Ուրբաթ, 15 Հունվարի 2016 18:49

Արմինֆո. 2015 թվականին բենզինի գները Հայաստանում փոքր-ինչ նվազել են: Այդ մասին լրագրողներին հաղորդել է Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:

Նրա գլխավորած գերատեսչության տվյալներով, 2015 թվականին բենզինի գները նվազել են, ընդհանուր առմամբ, 470 դրամից մինչև 410 դրամ կամ 13%-ով: Անդրադառնալով այն հարցին, թե ինչու բենզինը նավթի միջազգային գների անկմանը համարժեք չափով չի էժանանում, Շաբոյանը նշել է, թե նավթի տեսակարար կշիռը բենզինի գնի մեջ փոքր է, հետևաբար մեկ միավոր նավթի գնի փոփոխությունը շատ քիչ ազդեցություն է թողնում վաճառվող բենզինի գների վրա։ Նրա ասելով, Հայաստանում վաճառվող բենզինի մեջ նավթի տեսակարար կշիռը կազմում է 7 %, քանի որ ներկրվում է Ռուսաստանից, որտեղ նավթի տեսակարար կշիռը բավականին փոքր է: Արտակ Շաբոյանը նաև ընդգծել է, որ Ռուսաստանում բենզինը մեծ չափերի հարկերով են հարկում, նաև զգալի միջոցներ են պահանջվում դրա փոխադրման համար: Այդ պատճառով նավթի գնանկման ազդեցության տեսակարար կշիռը կազմում է 7-8%, ուստի գնանկումն առանձնապես չի ազդում բենզինի գների վրա Հայաստանում:

Նշենք, սակայն, որ, չնայած համեմատաբար բարձր հարկերին, բենզինի գները Ռուսաստանում, Հայաստանի համեմատ, գործնականում, կրկնակի նվազել են: Եվ եթե այսօր 1լ «ռեգուլյարե բենզինը Երևանում արժե 1 դոլարից մի քիչ պակաս` շուրջ 420-430 դրամ, ապա Մոսկվայի բենզալցակայաններում բենզին կարելի է գնել 1 լ դիմաց 34 ռուբլով (կես դոլարից պակաս): Եվ դա բացատրվում է շատ պարզ` նվաթի միջազգային գների անկմամբ: Ավելին, 2015 թվականի հուլիսի 1-ին  ՌԴ նախագահ Վլադիմիր Պուտինը ստորագրել է Ռուսաստանի և Հայաստանի կառավարությունների միջև բնական գազի, նավթամթերքի և անմշակ ալմաստի Հայաստան մատակարարումների ոլորտում համագործակցության շուրջ 2013 թվականի դեկտեմբերի 2-ի համաձայնագրին կից արձանագրության վավերացման մասին օրենքը: Այդպիսով, առանց տուրքի մատակարարումների ժամկետը երկարաձգվել էր մինչև 2015 թվականի վերջը: 2015 թվականին ինդիկատիվ հաշվեկշռի համաձայն, ՌԴ առանց մաքսատուրքի ձևակերպման պետք է Հայաստան առաքեր 136, 2 հազար տոննա ավտոմեքենայի բենզին, որից 120 հազար տոնաա` ռուսական արտադրության: Անցյալ տարի Հայաստանը պետք է ստանար 150 հազար տոննա դիզելային վառելիք (ողջ ծավալը ռուսական արտադրության), 47 հազար տոննա վառելիք ռեակտիվ շարժիչների համար (8 հազար տոննա ռուսական արտադրության), ինչպես նաև 29,2 հազար տոննա նավթային գուդրոն բիտումի արտադրության համար (ամբողջը ռուսական արտադրության): Մատակարարումները իրականացվել են մինչև 2015 թվականի դեկտեմբերի 31-ը: