Չորեքշաբթի, 4 Հոկտեմբերի 2017 18:41

Արմինֆո. Վարչապետ Կարեն Կարապետյանն այսօր ընդունել է Լիտվայի Հանրապետության կառավարական պատվիրակությանը, որի կազմում են էկոնոմիկայի նախարար Մինդաուգաս Սինկեվիչիուսը, սոցիալական ապահովության և աշխատանքի նախարար Լինաս Կուկուրաիտիսը, պաշտոնատար այլ անձինք: Պատվիրակությունը Հայաստանում է՝ առևտրատնտեսական համագործակցության հայ-լիտվական միջկառավարական հանձնաժողովի նիստի շրջանակում:

Վարչապետն ընդգծել է, որ նման ներկայացուցչական պատվիրակության այցը վկայում է երկու երկրների միջև բարձր մակարդակի քաղաքական հարաբերությունների մասին, և Հայաստանը պատրաստակամ է ընդլայնելու համագործակցությունը։ «Մեր առևտրատնտեսական հարաբերություններն ունեն ներուժ, որն առայժմ ամբողջությամբ չի օգտագործվում, և հայ-լիտվական միջկառավարական հանձնաժողովը շատ աշխատանք ու անելիքներ ունի այս առումովե, -ասել է Կարեն Կարապետյանը։ Կառավարության ղեկավարը նշել է, որ նոյեմբերին Բրյուսելում ստորագրվելիք Համապարփակ և ընդլայնված գործընկերության համաձայնագիրը ևս դրական ազդեցություն կունենա հայ-լիտվական հարաբերությունների վրա։ Վարչապետն անդրադարձել է լիտվական գործարարների համար մեր երկրում գործունեություն ծավալելու հնարավորություններին՝ այս համատեքստում նշելով Իրանի հետ սահմանին Սյունիքի ազատ տնտեսական գոտու ստեղծումը և ՀՀ անդամակցությունը ԵԱՏՄ-ին:

Շնորհակալություն հայտնելով վարչապետին ընդունելության համար՝ Լիտվայի կառավարական պատվիրակության անդամները նշել են, որ պատրաստ են ջանքեր գործադրել տարբեր ոլորտներում երկկողմ կապերն էլ ավելի խորացնելու համար: «Հավաստիացնում եմ, որ լիտվական բիզնեսը հետաքրքրված է ավելի լավ բացահայտելու ևԲ Հայաստանը, ևԲ ձեր հարևան երկրները: Մեզ հետ Հայաստանում են և տարբեր հանդիպումներ են ունենում նաև մասնավոր հատվածի ներկայացուցիչներ, մասնավորապես, տեղեկատվական տեխնոլոգիաների և տեքստիլ արդյունաբերության ոլորտից: Կարծում եմ՝ գյուղատնտեսության ոլորտում ևս համագործակցության մեծ հնարավորություններ կան: Մենք այստեղ ենք, որ ավելի լավ ուսումնասիրենք հնարավորությունները և էլ ավելի ընդլայնենք ու զարգացնենք մեր լավ հարաբերություններըե, - նշել է էկոնոմիկայի նախարար Մինդաուգաս Սինկեվիչիուսը:

Կողմերը կարևորել են շարունակական աշխատանքը՝ ավելի բարձր արդյունքներ արձանագրելու ուղղությամբ:

Վարչապետ Կարապետյանը շնորհակալություն է հայտնել Լիտվայի կողմից 2005 թ. Հայոց ցեղասպանությունը ճանաչելու (Լիտվան բալթյան երկրներից միակն է, որ ճանաչել է Հայոց ցեղասպանությունը) և Լեռնային Ղարաբաղի հիմնախնդրի կարգավորման գործում Լիտվայի հավասարակշռված դիրքորոշման համար։