Արմինֆո. ՀՀ Պետեկամուտների կոմիտեում մտածում են աշխատակիցներին ֆինանսապես մոտիվացնելու մասին: «Հանրությունում շրջանառվող կարծիք, որ ՊԵԿ-ի աշխատակիցների աշխատավարձերըւ բարձր են, չի համապատասխանում իրականությանը: Եվ այսօր մենք աշխատում ենք Կոմիտեի աշխատակիցների աշխատավարձերի բարձրացման ուղղությամբ»,- մայիսի 11-ին հայտարարել է ՊԵԿ ղեկավար Վարդան Հարությունյանը, պատասխանելով ԱրմԻնֆո գործակալության հարցին, կապված Կոմիտեի աշխատակիցներին պարգևավճարների իրականացման արդյունավետության և անհրաժեշտության հետ, ինչն իրականացվում է պետական մարմիններում իրականացվող օպտիմալացման և պետական հատվածի կադրային կրճատման գործընթացների ֆոնին:
Ըստ Հարությունյանի, վերջին 3 ամիսներին իրականացված բարեփոխումների արդյունաքում Կոմիտեի աշխատանքի որակը զգալիորեն բարձրացել է: «Օգտվելով առիթից, պետք է շնորհակալություն հայտնեմ ՊԵԿ աշխատակիցներին`լավ աշխատանքի համար»,-նշել է նա:
Միևնույն ժամանակ, ՊԵԿ ղեկավարը, նշելով ադրբեջանական խնձորների ներկրման հետ կապված վերջին զարգացումները և Կոմիտեի աշխատակիցների տհաճ մասնակցությունն այդ միջադեպին, չի հերքում, որ կան երևույթներ, փաստեր, որոնք վարկաբեկում են ՊԵԿ ծառայողի «բարի համբավը»: «Այսօր, ինչպես նաև ապագայում, ես ի վիճակի չեմ բացառել նման անձանց գոյությունը համակարգում: Բայց չեմ կարող հերքել նաև դրական միտումները և բարեփոխումները գերատեսչությունում, ու չեմ կարող չխթանել աշխատակիցներին, դա կլինի անարդարացի»,-հայտարարել է նա: Նրա կարծիքով, լավագույն խթան կարող է լինել բարձր աշխատավարձը: Նրա խոսքով, այսօր աշխատավարձերը համակարգում, եթե համեմատենք բազմաթիվ հարկատուների աշխատավարձերի հետ, բավականին ցածր է: Միջին աշխատավարձը համակարգում պետք է լինի 300-350 հազար դրամ, ներկայիս` 150-200 հազարի փոխարեն, նշել է ՊԵԿ ղեկավարը:
Ըստ Վարդան Հարությունյանի, շուտով համակարգում կիրականացվեն աննախադեպ բարեփոխումներ, որոնց նմանը չի եղել 90-ականներից ի վեր: Բարեփոխումների արդյունքում կարելի է սպասել` ինչպես աշխատակազմի կրճատում, այնպես էլ աշխատակիցների աշխատավարձերի բարձրացում:
Հիշեցնենք, որ 2016 թվականի դեկտեմբերին ՀՀ կառավարությունը 800 մլն դրամ հատկացրեց Պետական եկամուտների կոմիտեի աշխատակիցներին պարգևավճարների նպատակով: Ըստ ՊԵԿ ղեկավար Վարդան Հարությունյանի, հաշվի առնելով, որ 2016 թ. Սյունիքի մարզի ՊԵԿ-ի Վարչական նոր շենքը չի կառուցվելու, գերատոսչության աշխատակազմն առաջարկեց այդ միջոցներն ուղղել աշխատակիցների պարգևատրմանը: Հատկանշական է, որ այս որոշումն ընդունվեց կառավարության հայտարարած`պետական ապարատի օպտիմալացմանն ուղղված քաղաքականության ֆոնի վրա: Այդ որոշման շրջանակներում շարունակում են փակվել բազմաթիվ ՊՈԱԿ-եր, ավելացնելով գործազուրկների բանակը և տնտեսելով մի քանի միլիոն դրամ: