Երեթշաբթի, 18 Հոկտեմբերի 2016 15:43

Արմինֆո. Նիդերլանդների Զարգացման Ֆինանսական Ընկերությունը (FMO) և ԱԿԲԱ-ԿՐԵԴՒՏ ԱԳՐԻԿՈԼ Բանկը կնքել են 15 մլն ԱՄՆ դոլարի չափով վարկային համաձայնագիր: Ֆինանսական միջոցները ուղղվելու են Հայաստանում փոքր և միջին ձեռնարկությունների, ինչպես նաև գյուղատնտեսության հատվածի զարգացմանը: Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, Ձեռք բերված վարկային ռեսուրսը բազմարժութային է, որը ենթադրում է, որ ներգրավվող ռեսուրսը կարող է լինել ինչպես ԱՄՆ դոլարով, այնպես էլ ՀՀ դրամով: Փաստաթուղթն ստորագրվել է Նիդերլանդների Նորդվեյք քաղաքում՝ FMO-ի կողմից  կազմակերպված «Ֆինանսների Ապագան» կոնֆերանսի ընթացքում:

Աղբյուրի համաձայն, համաձայնագիրը Բանկի և FMO-ի միջև առաջին ուղիղ համագործակցությունն է: Մինչ այդ ԱԿԲԱ-ԿՐԵԴԻՏ ԱԳՐԻԿՈԼ Բանկը FMO-ի հետ իր համագործակցությունը սկսել էր դեռևս 2012 թվականից՝ Բանկի և ՎԶԵԲ–ի միջև կնքված տեղական արժույթով վարկի շրջանակներում, որի ժամանակ FMO-ն հանդես է եկել որպես երկրորդ վարկատու:

Նշենք, որ FMO-ն հոլանդական զարգացման բանկն է, որը շուրջ 46 տարի շարունակ ներդրումներ է իրականացնում զարգացող երկրների տնտեսություններում: Շուրջ 85 երկրներում 8.9 մլրդ եվրոյի ներդրումներ իրականացրած FMO բանկն աշխարհում մասնավոր հատվածի զարգացմանը խթանող խոշորագույն կազմակերպություններից մեկն է:

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, 2016 թվականի հուլիսի 1-ի դրությամբ ԱԿԲԱ-Կրեդիտ Ագրիկոլ Բանկը ՓՄՁ ոլորտի վարկավորման ծավալներով գտնվում է Հայաստանի առաջատար բանկերի տասնյակում - 33.8 մլրդ դրամ կամ վարկային ընդհանուր պորտֆելի 18%-ը: Բանկերի կողմից ՓՄՁ ոլորտում կատարված ընդհանուր վարկային ներդրումների կառուցվածքում ԱԿԲԱ-Կրեդիտ Ագրիկոլ Բանկի մասնաբաժինը կազմել է 6%: Բանկի գյուղատնտեսական վարկերի պորտֆելը 2016-ի հուլիսի 1-ին հասել է 87.1 մլրդ դրամի ($ 182.8 մլն): Բանկային համակարգի ընդհանուր գյուղատնտեսական վարկերի կառուցվածքում առյուծի բաժինն ավանդաբար ընկնում է ԱԿԲԱ-Կրեդիտ Ագրիկոլ Բանկին, 2016-ի հուլիսի 1-ին կազմելով 55%: Քանի որ բանկը հիմնականում մասնագիտանում է գյուղատնտեսական վարկավորման ոլորտում, հետևաբար, վարկային պորտֆելում գյուղվարկավորման ծավալները հասնում են 41% -ի: Հիշեցնենք, որ ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ ՓԲԸ-ն Հայաստանում գործում է 1995 թվականից: 2006 թվականի սեպտեմբերից որպես բանկի մաժորիտար բաժնետեր հանդես է գալիս խոշորագույն եվրոպական Credit Agricole S.A. բանկային խումբը` կապիտալում 15,56% բաժնեմասով, որին հետևում է SJSC «Sacam International» բաժնետիրական ընկերությունը (Credit Agricole S.A խմբի անդամ)` 12,44%: Դրանցից զատ կապիտալում բաժին ունեն նաև գյուղացիական փոխօգնության 10 մարզային միություններ: Մասնաճյուղերի ցանցի ընդգրկմամբ և մարզային մասնաճյուղերի թվով բանկը երկրորդ դիրքն է զբաղեցնում: Հիմնական հաշվեկշռային ցուցանիշների գծով ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԸ պահպանում է դիրքերն առաջատար հնգյակում: