Արմինֆո. ՀՀ կրթության և գիտության նախարար Արայիկ Հարությունյանն այսօր ընդունել է Ասիական զարգացման բանկի (ԱԶԲ) տնօրենների խորհրդի անդամ Սյուրքանի Իշաք Քասիմի գլխավորած պատվիրակությանը:
Ողջունելով հյուրերին՝ նախարարը նշել է, որ վերջին ամիսներին մի շարք ուղղություններով բանկի հետ արդյունավետ համագործակցություն է ծավալվել, որի արդյունքներն արդեն առկա են: Ինչպես ԱրմԻնֆո-ին հաղորդեցին ԿԳՆ մամուլի ծառայությունից, Արայիկ Հարությունյանն իր գոհունակությունն է հայտնել, մասնավորապես, դպրոցների սեյսմիկ անվտանգության ուղղությամբ Ասիական զարգացման բանկի գործունեության կապակցությամբ: Նախարարի խոսքով՝ վերջին շրջանում ՀՀ-ում բարեփոխումներն ընթանում են մեծ թափով: «Կրթությունը, առողջապահությունը և ենթակառուցվածքներն այն հիմնասյուներն են, որոնք առաջիկա տարիներին գտնվելու են կառավարության ուշադրության կենտրոնում: Մեր ուսումնասիրությունները ցույց են տալիս, որ բոլոր ոլորտներում հապաղումների պատճառը կրթության ոլորտի բացթողումներն են եղել: Այդ պատճառով էլ ներկայում բոլոր ուղղություններով ունենք մեծ անելիքներ՝ սկսած նախադպրոցական կրթությունից մինչև գիտություն: Մեր հիմնական սկզբունքն է՝ որակյալ կրթությունը պետք է հասանելի լինի բոլորին»,-նշել է նախարարը՝ ընդգծելով, որ ՀՀ կրթական համակարգը 2015 թվականից չունի կրթության զարգացման ռազմավարություն, և նախարարությունը ձեռնամուխ է եղել դրա մշակմանը: Արայիկ Հարությունյանը նաև կարևորել է, որ բանկի ծրագրերը համընկնում են բարեփոխումների հիմնական ուղղություններին՝ ընդգծելով, որ ներկայում բանկի հետ բանակցում են 2030 թ. նպատակային թիրախների և 2025 թվականի գործողությունների ծրագրի մշակման տեխնիկական աջակցության ուղղությամբ: Նախարարը տեղեկացրել է, որ մշակվում են հանրակրթական նոր չափորոշիչներ և ուսումնական ծրագրեր՝ Ասիական զարգացման բանկից ակնկալելով աջակցություն հանրակրթության ոլորտի կառավարման հայեցակարգային ուղղությունների և ճանապարհային քարտեզի, ինչպես նաև ուսուցիչների ազգային ստանդարտների մշակման գործընթացին: «Մենք ակնկալում ենք նաև աջակցություն դպրոցների կառավարման տեղեկատվական համակարգի գործընթացում, քանի որ վիճակագրական տվյալների պակասը բարդացնում է բարեփոխումների ընթացքը»,-նշել է նախարարը՝ անդրադառնալով նաև «Բարձրագույն կրթության և գիտատեխնիկական գործունեության մասին» ՀՀ օրենքի նախագծի և գիտահետազոտական կենտրոնների հարցերին:
Ասիական զարգացման բանկի տնօրենների խորհրդի անդամ Սյուրքանի Իշաք Քասիմն անդրադարձել է ԱԶԲ-ի և ԿԳՆ-ի համագործակցությանը` նշելով, որ բանկը պատրաստակամ է աջակցել այն ծրագրերին, որոնք նպաստում են տարբեր պետությունների միջև համագործակցության և փորձի փոխանակման հնարավորությանը: Սյուրքանի Իշաք Քասիմը նաև կարևորել է ՄԿՈՒ ոլորտի բարեփոխումները՝ այն դիտարկելով որպես մարդկային կապիտալի ստեղծման, բիզնեսի և երկրի տնտեսական զարգացման գրավական:
Արայիկ Հարությունյանը, կարևորելով կրթության–աշխատաշուկա կապը, ընդգծել է, որ ՄԿՈՒ ոլորտում ծավալուն աշխատանքներ են կատարվել, մասնավորապես, բիզնեսի ներգրավման և դուալ կրթության ներդրման տեսանկյունից: «Տնտեսության զարգացման համար ՄԿՈՒ ոլորտն առանձնահատուկ նշանակություն ունի: Վերջին ամիսների ընթացքում փորձ է արվել ելակետային վիճակի բերել կրթության բոլոր ուղղությունները, որից հետո արդեն անցում ենք կատարում ռազմավարական փաստաթղթերի մշակմանը», - նշել է Արայիկ Հարությունյանը: Հանդիպման ընթացքում քննարկվել են նաև ընթացիկ այլ հարցեր:
Նշենք, որ ԱԶԲ-ն նախատեսում է Հայաստանին տրամադրել մոտ 500 մլն դոլարի ֆինանսական աջակցություն, որը կուղղորդվի ենթակառուցվածքների, էներգետիկայի եւ սոցիալական ծառայությունների աջակցությանը` երկրի ճկուն, համապարփակ եւ կայուն զարգացմանը նպաստելու համար: ԱԶԲ - ն շարունակելու է աջակցել Հյուսիս-Հարավ փոխադրամիջանցքի շինարարական աշխատանքների իրականացմանը, ինչպես նաև աղքատության բարձր մակարդակ ունեցող քաղաքների միջև տրանսպորտային կապերի ամրապնդմանը: Տարածաշրջանային համագործակցության եւ երկրի ինտեգրման համար ԱԶԲ-ն կաջակցի Հայաստանը հարեւան Վրաստանի հետ կապող ճանապարհների զարգացմանը: Բացի այդ, ԱԶԲ-ն կաջակցի աղքատության բարձր մակարդակ ունեցող քաղաքների կայուն զարգացմանը ՝ տեղական կառավարման մարմիններին օգնելով համակարգված ծրագրերի մշակման գործում և տրամադրելով ներդրումներ, որոնք անհրաժեշտ են ենթակառուցվածքների արդիականացման համար, ներառյալ ջրամատակարարումը, ինչպես նաև քաղաքային ճանապարհների և կոշտ թափոնների կառավարման ոլորտները: Հայաստանի մաշված էլեկտրաէներգետիկ ենթակառուցվածքները եւ հանքային վառելիքի ներմուծումից ուժեղ կախվածությունը թուլացնում են երկրի էներգետիկ անվտանգությունը ։ ԱԶԲ-ն կաջակցի այդ խնդրի լուծմանը ՝ աջակցելով վերականգնվող էներգիայի աղբյուրների զարգացմանը, ինչպես նաեւ էներգետիկ ենթակառուցվածքների վերականգնմանն ու արդիականացմանը:
Հայաստանը ԱԶԲ-ին միացել է 2005 թվականին եւ մտնում է խառը (արտոնյալ եւ սովորական) ֆինանսավորմամբ երկրների խմբի մեջ: ԱԶԲ-ն զբաղվում է Ասիա-խաղաղօվկիանոսյան տարածաշրջանում աղքատության կրճատման հարցերով ՝ տնտեսական աճի խթանման եւ տարածաշրջանային ինտեգրման միջոցով:
Սարգիս Խաչատրյան. Մեր գործունեությունն ուղղված է լինելու հաճախորդների փորձառության բարելավմանը
Բիզնեսի թվայնացման հիմնախնդիրը, ո՞ր հանգրվանում է Հայաստանը
Գևորգ Մանթաշյան. Բարձր տեխնոլոգիական արդյունաբերության նախարարությունը հետևողական աշխատանք է տանում Հայաստանում ստարտափների կայացման ուղղությամբ
Bank of Georgia-ն հայտարարել է 303.6 մլն դոլարով "Ամերիաբանկի" ձեռք բերման շուրջ նախնական համաձայնության մասին
Նախկին պատգամավորը՝ Հայաստանի տնտեսական իրավիճակի մասին. այն, ինչը ջուրն է բերում, ջուրն էլ տանում է