Երեթշաբթի, 18 Հուլիսի 2017 18:18

Արմինֆո. 2015 թվականից հայ ձեռնարկատերերը ԵԱՏՄ անդամ երկրների համար ձևավորվող միասնական շուկայի շրջանակներում կարող են օգտվել գազի և էլեկտրաէներգիայի ավելի շահավետ սակագներից: Այս մասին այսօր կայացած մամուլի ասուլիսում հայտարարել է ՀՀ տնտեսական զարգացման և ներդրումների փոխնախարար Հովհաննես Ազիզյանը: Նա պարզաբանել է, որ միասնական շուկան ենթադրում է ձեռնարկատերերի համար շուկայական գների ձևավորում բորսայում, որի շրջանակներում հնարավորություն կստեղծվի օգտվել գազի ավելի շահավետ սակագներից:

 

Ըստ փոխնախարարի, դա թույլ կտա կրճատել էներգառեսուրսներին ուղղված ծախսերն արտադրության ընթացքում, նվազեցնելով նաև ինքնարժեքը, միաժամանակ բարձրացնելով հայկական ապրանքների մրցունակությունը ԵԱՏՄ երկրների շուկաներում: Էներգակիրների առնչությամբ նա ընդգծել է, որ միասնական շուկայի ձևավորումը թույլ կտա ընդլայնել հայ արտադրողների արտահանումային հնարավորությունները:

 

Նա չի բացառել նաև, որ միասնական համակարգի գործարկման արդյունքով էներգակիրների և գազի սակագների փոփոխությունը կարող է տարածվել նաև վերջնական սպառողների վրա:

 

Նշենք, որ 2016 թվականի մայիսին ԵԱՏՄ պետությունների՝ Հայաստանի, Բելառուսի, Ղազախստանի, Ղրղզստանի և Ռուսաստանի ղեկավարները հաստատել են Գազի ընդհանուր շուկայի ձևավորման հայեցակարգը: Ներկայումս Եվրասիական տնտեսական հանձնաժողովը աշխատանք է տանում ԵԱՏՄ գազի ընդհանուր շուկայի ձևավորման ծրագիրը նախապատրաստելու ուղղությամբ՝ նախագծի գործարկման համար անհրաժեշտ կոնկրետ միջոցառումների ցանկով: Այս փաստաթուղթը նախատեսվում է մշակել և հաստատել Միության երկրների նախագահների մակարդակով մինչև 2018 թվականի հունվարի 1-ը, Ծրագրի միջոցառումները իրականացնել մինչև 2024 թվականի հունվարի 1-ը: Հաջորդ քայլը կլինի ԵԱՏՄ պետությունների կողմից Միության գազի ընդհանուր շուկայի ձևավորման մասին միջազգային պայմանագրի կնքումը: Փաստաթղթում կնախանշվեն դեպի ԵԱՏՄ պետությունների տարածքներում տեղակայված գազատրանսպորտային համակարգերը մուտքի միասնական կանոնները: Սա կապահովի նման միջազգային պայմանագրի ուժի մեջ մտնելը ոչ ուշ, քան 2025 թվականի հունվարի 1-ը: Այսօր գազի մատակարարումները տեղի են ունենում Միության երկրների միջև երկկողմ համաձայնագրերի հիման վրա: Եվրասիական տնտեսական միության գազի ընդհանուր շուկան պետք է համախմբի ԵԱՏՄ պետությունների տնտեսվարող սուբյեկտների առևտրատնտեսական հարաբերությունները: