Չորեքշաբթի, 12 Հուլիսի 2017 19:33

Արմինֆո. Անելիք Բանկը շուկա է դուրս բերում կորպորատիվ հաճախորդների վարկավորման բոլորովին նոր պրոդուկտ, որի շրջանակներում տոկոսադրույքը կձևավորեն պոտենցիալ վարկառուները: Այս մասին հուլիսի 12-ին կայացած մամուլի ասուլիսում հայտարարել է Բանկի վարչության նախագահի առաջին տեղակալ-կորպորատիվ բիզնեսի գծով տնօրեն Սերգեյ Վիրաբյանը:

«Վերջին մի քանի ամիսների ընթացքում շատ է քննարկվել, թե ինչ առաջարկով կարող է բանկը զարմացնել շուկային, ինչ նոր մոտեցումներ կարելի է կիրառել: Արդյունքում, մշակվեց մի փորձնական ծրագիր, որի նմանը չկա ոչ մի երկրի բանկային համակարգում», - շեշտել է Վիրաբյանը: Նա նշել է, որ նման մոտեցում բանկը մտադիր է կիրառել նաև վարկավորման մյուս տեսակներում: Նոր մոտեցման շրջանակներում, բացատրել է նա, Անելիք Բանկն ստեղծում է իսկական շուկայական տոկոսադրույք ձևավորման հարթակ:

Ս. Վիրաբյանը նշել է, որ փորձնական ծրագրի արժեքը կկազմի 1 մլն.դոլար, որի շրջանակներում վարկի նվազագույն չափը վարկառուն սահմանում է 50 հազ.դոլար, իսկ առավելագույնը`250 հազ.դոլար: Իրավաբանական անձանց վարկերը տրամադրվում են 60 ամսով: «Ծրագրի շրջանակներում պոտենցիալ վարկառուներից պահանջվում է իրենց հայտերում, որոնք Բանկի մրցութային հանձնաժողովին կներկայացվեն կնքված ծրարներով,  սահմանել ցանկալի տոկոսադրույքը`սկսած 7.7%-ից: Մրցույթի արդյունքների հիման վրա հանձնաժողովը կընտրի առաջարկվողներից ամենաբարձրը, որն ել կգործի հայտատուի համար», - պարզաբանել է նա: Ըստ նրա, մրցույթին կարող են մասնակցել Բանկի կողմից սահմանված չափանիշներին համապատասխանող իրավաբանական անձինք:

Իր հերթին, Անելիք Բանկի կորպորատիվ պրոդուկտների վարչության ղեկավար Հայկ Թումանյանը նշել է, որ հայտերի ընդունման վերջնաժամկետ է սահմանվել հուլիսի 20-ից մինչև օգոստոսի 20-ը: Ըստ նրա, ծրագիրը որևէ սահմանափում չի նախատեսում հայտերի առումով: Նա ընդգծել է, որ ծրագիրն իրականացվում է փոքր և միջին բիզնեսի խրախուսման նպատակով: Միևնույն ժամանակ, նա նշել է, որ մրցույթի արդյունքների հրապարակումը տեղի կունենա մասնակիցների, բանկի ներկայացուցիչների և այլ պաշտոնյաների ներկայությամբ: ԱրմԻնֆո-ի հետ զրույցում Ա. Թումանյանը նշել է, որ բանկը, բաժնետերերի կազմի փոփոխությունից հետո փոխվեց նաև բանկի ռազմավարությունը, որը նախկինում կենտրոնացած էր մանրածախ բիզնեսի զարգացման ուղղությամբ: «Մենք ունենք բավականին հավակնոտ պլաններ: Այսօր մենք փոխեցինք ուղղությունը, ընտրելով մանրածախ և կորպորատիվ պորտֆելների հավասարակշռված զարգացումը», - ընդգծել է նա: Ա.Թումանյանը նշել է, որ առաջիկայում Անելիք Բանկը հանդես կգա նոր առաջարկներով, ներկայացնելով հետաքրքիր և շահավետ պրոդուկտներ, ինչպես մանրածախ, այնպես էլ կորպորատիվ հաճախորդների համար:

Ըստ ԱրմԻնֆո գործակալության պատրաստած «Հայաստանի բանկերի ֆինանսական վարկանիշի», 2016 թվականի արդյունքներով «Անելիք Բանկի» վարկային ներդրումներն աճել են 3.6 անգամ, մինչև 218.8 մլրդ դրամ, որտեղ մանրածախի մասնաբաժինը կազմել է 13% կամ 27.7 մլրդ.դրամ: Վարկային պորտֆելի նման աճը բանկին թույլ տվեց ակտիվներն ավելացնել 3 անգամ, մինչև 283.5 մլրդ.դրամ: Արդյունքում, վարկային պորտֆելի բաժինը բանկի ակտիվներում ավելացել է 68% -ից մինչեւ 77%: Բանկի զուտ շահույթը 2016-ին ավելացրել է 5,3 անգամ` մինչեւ 1,2 մլրդ դրամ: (31.12.2016 դրությամբ դրամի հաշվարկային փոխարժեքը` 483,94 դրամ/1դոլար):

Հիշեցնենք, որ «Անելիք Բանկը» շուկայում գործում է 1996 թվականի հոկտեմբերից: 2016 թվականի նոյեմբերին իրականացված լրացուցիչ թողարկմից հետո Բանկի բաժնետերերի կազմը փոխվեց, միացավ կիպրոսյան FISTOCO LTD ընկերությունը, 59.68% բաժնեմասով, ինչը նվազեցրել նախկին բաժնետերերի մասնաբաժինը, դեմս Լիբանանյան ԿրեդիտԲանկ S.A.L ի, 100%-ից մինչև 40.32%: Բանկի անուղղակի մեծամասնական բաժնետերերն են հանդիսանում ֆիզիկական անձինք` Tarek J. Khalefe (CreditBank S.A.L) և Վարդան Դիլանյանը (FISTOCO ՍՊԸ):