Սակագնի նվազում հայկական ձևով. Ի՞նչ սպասի հայ սպառողն էլեկտրաէներգիայի սակագնի հերթական իջեցումից

Արմինֆո. Հանրային ծառայությունները կարգավորող հանձնաժողովն օրերս կհայտարարի էլեկտրաէներգիայի սակագնի վերանայման գործընթաց նախաձեռնելու մասին: Սակագնի հերթական նվազումը պակաս շոշափելի կլինի սպառողների համար, քան անցած վերանայման արդյունքում էր: Այդ մասին ԱրմԻնֆո-ի թղթակցին հայտնել է ՀԾԿՀ Սակագնային քաղաքականության վարչության պետ Գարեգին Բաղրամյանը:

Նրա խոսքով, ջերմակայանների համար գազի սակագների վերանայման վերաբերյալ լիցենզավորված անձի /«Գազպրոմ Արմենիա»/ հայտի փաթեթի ստացումից հետո, ՙԷներգետիկայի մասին՚ ՀՀ օրենքի հիման վրա, Կարգավորող մարմինն իր նախաձեռնությամբ էլեկտրաէներգիա արտադրող և վերջնական սպառողին համապատասխան ծառայություններ մատուցող էլեկտրաէներգետիկ համակարգի ընկերություններին տրամադրվող ծառայությունների սակագների վերանայման գործընթաց կսկսի: Սակագնի վերաբերյալ որոշում կընդունվի դեկտեմբերին և ուժի մեջ կմտնի միայն 2017 թվականի փետրվարին: Ինչպես գազի դեպքում, ՀԾԿՀ-ն խոստանում է արտոնյալ պայմաններ սահմանել բնակչության սոցիալապես անապահով շերտերի համար: ՙԱյդ խմբի համար էլեկտրաէներգիայի սակագնի իջեցումն ավելի շոշափելի կլինի, քան մնացած սպառողների համար՚,- հայտարարել է Բաղրամյանը: Սակագնի նվազման մասշտաբների մասին, ինչպես հայտարարել է փորձագետը, հնարավոր կլինի խոսել միայն գալիք տարվա համար էլեկտրաէներգայի արտադրության և սպառման կանխատեսվող հաշվեկշիռը ստանալուց հետո միայն: ԱրմԻնֆո-ի ճշգրտող հարցին, թե հնարավոր է արդյոք խոսել սակագնի իջեցման մասին առնվազն վերջին վերանայման սահմաններում՝ 2,58 դրամ կամ 5,9%՝ Հանձնաժողովի ներկայացուցիչը հայտարարել է, որ չի կարծում, թե դրա համար բավարար ռեսուրս կա: ՙՀնարավոր է, արտոնությունից օգտվողների համար սակագնի ավելի մեծ իջեցման մասին որոշում կայացվի, բայց չեմ կարծում, թե մնացածների համար նման նվազում հնարավոր է՚,- նշել է Բաղրամյանը՝ ավելացնելով, որ սակագնի նվազման ավելի զգալի մասշտաբների մասին խոսել չենք կարող: Ինչպես հայտարարել են ՀԾԿՀ-ում, ինչպես և նախորդ անգամ, կան գործոններ, որոնց առջև պաշտոնյաններն անզոր են: Չնայած այն բանին, որ հաջորդ տարի ԱԷԿ-ի աշխատանքը կդադարեցվի ավելի կարճ ժամանակահատվածով, նախնական հաշվարկներով՝ 2-3 ամիս, հերթական անգամ ԱԷԿ արտադրած էժան էլեկտրաէներգիան ավելի թանկով փոխարինելու անհրաժեշտութուն կառաջանա: Պետք չէ մոռանալ նաև, որ սակագնում ներառված են նաև ժամանակացույցի համաձայն վարկերի սպասարկման և մարման առնչությամբ հաշվարկները /ՀԲ $30 մլն վարկ/, որոնք ներգրավվել են, մասնավորապես, էներգահամակարգի արդիականացման համար, հիշեցրել են ՀԾԿՀ-ում:  Նշենք, որ ըստ ՀՀ «Էներգետիկայի մասին» օրենքի, Հանձնաժողովը սակագինը վերանայում (վերահաստատում կամ փոփոխում) և որոշում է կայացնում լիցենզավորված անձի վերանայման հայտի փաթեթն ընդունելուց հետո՝ 90-օրյա ժամկետում: Հանձնաժողովը սեփական նախաձեռնությամբ կարող է վերանայել գործող սակագինը և սահմանել նոր սակագին` իր կողմից հաստատված ընթացակարգի համաձայն` ելնելով լիցենզավորված անձի տնտեսական գործունեության արդյունքներից, ներդրումային ծրագրերի և սպառողներին մատուցվող ծառայությունների որակի նկատմամբ ներկայացված պահանջների կատարումից:

Նշենք, որ 2016 թ. հունիսի 24-ին ՀՀ հանրային ծառայությունները կարգավորող հանձնաժողովը որոշել է սպառողներին վաճառվող էլեկտրական էներգիայի սակագները նվազեցնել 2.58 դրամով: Ըստ ՀԾԿՀ որոշման, 2016 թվականի օգոստոսի 1-ից 1 կվտ/ժ դիմաց ցերեկային սակագինը կլինի 46,20 դրամ` ներկայիս 48,78 դրամի փոխարեն, իսկ գիշերային սակագինը`36,20 դրամ` ներկայիս 38,78 դրամի փոխարեն: Այսօր Հանրային ծառայությունները կարգավորող հանձնաժողով է ստացվել գազի նոր սակագնի վերաբերյալ «Գազպրոմ Արմենիա» ՓԲԸ հայտը: Այնուամենայնիվ, Հայաստանում գազի և էլեկտրաէներգիայի սակագները շարունակում են ամենաբարձրը մնալ տարածաշրջանում: