Երեթշաբթի, 24 Հոկտեմբերի 2017 17:44

Արմինֆո. Միայն Հայաստանի արտահանման ծավալը մինչև 3 մլրդ դոլարի հասցնելու դեպքում է հնարավոր լուծել հանրապետության սոցիալական խնդիրները և զարգացնել ռազմարդյունաբերական համալիրը: Այդ մասին հայտարարել է տնտեսագետ, Եվրասիական փորձագիտական ակումբի անդամ Աշոտ Թավադյանը` «Հայաստանի փորձագիտական և կրթական հանրության դերը եվրասիական տնտեսական ինտեգրման զարգացման գործում՚ կլոր սեղանի ընթացքում: Նա նշել է, որ մինչև 2016 թիվն արտահանման տարեկան ծավալը կազմել է 1,5 մլրդ դոլար,  իսկ 2016 թվին այդ ցուցանիշը հասել է 1,775 մլրդ դոլարի: Ինչպես նշել է Թավադյանը, արտահանման աճի գործում առանցքային դեր է խաղում դրա կառուցվածքը: Պատրաստի արատդրանքի արտահանման աճի հեռանկարը Ռուսաստանն է: Դեպի Ռուսաստան և ԵՄ մատակարարումների ծավալները, գրեթե հավասար են, սակայն դեպի Եվրամիություն Հայաստանն արտահանում է, հիմնականում, հումք:

 

Փորձագետը նաև նշել է, որ Հայաստանի զարգացման համար ՀՆԱ նկատմամբ արտադրանքի արտահանման հարաբերակցությունը պետք է հասնի 30 տոկոսի, այժմ այդ ցուցանիշը կազմում է 18 տոկոս: Ընդ որում, նրա ասելով, հիմնականում, պատրաստի արտադրանքի արտահանումը պետք է լինի մեր գլխավոր նպատակը, հակառակ դեպքոււմ Հայաստանում էական զարգացում չի լինի, քանզի փոքր տնտեսություն ունեցող երկրի համար  ներքին շուկան բավականին սահմանափակ է:

 

«ԱՎՎ տվյալներով, արտահանման ծավալը 2016թ. ավելացել է տարեկան 20%` 2015 թվի նույն ժամանակահատվածի համեմատ: 2016 թվին Հայաստանից Ռուսաստան արտահանումն ավեալցել է 50%: Փաստորեն, արտահանման ողջ աճն ապահովվել է Ռուսաստան արտահանման աճի հաշվին: 2017թ. արտահանման աճը կազմել է արդեն 22%, Ռուսաստան` 31%. Դիտվել է նաև դեպի ԵՄ արտահանման աճ, սակայն, հիմնականում, գունավոր մետաղների հանքաքարի գների աճի հաշվին: Պղնձի գինը 2016-2017թթ.  ավելացել է 4400 դոլարից մինչև 6500 դոլար` 48%: Իսկ դեպի Ռուսաստան  արտահանման աճն ավելացել է, հիմնականում, պատրաստի արտադրանքի արտահանման աճի հաշվին՚,- վիճակագրական տվյալներ է նշել փորձագետը, ընդգծելով, որ նման ցուցանիշը լավատեսություն է ներշնչում և թույլ է տալիս ենթադրել, որ Հայաստանի բիզնեսին հաջողվել է հաղթահարել ԵԱՏՄ երկրներ արտահանման ընթացակարգերի ըմբռնման այն անորոշությունը, որը գոյություն ուներ 2015 թվականին` Հայաստանի ԵԱՏՄ անդամության առաջին տարում: Թավադյանը նախանշել է այն գործոնները, որոնք ազդել են Հայաստանից ԵԱՏՄ արտահանման աճի վրա: Խոսքը վերաբերում է ԵԱՏՄ հետ մաքսատուրքերի վերացման շուրջ համաձայնագրի ստորագրմանը, բոլոր ընթացակարգերի պարզեցումը` արտահանման լիցենզիայի ձևակերպումից և ստացումից մինչև մաքսային ձևակերպում, ռուսական ռուբլու փոխարժեքի կայունացում, գազի գների նվազում և այլն: Ինչ վերաբերում է հակառուսական պատժամիջոցներին, ապա տնտեսագետն այն կարծիքին է, որ դրանք կարող են լինել նորարարական արդյունաբերության զարգացման խթան, ընդ որում, ոչ միայն Ռուսաստանում, այլև ԵԱՏՄ մյուս երկրներում: «Հարկավոր է սրբագրել տնտեսական քաղաքականույթյան գերակայությունները, հստակ սահմանել և համաձայնեցնել նպատակները, ձևակերպել ԵԱՏՄ երկրների համար տնտեսության զարգացման նոր մոդել և և կանխատեսել ակնկալվող արդյունքները: ԵԱՏՄ ձևավորումը կընթանա լավագույն սցենարով, եթե ԵԱՏՄ-ում հստակորեն կատարվեն ԵԱՏՄ շուրջ պայմանագրի հիմնական պայմանները,  և վարվի համակարգված արդյունաբերական քաղաքականություն, համաձայնեցված հարկաբյուջետային, դրամավարկային, հատկապես, արժութային քաղաքականություն: Նաև չափազանց կարևոր է մշակել և համաձայնեցնել կոռուպցիային արդյունավետ հակազդեցության միջոցներ: Եվրասիայի երկրների ինտեգրման, դրանց տնտեսական անվտանգության հաջողության բանալին, առաջին հերթին, գտնվում է իրենց ձեռքում՚, - ընդգծել է Աշոտ Թավադյանը: Նշենք, որ կլոր սեղանը կազմակերպել են Եվրասիական տնտեսական հանձնաժողովը, Եվրասիական փորձագիտական ակումբը, «Ինտեգրում և զարգացում՚ հետազոտական-վերլուծական ՀԿ  և «Նորավանք՚ հիմնադրամը: