընթացը շարունակվում է, և խորհուրդ կտամ ՊԵԿ-ում ստուգումները գազի գնի հնարավոր փոփոխության հետ չկապել, քանի որ դրանք ընդամենը ընթացիկ ստուգումներ են, որոնք առաջին անգամ չեն անցկացվում: <Պարզապես գազալցակայաններում ՊԵԿ ստուգումների համատեքստում թեման ավելի լայն հասարակական արձագանք է գտել, ինչը, կարծում եմ, այնքան էլ հիմնավորված չէ>,- ասել է Անանյանը:
Ըստ որում, նա նշել է, որ այս պահին գործընթացը կասեցված է՝ որոշակի տվյալներ ճշտելու նպատակով:
Հիշեցնենք, որ <Գազպրոմի> ղեկավար Ալեքսեյ Միլլերը և ՀՀ փոխվարչապետի պաշտոնակատար Մհեր Գրիգորյանը դեկտեմբերի 31-ին ստորագրել են <Գազպրոմ Արմենիա> ընկերությանը գազի մատակարարման պայմանագրին կից լրացուցիչ համաձայնագիր: Վրաստանի հետ սահմանին Հայաստանի համար գազի գինը 2019 թվականի սկզբից ավելացել է 10% -ով` մինչեւ 165 դոլար 1000 խմ դիմաց: 2016 թվականի համաձայնագրով հազար խորանարդ մետրի դիմաց գինը կազմում էր 150 դոլար:
Նոյեմբերի 15-ին կառավարության նիստից հետո Դավիթ Անանյանը լրագրողներին հայտնել էր, որ <Գազպրոմ Արմենիա> ընկերությունում պլանային ստուգումների ընթացքում հայտնաբերվել են որոշակի հանգամանքներ, որոնց վերաբերյալ անհարժեշտություն է առաջացել քրեաիրավական գնահատական տալու: Ինչպես նշել է ՊԵԿ ղեկավարը, այդ ընթացքում ստուգում իրականացնող հարկային ծառայողների կողմից որոշակի տեղեկատվություն է բացահայտվել, որը ներկայացվել է ՊԵԿ քննչական վարչություն, և հաղորդում է տրվել Քննչական վարչություն հետագա ստուգումներ իրականացվելու համար: Հաղորդման հիման վրա քննիչի որոշմամբ հարուցվել է քրեական գործ:
<Գազպրոմ Արմենիա> ընկերությունն անհեթեթ է անվանել հարկեր չվճարելու առնչությամբ մեղադրանքները: Ինչպես նշված է ընկերության հաղորդագրության մեջ, <Գազպրոմ Արմենիա> ՓԲԸ-ն, տարիներ շարունակ լինելով Հայաստանի Հանրապետության առաջին խոշոր հարկ վճարողը, մշտապես իր գործունեությունը ծավալել է բացառապես ՀՀ հարկային օրենսդրությանը համապատասխան՝ դրա արդյունքում ՊԵԿ-ից պարբերաբար ստանալով ‹‹Օրինապահ հարկ վճարողի›› հավաստագրեր: ՊԵԿ-ի նման գործելաոճը կարող է վտանգել Ընկերության ձեռք բերած գործարար համբավը և ձախողել Ընկերության բնականոն գործունեությունը, նշել են ընկերությունում: