Արմինֆո. «Պետական տուրքի մասին՚ օրենքում փոփոխությունների շրջանակներում առաջարկված նոր հարկային կարգավորումները, որոնք ենթադրում են գրավատների և տարադրամի փոխանակման կետերի համար պետական տուրքի 60-ապատիկ բարձրացում, նպատակաուղղված են շուկայից փոքր խաղացողների դուրս բերմանը:
Մարտի 14-ին լրագրողների հետ զրույցում այդ մասին հայտարարել է Երեւանում գործող գրավատներից մեկի հիմնադիր Իգիթ Իգիթյանը։ Ոլորտի ներկայացուցիչներն այսօր շարունակել են բողոքի ակցիան կառավարության շենքի մոտ։
Արդեն մեկ շաբաթ է՝ գրավատներն ու տարադրամի փոխանակման կետերն ահազանգում են. նրանք կառավարությունից պահանջում են «վետո՚ դնել փաստաթղթի վրա և թույլ չտալ, որ այն անցնի խորհրդարանում իր ներկայիս տեսքով։ Կառավարության առաջարկած օրինագծի համաձայն, գրավատների համար ներկայիս 100 հազար դրամ (մոտ 205 դոլար) պետական տուրքի փոխարեն սահմանվելու է 6 մլն դրամի նշաձող (մոտ 12,3 հազար դոլար), իսկ փոխանակման կետերի համար՝ 3 մլն դրամ (մոտ 6,1 հազար դոլար)՝ ներկայիս 50 հազարի փոխարեն (մոտ 102 դոլար): Նշվում է, որ օրինագծի ընդունումը սպառնում է ողջ երկրում գործող 140 գրավատների եւ 200 փոխանակման կետերի կեսից ավելիի փակում: Արդյունքում՝ կրճատումներ են սպասվում ավելի քան 1300 մարդու, իսկ հարկային կորուստները պետական բյուջեից կհասնեն 900 մլն դրամի (մոտ 1,8 մլն դոլար) ։ Բացի այդ, ինչպես հայտարարում են նրանք, կկրճատվեն պետական կառույցների (ՀՀ Ոստիկանություն, ֆինանսական օմբուդսմեն) և ոչ պետական կազմակերպությունների (առևտրային բանկեր, կապի օպերատորներ, ապահովագրական ընկերություններ և այլն) ֆինանսական մուտքերը, որոնք ծառայություններ են մատուցում գրավատներին և փոխանակման կետերին։ Նրանք հայտարարում են նաեւ ֆինանսական հաստատությունների նկատմամբ անհավասար եւ անարդար վերաբերմունքի մասին. պետական տուրքը առեւտրային բանկերի համար 3 մլն դրամից կաճի մինչեւ 7 մլն դրամ (2,3 անգամ աճ), վարկային հաստատությունների համար պետական տուրքը կկազմի 3 մլն դրամ նախկին 500 հազար դրամի փոխարեն (6 անգամ աճ), իսկ գրավատների եւ փոխանակման կետերի համար սպասվում է հարկային բեռի 60-ապատիկ ավելացում:
Իգիթյանի խոսքով ՝ ինքն իր բիզնեսում ներդրել է 20 մլն դրամ, ամսական եկամուտը կազմում է 800 հազար դրամ։ «Այդ գումարի հաշվին ապրում է իմ ընտանիքը եւ իմ երկու աշխատակիցների ընտանիքները, կատարվում են պարտադիր վճարների գծով վճարումներ, եւ արդյունքում իմ զուտ շահույթը կազմում է 200 հազար դրամ։ Առաջարկվող փոփոխություններն ուժի մեջ մտնելու դեպքում ստիպված կլինեմ աշխատել ամսական 300 հազար դրամի չափ վնասով՚, - հայտարարել է նա։ Իգիթյանի ասելով, հնարավոր է, օրինագծի հեղինակները սուբյեկտիվ բացասական վերաբերմունք ունեն բիզնեսի տվյալ տեսակի նկատմամբ։ «Այլ կերպ չի կարելի բացատրել այդ նախաձեռնությունը՚, - ընդգծել է նա:
«Հայաստանի գրավատների միության" նախագահ Հրանտ Նալբանդյանն, իր հերթին, նշել է, որ մեկ շաբաթվա ընթացքում ԿԲ կամ ֆինանսների նախարարության ներկայացուցիչներից ոչ ոք ցանկություն չի հայտնել լսել իրենց կամ մասնակցել կառավարությունում քննարկումներին: «Շարունակում ենք նախաձեռնության հեղինակներից պահանջել ներկայացնել պետական տուրքի բարձրացման հիմնավորված հաշվարկը։ Եթե որոշել են բարձրացնել պետական տուրքը, ապա թող հավասար վերաբերմունք ցուցաբերեն մեզ եւ առեւտրային բանկերի նկատմամբ՝ ստացված եկամուտին համապատասխան՚, - հայտարարել է նա ։
Մասնավորապես, ինչպես պարզաբանել է գրավատան աշխատակից Դավիթ Հովհաննիսյանը, առեւտրային բանկերն իրականացնում են շուրջ 20 գործառույթ, նրանց տարեկան եկամուտը կազմում է միջին հաշվով 6,5 մլրդ դրամ, իսկ գրավատների միջին ծավալի եկամուտը՝ 13 մլն դրամ: Այսպիսով, ինչպես նշել է նա, ակնհայտ է անհավասար վերաբերմունքը ֆինանսական շուկայի խաղացողների նկատմամբ։ Արդյունքում, ըստ նրա, խելամիտ կլինի չփոխել գործող կարգավորումները, որոնք սահմանվել էին տնտեսապես հիմնավորված հաշվարկի հիման վրա։
Բողոքի ակցիայի կազմակերպիչները մտադիր են իրենց առաջարկները հասցնել վարչապետ Նիկոլ Փաշինյանին: Նրանք վստահ են, որ եթե վարչապետին իրազեկեն բոլոր նրբությունների մասին, նախաձեռնությունը չի իրագործվի։