Հայաստանը պաշտոնապես ստանձնեց TRACECA միջկառավարական հանձնաժողովի նախագահությունը

Արմինֆո. Երևանում մարտի 6-ին մեկնարկել է Եվրոպա-Կովկաս-Ասիա միջազգային տրանսպորտային միջանցքի` «ՏՐԱՍԵԿԱ» ծրագրի միջկառավարական հանձնաժողովի հերթական`13-րդ նիստը։

Ըստ ՀՀ տրանսպորտի, կապի և տեղեկատվական տեխնոլոգիաների նախարարի Վահան Մարտիրոսյանի, նիստի ընթացքում հաստատվելու է «ՏՐԱՍԵԿԱ»-ի մաստեր պլանի և Միջկառավարական հանձնաժողովի` 2016-2026թթ. համար Եվրոպա-Կովկաս-Ասիա միջազգային տրանսպորտային միջանցքի զարգացման ռազմավարության իրականացմանն ուղղված գործողությունների ծրագիրը և մի շարք այլ կարևոր ռազմավարական հարցեր:  

«ՏՐԱՍԵԿԱ-ի շրջանակներում Հայաստանում իրականացվել են մի շարք ծրագրեր: Մասնավորապես, ժամանակին ստեղծվել է Հայաստանից Վրաստան օպտիկամանրաթելային կապի գիծը, կառուցվել են տերմինալներ և այլն: Եվ մենք մտադիր ենք շարունակել աշխատանքները նախաձեռնության շրջանակներում», - ասել է նախարարը:

Խոշորագույն ծրագրերի առումով Վ.Միրիրոսյանը նշել է «Հյուսիս-Հարավ» տրանսպորտային հատվածի շինարարության ծրագիրը: «Ինչպես տեսնում եք, ճանապարհների շինարարության տեմպերը բավական դինամիկ են: Մինչև 2019 թվականի ավարտը մենք նախատեսում ենք ունենալ Գյումրիի պատրաստի տեղամասը: Այս փուլում նախագծային աշխատանքները շարունակվում են` Գյումրի-Բավրա հատվածը շարունբակելու ուղղությամբ, իսկ հետագայում`հարավային ուղղությամբ», - ասել է նա: Ըստ Վ. Մարտիրոսյանի, բազմաթիվ քննարկումների արդյունքում հնարավոր եղավ գալ համաձայնության ներդրողների հետ, կապված շինարարական աշխատանքների ֆինանսավորման հետ հարավային մասում: «Մոտ ապագայում մենք կհայտարարենք այդ մասին: Կարող եմ ասել, որ ներդրողը մասնավոր ընկերություն է», - ընդգծել է նա:

Մասնավորապես, նախարարը նշել է, որ ապագա առաջնահերթ ուղղություններից է լինելու ճանապարհային անվտանգության ապահովումը տարածաշրջանում, ճանապարհների և ծառայությունների թվայնացումը, սահմանային կետերի արդիականացումը, և դրանց ապահովումը ժամանակակից նորարարական չափանիշներով:

Նշենք, որ միջոցառմանը մասնակցելու համար Երևան են ժամանել «ՏՐԱՍԵԿԱ» ծրագրի մասնակից 12 երկրների բարձրաստիճան պաշտոնյաներ (այդ թվում՝ Իրանից, Վրաստանից, Ադրբեջանից), ՀՀ-ում «ՏՐԱՍԵԿԱ» անդամ-պետությունների դեսպանություններ, «ՏՐԱՍԵԿԱ» միջկառավարական հանձնաժողովի մշտական քարտուղարության ու միջազգային կազմակերպությունների ներկայացուցիչներ, ինչպես նաև Եվրահանձնաժողովի բարձրաստիճան պաշտոնյաներ։

Հիշեցնենք, որ ՏՐԱՍԵԿԱ-ն միջազգային համագործակցության ծրագիր է Եվրոպական միության և «Եվրոպա - Կովկաս – Ասիա» միջանցքի գործընկեր երկրների միջև որն ստեղծվել է 1993 թվականին, Բրյուսելի հռչակագրի հիման վրա, Հայաստանի, Վրաստանի, Ղազախստանի, Ղրղզստանի, Տաջիկստանի, Թուրքմենստանի մասնակցությամբ: Շուտով ծրագրին միացան նաև Մոլդովան, Մոնղոլիան և Ուկրաինան, 2000 թվականին`Թուրքիան, Ռումինիան և Բուլղարիան, իսկ 2009 թվականին`Իրանը: ՏՐԱՍԵԿԱ ծրագիրը բաղկացած է տարբեր ծրագրերից, որոնցից մի քանիսն արդեն ավարտվել է 2016 թվականի սկզբին: Դրանց թվում են`բոլոր տեսակի տրանսպորտային միջոցների համար տեխնիկական աջակցություն տրամադրող նախագիծը, աշխատակիցների վերապատրաստման ծրագիրը: Վերջին անգամ նիստը Հայաստանում տեղի է ունեցել 2003 թվականին: