Արմինֆո. «Հայաստանի Հանրապետության ջրային համակարգը թևակոխում է զարգացման որակական նոր փուլ, մշակվել և ընդունվել են խմելու ջրի և ոռոգման համակարգերի ռազմավարությունները, վերջին 10-12 տարիների ընթացքում միայն խմելու ջրի համակարգերի զարգացման նպատակով կատարվել է ավելի քան 230 մլ դոլարի ներդրումներ, առավել մեծածավալ ներդրումներ են կատարվել նաև ոռոգման համակարգում:
Կատարված ներդրումների շնորհիվ այսօր ՋՏՊԿ ՀՀ գույքային ունեցվածքի ամենամեծ տնօրինողներից է, և մեզ համար արդիական է ստեղծված գույքի պահպանումն ու արդյունավետ շահագործումը, պլանավորումն ու ներդրումների նպատակային իրականացումը»,- այս մասին ՋՏՊԿ-ում տեղի ունեցած հանդիպման ժամանակ հայտարարել է Կոմիտեի նախագահ Արսեն
Հարությունյանը:
Հանդիպմանը մասնակցել են Գույքի կառավարման և ներդրումների իրականացման վարչության ձևավորման համար խորհրդատվական ծառայությունների մատուցման ապագա մրցույթի մասնակից-հավակնորդները:
Նշենք, որ Գերմանական KfW բանկի կողմից ֆինանսավորվող դրամաշնորհային ծրագրի շրջանակներում հայտարարվել է խորհրդատվական ծառայությունների մատուցման միջազգային մրցույթ, որին մասնակցության հայտ են ներկայացրել
11 ընկերություններ: Դրանցից 5-ը ներառվել են կարճ ցանկում և շարունակելու են պայքարը հաջորդ փուլում:
«Պետական գույքի արդյունավետ, նպատակային և խելամիտ կառավարումն այսօր լուրջ խնդիր է դարձել պետական կառույցների համար: Մեր նպատակներից մեկն էլ այն է, որպեսզի այս գործելաոճը արմատավովի և օրինակելի դառնա մեր երկրում: Մենք շատ ուրախ ենք, որ մրցույթին մասնակցության հայտ են ներկայացրել նաև տեղական գործընկերներ: Եվ քանի որ ծրագիրը պարունակում է նաև որոշակի քաղաքական տարրեր, առաջարկում ենք տեղացի մեր գործընկերներին ակտիվացնել համագործակցությունը ՋՏՊԿ-ի հետ, քանզի մենք ակնկալում ենք, որ վարչությունը, որ ստեղծվելու է այս խորհրդատվությունների արդյունքում, պետք է դառնա ներդրումային մեթոդաբանության և ռազմավարության մշակման հիմնական հարթակը»,- ասել է ՋՏՊԿ նախագահի խորհրդական Վիկտոր Մարտիրոսյանը:
Ըստ Վ. Մարտիրոսյանի՝ ՋՏՊԿ-ի նպատակն է ձևավորել մի կառույց, որը կտա ներդրումների իրականացման համար հիմնավոր և համապարփակ ինֆորմացիա, կկատարի համակարգի գույքի ամբողջական հաշվառում և կիրագործի դրա խելամիտ տնօրինումը, ինչպես նաև՝ կօգնի խուսափել կրկնվող գործառույթների
իրականացումից:
«Ոռոգման համակարգի մեր գույքը այսօր ցրված է ջրառ ընկերություններում և ՋՕԸ-երում: Եթե խմելու ջրի ոլորտում մենք կարողանում ենք ավարտել անշարժ գույքի պետական գրանցման աշխատանքներն ու ենթակառուցվածքների վերաբերյալ ունենալ գույքի կադաստր ձևավորելու բավարար հիմքեր, ապա ոռոգման բնագավառում մենք շատ բան պետք է սկսենք զրոյից: Այս համակարգի առաջիկա զարգացումը մենք նույնպես տեսնում ենք պետական-մասնավոր համագործակցության դաշտում: Մենք ակնկալում ենք, որ ծրագրի ավարտին կունենանք գույքի կառավարման մշակված ռազմավարություն, կառավարման անհրաժեշտ բազա և ծրագրային ապահովվածություն, գույքի կառավարման հանրապետական ցանց և զարգացման ծրագրեր: Այնպես որ, անկախ նրանից, թե ով է լինելու մրցույթի հաղթողը, մեր սպասելիքները այս ծրագրերից մեծ են»,- ասել է ՋՏՊԿ նախագահ Արսեն Հարությունյանը:
Ավելի վաղ «Veolia Jur» ընկերությունը, որ նոյեմբերի 21-ին պաշտոնապես դարձել է Հայաստանի Հանրապետության խմելու ջրամատակարարման և ջրահեռացման համակարգերի միասնական օպերատորը առաջիկա 15 տարիների համար, հայտարարել է միասնական սակագին սահմանելու համար ՀԾԿՀ դիմելու մտադրության մասին: 2017 թվականի հունվարի 1-ից ջրի միասնական սակագինը կկազմի 180 դրամ 1 խմ դիմաց` ներառյալ ԱԱՀ: Ողջ հանրապետության նոր միասնական օպերատորը աշխատանքին ձեռնամուխ կլինի 2017 թվականի հունվարի 1-ից` արդեն միանսական սակագնով: Նոր միասնական օպերատորը կստանձնի գործող հինգ օպերատորների` «Երևան ջուրի», «Հայջրմուղի», «Շիրակ ջրմուղի», «Լոռի ջրմուղի» և «Նոր ակունքի» գույքի կառավարումը: