Չորեքշաբթի, 31 Օգոստոսի 2016 16:09

Արմինֆո. ՀՀ կառավարությունը երբևէ չի քննարկել և չի պատրաստվում քննարկել «Գազպրոմ Արմենիայի» նկատմամբ «Երևանի ՋԷԿ»-ի կուտակած պարտքերի դիմաց՝ կայանը վաճառելու տարբերակը։ Այս մասին ԱրմԻնֆո գործակալությանը տեղեկացվել է ՀՀ ԷԲՊՆ տեղեկատվության և հասարակայնության հետ կապերի բաժին մամուլի ծառայությունից:

Ավելի վաղ, ռուսական life.ru պորտալը, հղում կատարելով Ռուսաստանի և Հայաստանի միջկառավարական հանձնաժողովին մոտ կանգնած աղբյուրներին, նշել էր, որ Երևանի ՋԷԿ-ը Գազպրոմի հայկական դուստր` «Գազպրոմ-Արմենիա» ընկերությանը պարտք է 52.3 մլն.դոլար: Այս մասին հաղորդել է: Հաստատելով պարտքի առկայությունը, «Գազպրոմ-Արմենիա» ընկերության մամուլի ծառայությունից ԱրմԻնֆո գործակալությանն, այնուամենայնիվ, հաղորդել են, որ պարտքի մեծ մասն արդեն մարված է, իսկ մնացած մասի շուրջ ընթանում են բանակցություններ: «Այնպես որ, վերջին օրերին զանգվածային լրատվական միջոցներով շրջանառվող տարաբնույթ մեկնաբանությունները, որոնք վերաբերում են «Երևանի ՋԷԿ»-ի հնարավոր վաճառքին, որևէ առնչություն չունեն իրականության հետ»,-ասված է նախարարության հաղորդագրության մեջ: Աղբյուրը նշում է, որ գազի դիմաց «Երևան ՋԷԿ»-ի ունեցած պարտքերը ամենևին էլ նոր չեն։ «Նշված խնդրի վերաբերյալ լրատվամիջոցներում բազմիցս եղել են քննարկումներ։ Տարօրինակ է, որ այն կրկին հայտնվեց օրակարգում»,-նշում է աղբյուրը։ Առկա պարտքի կառուցվածքը մանրամասն ներկայացվել է դեռևս այս տարվա մայիսի 12-ին ՀՀ կառավարության և Վերակառուցման և Զարգացման Միջազգային Բանկի միջև ստորագրված «էներգետիկայի ոլորտի ֆինանսական առողջացման ծրագիր» վարկային համաձայնագրում, որի շրջանակներում Համաշխարհային բանկը տրամադրեց 30 մլն. դոլարի վարկ։ Բազմիցս հայտարարվել է, որ վարկի մի մասը ուղղվելու է «Գազպրոմ Արմենիայի» նկատմամբ «Երևանի ՋԷԿ»-ի պարտքի մասնակի մարմանը։ Էներգետիկ համակարգի ֆինանսական առողջացման ծրագրի շրջանակներում իրականացված միջոցառումների արդյունքում՝ վերջին ամիսներին պարտքի զգալի մասը մարվել է։ Այժմ այն կազմում է ոչ թե 52,3 միլիոն, այլ՝ 33,8 միլիոն դոլար։ Պարտքի մնացած մասի մարումը նախատեսվում է իրականացնել առաջիկայում։ «Երևանի ՋԷԿ»-ի ֆինանսական առողջացման նպատակով ՀՀ էներգետիկայի և բնական պաշարների նախարարի ստեղծած հանձնաժողովի կողմից արդեն իսկ ձեռնարկվել են միջոցառումներ՝ կայանի ֆինանսական վիճակի բարելավման, ծախսերի օպիմալացման և արդյունավետության բարձրացման ուղղությամբ։ Արդյունքներն արդեն տեսանելի են։ ՀՀ էներգետիկայի և բնական պաշարների նախարարությունը ՀՀ նախագահին ներկայացրել է մանրամասն ծրագիր, որով նախատեսվում է մինչև 2017թ. օգոստոսի 1-ը (հերթական սակագնային տարվա սկիզբը) իրականացնել «Երևանի ՋԷԿ»-ի ֆինանսական առողջացման փաթեթի գերակշիռ մասը։

Նշենք, որ հունիսի 17-ին ՀՀ խորհրդարանը վավերացրեց ՎԶՄԲ հետ 30 մլն.դոլարի վարկային համաձայնագիրը, որը նախատեսվում է ուղղել էներգետիկ համակարգի առողջացմանը: Ինչպես նշել է ՀՀ էներգետիկայի և բնական ապաշարների փոխնախարար Արեգ Գալստյանը, համաձայնագրի շրջանակներում կտրամադրվի 30 միլիոն ԱՄՆ դոլարի վարկ, 25 տարի մարման և 14.5 տարի արտոնյալ ժամկետով LIBOR տոկոսադրույքով: Փոխնախարարը նշել էր, որ միջոցները կտրամադրվեն Հայկական ԱԷԿ-ի և Երևանի ՋԷԿ-ի պարտքերի մարմանը ՀԷՑ հանդեպ: Նրա խոսքով, էժան վարկային միջոցները հայկական պետական ընկերություններին թույլ կտան վերակազմավորել նախորդ փոխառությունները, որոնք վերցվել էին ավելի բարձր տոկոսադրույքներով: