Երկուշաբթի, 21 Նոյեմբերի 2016 21:28

Արմինֆո. ՀՀ վարչապետ Կարեն Կարապետյանը հարցազրույց է տվել Bloomberg գործակալությանը, նշելով, որ երկրի կառավարությունն առաջիկա 6 ամիսներին մտադիր է զարգացնել հստակ ծրագրեր, որոնք թույլ են տալիս 2018 թվականից ապահովել ամենամյա տնտեսական աճ:

«Հայաստանը խորը բարեփոխումների կարիք ունի: Մենք առաջարկում ենք հնարավոր ամենաարագ փոփոխությունները. կոռուպցիայի դեմ պայքար՝ բյուրոկրատիայի կրճատման ճանապարհով, և պետական ֆոնդի հիմնում՝ ձեռնարկատիրության աջակցության նպատակով»,-նշել է վարչապետը:

Վարչապետը գտնում է, որ գործարարությունը չպետք է խոչընդոտվի կոռումպացված պաշտոնյաների կողմից, որոնք ձգտում են դրամական փոխհատուցում ստանալ վարչական որոշումների կայացման դիմաց, կամ գերիշխող մրցակցային դիրքում գտնվող տնտեսավարողների կողմից, որոնք, օգտագործելով իրենց քաղաքական կապերը, փորձում են սահմանափակել ազատ մրցակցությունը: 

Նա նշել է նաև, որ Հայաստանի արտաքին պարտքը կազմում է 5.8 մլրդ դոլար, այն դեպքում, երբ երկրի ՀՆԱ-ն կազմում է 10 մլրդ դոլար և 2017թ.-ին 3.2% աճը չի կարող ապահովել կենսամակարդակի կտրուկ բարելավում: Մենք ունենք նաև արտաքին պարտք, որն աճում է ավելի արագ, քան ՀՆԱ-ն և մեր ստացած եկամուտները: 
Վարչապետը նշել է, որ Պետական եկամուտների կոմիտեի ղեկավարության և հարկային օրենսգրքի փոփոխություններն ուղղված են թափանցիկության ավելացմանը: «ԵՎ մենք թույլ չենք տա գերիշխող մրցակցային դիրքում գտնվող խաղացողներին ճնշել մրցակցությունն` ի հաշիվ իրենց ունեցած վարչական լծակների: Ոչ ոք ոչ անձեռնմխելի է, և ոչ էլ արտոնյալ»:

Վարչապետը գտնում է, որ չնայած արագ փոփոխությունների վրա ունեցած կենտրոնացմանը՝ անհրաժեշտ է ձևավորել խորհրդատվական խումբ՝ ներառելով նաև արտասահմանյան մասնագետների: «Անհրաժեշտ է ուղեղների գրոհ՝ հասկանալու համար, թե ինչպես կարող ենք զարգացնել երկիրը երկարաժամկետ հեռանկարում, ներառյալ հարկային փոփոխությունները, առողջապահությունը, կրթությունը և գյուղատնտեսությունը»:

Նա անդրադարձել է նաև ԵԱՏՄ-ին Հայաստանի անդամակցությանը:  Մինչ քննադատները նշում են, որ դեռևս ոչ մի տնտեսական օգուտ ՀՀ-ն չի ստացել այս ինտեգրումից, սակայն ոչ ոք չգիտի, թե ինչ կլիներ, եթե Հայաստանը չմիանար ԵԱՏՄ-ին, և հնարավոր է բացասական ազդեցությունը լիներ ավելի մեծ, մինչդեռ անդամակցությունը ԵԱՏՄ-ին չի սահմանափակում ՀՀ հնարավորությունը զարգացնելու առևտուրը ԵՄ երկրների հետ»:

Այս համատեքստում վարչապետը հավելել է, որ Հայաստանը նաև փորձում է ամրապնդել առևտրային հարաբերությունները Իրանի Իսլամական Հանրապետության հետ՝ Իրանի միջուկային ծրագրի շուրջ պատժամիջոցների թուլացմանը զուգընթաց: Դեռ ավելին, հանձնարարվել է մինչև սույն թվականի դեկտեմբերի 25-ը մշակել ծրագիր՝ հայ-իրանական սահմանին ազատ տնտեսական գոտու ստեղծման վերաբերյալ՝ նպատակ ունենալով խթանել համագործակցությունը տարբեր ոլորտներում: «Մենք գիտակցում ենք, որ պետական ծախսերի կրճատումը կարող է ունենալ նաև հակառակ ազդեցություն, այն դեպքում, երբ գործարարները հիմնական ներդրումներն իրականացնում են մինչև ընտրությունները կամ հետո ընկած ժամանակահատվածում: Այնուամենայնիվ մենք նպատակ ունենք առաջիկա 6 ամիսների ընթացքում զարգացնել հստակ երկարաժամկետ ծրագրեր, որոնք 2018թ.-ից սկսած հնարավորություն կտան տարեցտարի ապահովել կայուն տնտեսական աճ»,-նշել է ՀՀ վարչապետը: