Արմինֆո.«Գազպրոմի՚ հետ բանակցություններն ավարտվել են, եւ Վրաստանը շուտով կձեւակերպի ռուսական պետական գազային ընկերության հետ համաձայնագիրը: Ըստ «Գրուզիա Օնլայնի՚, այդ մասին հայտարարել է էկոնոմիկայի փոխնախարար Նատիա Տուրնավան։
Ինչպես պնդում է նա, բանակցությունները հաջող են ավարտվել, ինչը նշանակում է, որ Վրաստանը բարելավել է դիրքերը ռուսական ընկերության նկատմամբ: «Տարանցման գինը, որը վճարում է մեզ Ռուսաստանը [փոխադրման համար], ավելացել է, իսկ ռուսական գազի գինը նվազել է. դա այն դեպքում, եթե որեւէ մասնավոր բիզնես հետաքրքրվի այդ այլընտրանքով՚, - հայտարարել է Տուրնավան: Նրա խոսքով, ինքը չի կարող հստակ ասել, թե որքան է աճել տարանցման արժեքը, քանի որ դա կոմերցիոն գաղտնիք է։ Ըստ Տուրնավայի, «Գազպրոմի՚ հետ կձեւակերպվի երկամյա պայմանագիր, որն աշխատելու է 2019-2020 թվականներին: «Բանակցություններն ավարտվել են մեր օգտին։ Տարանցման արժեքն ավելացել է։ Ինչպե՞ս ենք հասել դրան։ Սա ունի մի քանի բացատրություն: Մեր թիմը, որը բանակցում էր նրանց հետ, լավ օգտագործեց նավթի համաշխարհային գների դինամիկան։ Գների մեջ որոշակի անկում կա, համապատասխանաբար, կար որոշակի զիջումների պատրաստակամություն, և մենք լավ օգտագործեցինք այդ պահը։ Մեր շուկայի մեծ մասը ներկայացնում է հատուկ [սպառողական] հատվածը, այսինքն՝ բնակչությունը։ Այդ հատվածը կապահովվի ադրբեջանական գազով, և մենք դրա ռեսուրսն ունենք ։ Ինչ վերաբերում է մասնավոր հատվածին, բիզնեսին եւ արտադրությանը, ապա դա կարգավորվելու է շուկայով: Խոսակցությունն այն մասին, որ ռուսական գազը զանգվածաբար կմտնի շուկա, բացառվում է՚, - հայտարարել է Տուրնավան։
Ինչպես նշել է նախարարը, «Գազպրոմի՚ հետ բանակցություններում վրացական կողմը ղեկավարվել է երկու հիմնական սկզբունքով՝ էներգետիկ անկախություն եւ անվտանգություն, եւ «Գազպրոմի՚ հետ հարաբերություններում դիրքերի բարելավում: «Մեր շուկայի երկու կարեւորագույն ռազմավարական հատվածները՝ բնակչությունը եւ էլեկտրաէներգիայի արտադրությունը, լիովին ապահովվում են եւ այսուհետև էլ կապահովվեն ադրբեջանական գազով՚, - նշել է Տուրնավան: Նրա խոսքով, գազի ոլորտում Ադրբեջանը նախկինի պես Վրաստանի գլխավոր մատակարարն է եւ ռազմավարական գործընկերը, իսկ «Շահդենիզ՚ հանքավայրի երկրորդ փուլի լիարժեք գործարկումից հետո ադրբեջանական գազի բաժինը Վրաստանի շուկայում ավելի կմեծանա: «Երկրորդ խնդիրը «Գազպրոմի՚ հետ հարաբերություններում մեր դիրքերի բարելավումն էր։ Մենք հասել ենք երկու դիրքերի բարելավման՝ տարանցման արժեքը, որը մեզ վճարում են, ավելացել է, իսկ ռուսական գազի գնման գինը նվազել է, այն դեպքում, եթե որեւէ մասնավոր բիզնես հետաքրքրվի այդ այլընտրանքով՚, - հայտարարել է Տուրնավան։ Հիշեցնենք, որ մինչեւ 2016 թվականը «Գազպրոմը՚ գազի տարանցման դիմաց վճարել է «բնամթերքով՚. Վրաստանը հաստատուն ծավալի գազ էր ստանում Հայաստան տարանցման համար։ 2016 թվականից «Գազպրոմը՚ փոխել է նման մոտեցումը բոլոր այն պետությունների նկատմամբ, որոնց հետ նա տարանցիկ համաձայնագրեր ունի։ Վրաստանը ստիպված էր համաձայնել նոր պայմաններին։ Ընդդիմությունը իշխանություններին մեղադրում էր այն բանում, որ նա նպաստում է ռուսական ընկերության ներթափանցմանը վրացական շուկա, եւ նոր համաձայնագրով Վրաստանը զրկվել է քանի տասնյակ միլիոն դոլարից: Նախկին պայմանագրի գործողության երկամյա ժամկետը լրացել է 2018 թվականի դեկտեմբերի 31-ին։ Մինչեւ 2017 թվականի հունվար Վրաստանը Ռուսաստանից Հայաստան գազի տարանցման համար ստանում էր բաց թողնված հումքի ընդհանուր ծավալի 10 տոկոսը։ Վրաստանի և «Գազպրոմ էքսպորտ՚ ընկերության միջև կնքված վերջին պայմանագրի համաձայն, 2017 թվին Հայաստան գազի տարանցման դիմաց վճարվում էր խառը համակարգով՝ մասամբ փողով և մասամբ հումքով, իսկ 2018 թվին` միայն դրամական միջոցներով։