Արմինֆո. 2020 թվականից հետո «Հայաստանի էլեկտրական ցանցեր» ՓԲԸ կորուստները կնվազեն 8%: Այս մասին դեկտեմբերի 21-ին լրագրողներին հայտարարել է ընկերության գլխավոր տնօրեն Կարեն Հարությունյանը:
Նրա խոսքով, մինչև 2020 թվականը կորուստները կնվազեն մինչև 9%, ընդ որում, անկախ ընկերության աշխատանքից: «Բայց մենք վստահ ենք, որ հնգամյա ներդրումային ծրագրի իրականացման արդյունքում կարող ենք արձանագրել ռեգուլյատորի կողմից հաստատված ցուցանիշը»,-նշել է տնօրենը: Նա հավելել է, որ ընկերության բոլոր գործողություններն ուղղված են էլեկտրաէներգիայի սակագների իջեցմանը, ինչի վրա կազդի նաև աշխատողների թվի կրճատումը, շահագործման ծախսերի 10% կրճատումը, ինչպես նաև էլեկտրաէներգիայի հաշվառման ավտոմատացված համակարգի ստեղծումը, որին 2020 թվականին լրացուցիչ կմիանա ևս 290 հազար սպառող: Երևանի որոշ վայրերում արդեն տեղադրված են այդ համակարգերը, որոնք առաջիկա ամիսներին կգործեն: Նոր համակարգի ներդրումը յուրաքանչյուր բաժանորդին թույլ կտա պլանավորել իր ծախսերը: Նախատեսվում է, որ էլեկտրաէներգիայի ծախսված ծավալների վերաբերյալ տվյալները կփոխանցվեն սմարթֆոնների վրա: Այդ նպատակով ընկերությունն ակտիվորեն համագործակցում է ՏՏ-ոլորտի ընկերությունների հետ:
Նա ընդգել է, որ ՀԷՑ-ը չի սահմանում էլեկտրաէներգիայի սակագներ: Ընկերության համար սահմանված է սակագնային մարժա, որը կազմվում է ռեգուլյատորի կողմից սահմանված մեթոդաբանության հիման վրա:
Ավելի վաղ տնօրենը նշել էր, որ կորուստների մեկ տոկոսով իջեցումն ընկերությանը լրացուցիչ կտա 1.3 մլրդ.դրամի շահույթ, հետևաբար, ընկերությունն ինքն է շահագրգռված սակագների իջեցման հարցում: Հիշեցնենք, որ ավելի վաղ ՀԾԿՀ կողմից կորուստների նորմատիվը սահմանվել էր 11.02%:
Հիշեցնենք, որ «Հայաստանի էլեկտրական ցանցեր» փակ բաժնետիրական ընկերության (ՀԷՑ) սեփականատեր ռուսական «Ինտեր ՌԱՕ» ընկերությունը ծանուցում է ուղարկել ՀՀ կառավարությանը` ՀԷՑ-ի բաժնետոմսերի 100%-ը «Լիորմանդ Հոլդինգզ Լիմիթիդ» ընկերությանը վաճառելու մտադրության վերաբերյալ: Այդ առնչությամբ Հայաստանի կառավարությունը շահագրգիռ գերատեսչություններին` Էներգետիկայի և բնական պաշարների նախարարությանը, Արդարադատության նախարարությանը, Ֆինանսների նախարարությանը և Էկոնոմիկայի նախարարությանը հանձնարարել է երեք օրվա ընթացքում խորհրդատվություններ անցկացնել ՀԷՑ ապագա սեփականատիրոջ հետ` բրիտանական «Միդլենդ Ռիսուրսիս Հոլդինգ Լիմիթիդին» ընկերության վաճառքի շուրջ պայմանագրի պայմանները ճշտելու նպատակով: Գնորդն իր վրա է վերցնում Հայաստանի կառավարության և ՀԷՑ առաջին սեփականատեր, բրիտանական Վիրջինյան կղզիների օֆշորային գոտում գրանցված «Միդլենդ Ռիսուրսիս Հոլդինգ Լիմիթիդ» ընկերության միջև 2002 թվականի օգոստոսի 26-ին ստորագրված պայմանագրում ամրագրված բոլոր պարտավորությունները: Բացի այդ, նախատեսվում է ուսումնասիրել «Ինտեր ՌԱՕ»-ի և «Լիորմանդ Հոլդինգզ Լիմիթիդ» ընկերության միջև կնքվող պայմանագիրը` ՀՀ կառավարությանը ներկայացնելով համապատասխան եզրակացություն: Նշենք, որ «Լիորմանդ Հոլդինգզ Լիմիթիդ» ընկերությունը գրանցված է Կիպրոսի օֆշորային գոտում` 2010 թվականին: Ընկերության սեփականատերերի և գործունեության բնույթի վերաբերյալ տվյալներ չկան, այդ թվում` ինտերնետում: Ավելի վաղ տեղեկություններ էին ստացվել Սամվել Կարապետյանի գլխավորած ռուսաստանյան «Տաշիր» ընկերությունների խմբի կողմից ՀԷՑ ձեռք բերման հնարավորության մասին:
«'Հայաստանի էլեկտրական ցանցեր»' ՓԲ ընկերությունը ստեղծվել է 2002թ. մայիսին չորս պետական տարածաշրջանային էլեկտրաէներգիայի բաշխման և իրացման ցանցերի («'Երևանի էլեկտրական ցանցեր»', «'Հյուսիսային էլեկտրական ցանցեր», «Հարավային էլեկտրական ցանցեր» և «Կենտրոնական էլեկտրական ցանցեր») միաձուլման արդյունքում: Ընկերությունը հիմնականում զբաղվում է էլեկտրաէներգիայի բաշխմամբ և իրացմամբ: Ցանցերի ընդհանուր երկարությունը կազմում է 36 հազ. կմ: Ընկերությունը Հայաստանի Հանրապետության տարածքում ունի էլեկտրաէներգիայի բաշխման բացառիկ արտոնագիր: Էլեկտրաէներգիայի բաշխումն իրականացվում է ՀՀ հանրային ծառայությունները կարգավորող հանձնաժողովի կողմից հաստատագրված սակագներով: Ընկերությունը սպասարկում է մոտ 985 000 սպառողի:
ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ