Արմինֆո. 2018 եւ 2019 թվականներին վարչապետին առընթեր Պետական վերահսկողական ծառայության ստուգումների արդյունքում պետբյուջե է վերադարձվել 827 մլն դրամ: «Սա նորաստեղծ կառույցի համար բավական լավ արդյունք է, աշխատանքի ծավալը շատ մեծ է, եւ մենք կաշխատենք առաջնահերթության կարգով», - լրագրողների հետ զրույցում ասել է ծառայության ղեկավար Դավիթ Սանասարյանը:
Նրա ասելով, ծառայությունը մանրամասն ուսումնասիրել է հանրապետության քրեակատարողական համակարգը: «Դատապարտյալների օգնության» հիմնադրամում լուրջ խնդիրներ են արձանագրվել: Աշխատանքի արդյունքները ներկայցվել են համապատասխան գերատեսչություններին: Տեղական ինքնակառավարման մարմիններում, մասնավորապես, Նոր Գեղի, Ազատամուտ, Անի համայնքներում ստուգումների արդյունքների հիման վրա քրեական գործեր են հարուցվել:
Մանրամասն ուսումնասիրություններ են իրականացվել ջրօգտագործող ընկերություններում, որոնք ոռոգման ջրով ապահովում են ֆերմերային տնտեսություններին: Կազմակերպությունները, ինչպես պարզվեց, գյուղացիներից ջրամատակարարման համար փող են հավաքել, որը չի հասել պետական գանձարան: Ընկերությունների ղեկավարները ընդունեցին իրենց մեղքը: Մինչեւ մարտի 15-ը կներկայացվեն այս թեմայի վերաբերյալ ուսումնասիրության արդյունքները, եւ համապատասխան գնահատական կտրվի:
Պետական վերահսկողական ծառայությունը շարունակում է ստուգումները Հայաստանի պետական բուհերում: Ագրարային համալսարանի նախկին ղեկավարությունը ամբողջությամբ վերականգնել է պետական բյուջեին հասցված վնասը` 350 մլն դրամի չափով: Մ.Հերացու անվան պետական բժշկական համալսարանում ուսումնասիրությունները կավարտվեն մարտի վերջին, սակայն, ինչպես նշել է Սանասարյանը, արդեն որոշակի արդյունքներ կան: Ըստ Սանասարյանի, ստուգվող տեղեկատվության, ինչպես նաև պետբյուջեից բուհերին, հատկացվող միջոցների ծավալը չափազանց մեծ է:
Ավելի վաղ հաղորդվել էր, որ Երեւանի պետական համալսարանում չարաշահումները գնահատվել են 800 մլն դրամ: Ստուգումների այս արդյունքը բուռն հակազդեցություն է հարուցել համալսարանի ռեկտորատում, որը սպառնացել էր դատական հայց ներկայացնել ծառայության ղեկավարի դեմ: Սանասարյանը նշել է, որ պատրաստ է իրավիճակի նման զարգացման: «Մենք ընթացակարգերը չենք խախտել եւ գործել ենք օրենքի շրջանակում: Խախտումներին իրավական գնահատական կտան իրավապահ մարմինները», - ընդգծել է նա:
Բացի այդ, պետական ծառայությունը ստուգումներ է իրականացնում պետական գնումների ոլորտում: Արդեն հայտնաբերվել են խախտումներ գնման օբյեկտների տեխնիկական բնութագրերի մասով: Այս ժամանակահատվածում տասնյակ գնումներ, պարզապես, կասեցվել են, կամ փոխվել են դրանց տեխնիկական բնութագրերը: Պետական ծառայության ղեկավարի խոսքերով, «խտրական բնութագրեր՚ կազմելով աչքի են ընկել մարզպետարանները, գյուղատնտեսության եւ առողջապահության նախարարությունների ենթակայության տակ գտնվող մարմինները, տարածքային կառավարման եւ զարգացման, էներգետիկ ենթակառուցվածքները, Պետական եկամուտների կոմիտեն: «Չեմ պնդի, թե հայտնաբերված խախտումները միտումնավոր են: Սա նաև օրենսդրական բացթողում է, որը կշտկենք», - պարզաբանել է նա:
Ընդհանուր առմամբ, ինչպես նշել է Դավիթ Սանասարյանը, իր գլխավորած կառույցի խնդիրը ոչ միայն խախտումների հայտնաբերումն է եւ բյուջեի միջոցների վերականգնումը, այլեւ` դրանց կանխարգելումը: