Արմինֆո. ՀՀ ֆինանսների նախարար Վարդան Արամյանը հայտարարել է, որ կառավարությունը որոշել է չբարձրացնել կենսաթոշակներն ու աշխատավարձերը հանուն տնտեսական աճի ապահովման: Երկրի 2017 թվականի պետբյուջեով կենսաթոշակների և աշխատավարձերի բարձրացում չի նախատեսվում:
«Մենք կարող էինք գնալ կենսաթոշակների և աշխատավարձերի բարձրացման և արձանագրել կարճաժամկետ արդյունք, բայց այդ դեպքում մենք ռիսկի ենք դիմում հարվածի տակ դնել երկրի տնտեսական հետագա աճը և կայունությունը: Հետագայում տնտեսական աճը մեզ թույլ կտա աստիճանաբար բարձրացնել կենսաթոշակները և աշխատավարձերը: Մենք երկարաժամկետ արդյունքների համար զոհաբերում ենք կարճաժամկետ արդյունքը»,-հայտարարել է Արամյանը:
Նշենք, որ 2017 թվականի պետբյուջեի նախագծով ՀՆԱ աճը նախատեսվում է 5% սահմաններում կամ 5405 մլրդ.դրամով: Ըստ նախարարության, 2017 թվականին Հայաստանի տնտեսական աճը կարող է պայմանավորված լինել ոչ միայն արտաքին գործոններով, կապված Ռուսաստանի տնտեսական աճի վերականգնման և մետաղների միջազգային գների աճի հետ, այլ նաև 2017 թվականին իրականացվող հարկաբյուջետային և դրամա-վարկային քաղաքականություններով: Այս ամենի լույսի ներքո, ըստ Արամյանի, տնտեսական աճը կկազմի 3.2%, ինդեքս-սեֆլյատորը`1.7, դեֆիցիտը` 150.1 մլրդ.դրամ: Նախարարը նշել է նաև, որ ըստ նախնական տվյալների, 2016 թվականը երկիրը կեզրափակի մոտ 300 մլրդ. դրամ բյուջեի դեֆիցիտով: 2016-ին հարկեր/ՀՆԱ հարաբերակցոթյունը կազմել է 21.7%, իսկ 2017-ին այս ցուցանիշը նախատեսվում է բարձրացնել 0.4 տոկոսային կետով: Այդ թվում, առաջին 0.2 տոկոսային կետը կլինի կազինոների և տոտալիզատորների ակցիզի և տուրքերի բարձրացման հաշվին, իսկ երկրորդը` հարկային և մաքսային վարչարարության ուժեղացման հաշվին: Դեֆիցիտի ֆինանսավորոմը 2017 թվականին նախատեսվում է իրականացնել 71.1 մլրդ.դրամ ներքին մուտքերի հաշվին, որի 45 մլրդ.դրամը կապահովվի պետական պարտատոմսերի թողարկման և տրամադրված վարկերի վերադարձի միջոցով: Դեֆիցիտի 79 մլրդ.դրամը կներգրավվի արտաքին աղբյուրներից:
Մինչև տարեվերջ ՀՆԱ-ի դեֆլյատոր չի նախատեսվում, իսկ 2017-ին այդ ցուցանիշը կկազմի 101.7%: Գնաճը 12 ամսում կկազմի 2.4%, իսկ միջինը` 1.4%: Տնտեսության աճը կապահովվի մի շարք ոլորտների հաշվին`մասնավորապես, արդյունաբերությունում` 5.5%, գյուղատնտեսությունում` 4%: Շինարարության ոլորտում 2017-ին աճ չի ակնկալվում (2016-ին` 1.5% անկում), ծառայությունների ոլորտում աճը կկազմի 2.8%, անուղղակի հարկերի գծով մուտքերի աճը կկազմի 3%:
Ըստ Արամյանի, երկրի 2017 թվականի պետբյուջեի եկամտային մասը նախատեսվում է ավելացնել 27 մլրդ.դրամով, մինչև 1 210 մլրդ.դրամ, ծախսային մասը կրճատել մոտ 13 մլրդ.դրամով, մինչև 1 360 մլրդ.դրամ: Եկամուտների կառուցվածքում հարկային մուտքերը և պետական տուրքերը կկազմեն 1 135 մլրդ.դրամ, պաշտոնական դրամաշնորհները կկազմեն 31 մլրդ.դրամ, այլ ծախսերը` 44 մլրդ.դրամ:
Բյուջեով ամրագրված երկրորդ սկզբունքը պարտքի կայունությունն է – կայուն հարկաբյուջետային քաղաքականությունը և պարտքային կայունությունը, նշել է նախարարը: Նրա խոսքով, 2014-2015 թվականներին Հայաստանում բյուջեի դեֆիցիտն արձանագրվեց` 4.8%: Այս տարի այս ցուցանիշը, հավանաբար, կկազմի 5.9%, նշել է նա, հավելելով, որ դա էլ հանդիսանում է պարտքի ձևավորման հիմնական աղբյուրը: «Արդյունքում, 2014-2015 թվականներին պարտքն աճեց 43.7% և տարեվերջին կկազմի 54.4%»,-հայտարարել է Արամյանը: Հետևաբար, ըստ նախարարի, հետագայում մենք պետք է լինենք ավելի պահպանողական, որպեսզի թույլ չտանք պարտքի ավելացում: «Հետևաբար, ծախսերի մասով մենք համամետատաբար պահպանողական եինք, և պետբյուջեի ծախսերը նախատեսված են 1 տրլն.360 մլրդ.դրամ, որի 1 264.3 մլրդ.դրամը կամ 93%-ը կազմում են ընթացիկ ծախսերը, 95.9 մլրդ.դրամ կամ 7%-ը` ոչ ֆինանսական ակտիվների գծով ծախսերը: Նման պայմաններում բյուջեի դեֆիցիտը 2017-ին կտատանվի 2.8% շրջակայքում, ինչը մոտ 2 անգամ պակաս է ընթացիկ տարվա ցուցանիշից»,-հայտարարել է նախարարը: