Հինգշաբթի, 3 Նոյեմբերի 2016 17:24

Արմինֆո. Լոուքոսթեր ՙՊեբեդան՚ կհրաժարվի դեպի Երևան թռիչքներ իրականացնելուց՝ ՙԶվարթնոց՚ օդանավակայանի սպասարկման բարձր գնի պատճառով: ՙՙԶվարթնոցում՚ այն կազմում է մեկ մարդու համար 50 եվրո՝ ավելին, քան մեր սակագինը՚,- հայտարարել է ընկերությունում ՏԱՍՍ-ի աղբյուրը: Մինչդեռ, ինչպես հայտարարել է գործակալության զրուցակիցը, միջինն օդանավակայանի սպասարկման համար ՙՊոբեդայի՚ արտասահմանյան երթուղիների ցանցի սակագինը կազմում է մեկ մարդու համար 10 եվրո, իսկ որոշ օդանավակայաններում՝ նույնիսկ անվճար է:

 

Ավելի վաղ «Պոբեդան՚ Դոնի Ռոստովից դեպի Երևան չվերթեր իրականացնելու թույլտվություն էր ստացել։ Ավիաընկերությունը նաև Մոսկվայից դեպի Գյումրի թռիչքներ իրականացնելու թույլտվություն ունի: Հայկական կողմի հետ ձեռքբերված պայմանավորվածության համաձայն, «Պոբեդա» ավիաընկերությունը 2016 թվականի նոյեմբերի վերջից շաբաթը երեք չվերթ է իրականացնելու Մոսկվայի «Վնուկովո» օդանավակայանից Գյումրիի «Շիրակ» օդանավակայան: Նշվում է, որ ավիատոմսերի գինը սկսվելու է 10 հազար դրամից:

 

Հոկտեմբերի 21-ին Ռոսավիացիան «Պոբեդա՚լոուքոսթերին («Աէրոֆլոտ՚ խմբի անդամ) տրամադրել է Մոսկվայից Գյումրի թռիչքներ իրականացնելու թույլտվություն: Թռիչքներ կիրականացվեն շաբաթական 7 անգամ: Բացի այդ, ինչպես վերջերս հայտարարել է

ՔԱԳՎ ղեկավար Սերգեյ Ավետիսյանը, «Պոբեդան» հայտեր է ներկայացրել նաև Մինվոդի-Երևան-Մինվոդի և Վորոնեժ-Երևան-Վորոնեժ չվերթներ իրականացնելու համար:

 

Մինչդեռ ավաընկերության պաշտոնական կայքում դեպի Հայաստան թռիչքներ իրականացնելու ՙՊոբեդայի՚ նույնիսկ մտադրությունների մասին տեղեկատվություն չկա:  Ավիաընկերությունը տեղեկացնում է դեպի Ադրբեջան /Բաքու/ և Վրաստան /Թբիլիսի/ նոր միջազգային չվերթերի համար տոմսերի վաճառքի մասին: Ավիաընկերության մամուլի ծառայությունում որևէ տեղեկություն ստանալու ԱրմԻնֆո-ի բոլոր փորձերը հաջողությամբ չեն պսակվել:

 

Ինչպես ԱրմԻնֆո-ի թղթակցին հայտարարել է ՔԱԳՎ մամուլի ծառայության ղեկավարը, ի սկզբանե ՙՊոբեդան՚ նախատեսում էր միայն թռիչքներ իրականացնել դեպի Գյումրի, քանի որ ՙԶվարթնոց՚ օդանավակայնը ցածրբյուջետային ավիաընկերությունների չի սպասարում: Միաժամանակ Մինվոդի-Երևան, Վորոնեժ-Երևան չվերթներ իրականացնելու ընկերության ծրագրերը և պայմանավորվածությունները մեկնաբանել ԳԱՔՎ-ում չեն կարողացել:

 

Հիշեցնենք, որ ՙՇիրակ՚ օդանավակայանից արդեն տևական ժամանակ թռիչքներ չեն իրականացվում: Անցած տարի Գյումրի-Մոսկվա միակ չվերթի իրականացումն ընթացիկ տարվա սկզբից դադարեցվել է: ՙՇիրակ՚ օդանավակայանը, ինչպես և Երևանի ՙԶվարթնոց՚ օդանավակայանը ՙԱրմենիա միջազգային օդանավակայաններ՚ ՓԲԸ կառույցի մեջ են մտնում՝ ստեղծված արգենտինահայ գործարար Էդուարդո Էռնեկյանի կողմից: Գյումրիի օդանավակայանը նույնպես միջազգայինի կարգավիճակ ունի:

 

Սեպտեմբերի 20-ին, ելույթ ունենալով ՀՀ խորհրդարանում, վարչապետ Կարեն Կարապետյանը հայտարարեց Գյումրիի օդանավակայանը գործարկելու ծրագրերի մասին: Նրա խոսքով, այդ նպատակով գործադիրը բանակցում է մի շարք լոուքոսթերների հետ:

ՙԶվարթնոց՚ օդանավակայանի գնային քաղաքականությունն արդեն վաղուց խիստ քննադատության է ենթարկվում երկրի փորձագիտական հանրության կողմից: Օդանավակայանի ղեկավարությունը դա չի հերքում: Ըստ պաշտոնական տվյալների, վերջին 3 տարիներին Հայաստանում փակվել են 16 միջազգային ավիաընկերությունների ներկայացուցչություններ և բացվել 10-ի գրասենյակները:  Այդ ընթացքում Հայաստանից հեռացան Czech Airlines և Etihad Airways' խոշորագույն ավիաընկերությունները: Փոխարենը ավելացել է Ռուսաստանի և ԱՊՀ մյուս երկրների ավիաընկերությունների թիվը: