Երեթշաբթի, 26 Սեպտեմբերի 2017 11:54

Արմինֆո. «Հայաստանի և Ռուսաստանի միջև համագործակցությունն արդեն 25 տարի զարգանում է տարբեր ոլորտներում, և ամենակարևորների թվում է առողջապահության ոլորտը»,-սեպտեմբերի 26-ին  հայ-ռուսական առողջապահական համաժողովի շրջանակներում հայտարարել է ՀՀ առողջապահության նախարար Լևոն Ալթունյանը:

Նախարարը նշել է, որ բուժաշխատողների համար ամենագլխավոր նպատակը առողջ բնակչությունն է: Ալթունյանը նշել է, որ առողջապահության ոլորտին հատկացվող ռեսուրսները ոչ միշտ են արդյունավետ ծախսվում: «Ցանկացած ոլորտի զարգացման համար անհրաժեշտ է ձեռք բերել նոր գիտելիքներ և փորձով կիսվել գործընկերների հետ: Մեզ համար շատ հետաքրքիր է Ռուսաստանից գործընկերների փորձը»,- նշել է նախարարը:

Օրակարգային հարցերի թվում Ալթունյանն առանձնացրել է ծխելու դեմ պայքարը և երկրում ծխողների թվի նվազեցման համար Ռուսաստանի և Հայաստանի կողմից ձեռնարկվող միջոցները: Նա կարևորել է նաև միգրանտների առողջությունը և ԵԱՏՄ շրջանակներում դեղամիջոցների շրջանառությանն առնչվող հարցերը: «Գլխավոր արդյունքը մեզ համար մեր քաղաքացիների առողջությունն է»- ասել է Ալթունյանը: 

Ռուսաստանի առողջապահության նախարար Վերոնիկա Սկվորցովայի խոսքով, համաժողովի օրակարգում քննարկման կարիք ունեցող բազմաթիվ թեմաներ են, որոնցից մեկը ծխախոտի դեմ պայքարն է: Համաժողովի շրջանակներում կքննարկվեն նաև բժշկական զբոսաշրջությանը և դեղորայքի ու բժշկական իրերի միացյալ շուկայի ձևավորմանն առնչվող հարցեր:

ՌԴ առողջապահության նախարարի խոսքով, ամենակարևոր հարցերից մեկը աշխատանքային միգրանտների անվճար բժշկական ապահովագրությունն է: Ինչպես նշել է Սկվորցովան, ԵԱՏՄ-ից, մասնավորապես՝ Հայաստանից, աշխատանքային միգրանտենրը ամբողջական բժշկական ապահովագրություն կստանան Ռուսաստանում: Տվյալ պահին միգրանտներն օգտվում են շտապօգնության և հրատապ բուժօգնության ծառայություններից: «Համաձայնագիր է նախապատրաստվում, ըստ որի՝ աշխատանքային միգրանտներն ամբողջական բժշկական ապահովագրություն կստանան: Բուժօգնության փաթեթը կտարածվի նաև աշխատանքային միգրանտների ընտանիքների անդամների վրա: Ծրագրի իրականացման համար անհարժեշտ է հայկական կողմի համաձայնությունը»,- հայտարարել է Սկվորցովան:

Լևոն Ալթունյանը հավաստիացրել է, որ ՀՀ կառավարությունը սեղմ ժամկետներում կքննարկի ռուս գործընկերների առաջարկը՝ նշելով, որ հայկական կողմից խոչընդոտներ չեն լինի: «Ավելին, Հայաստանի կառավարությունը հոգ է տանում իր քաղաքացիների առողջության մասին, և մենք մտադիր ենք մեր լուման ներդնել»,- նշել է նախարարը:

Համաժողովին ներկա են գտնվել նաև Հայաստանում ՌԴ դեսպան Իվան Վոլինկինը, հոգևորականության ներկայացուցիչներ: ՀՀ վարչապետը, ով պետք է ներկա գտնվեր միջոցառմանը, զբաղվածության պատճառով չի կարողացել մասնակցել համաժողովին, սակայն լավագույն մաղթանքներն է փոխանցել մասնակիցներին: