Ուրբաթ, 22 Մարտի 2019 17:44

Արմինֆո.Հայաստանի կառավարության կողմից իրականացվող տնտեսական բարեփոխումների հնարավոր ձախողման առնչությամբ Համաշխարհային բանկի (ՀԲ) կողմից նշված սոցիալ-քաղաքական ռիսկերը զրոյական են։  Արմինֆո-ի թղթակցին այդ մասին հայտարարել է Հայաստանի տնտեսական զարգացման եւ ներդրումների նախարար Տիգրան Խաչատրյանը։

 

Նշենք, որ ՀԲ-ի «Հայաստան. Փոփոխությունների հզոր մանդատ համաշխարհային տնտեսական աճի դանդաղման պայմաններում: Ձմեռ 2019՚ նոր կանխատեսման մեջ, որը հրապարակվել է մարտի 20-ին, ՀԲ փորձագետները նախազգուշացնում են. «եթե կառավարությանը չհաջողվի էական հաջողությունների հասնել, երկրում կրկին կարող է բռնկվել քաղաքական և սոցիալական լարվածություն՚:

 

Տիգրան Խաչատրյանի ասելով, ինքը նման ռիսկեր չի տեսնում, քանի որ Հայաստանի կառավարությունը իրականացնում է հետևողական քայլեր` նպատակաուղղված Հայաստանի տնտեսության աճին։

 

Այդ նախազգուշացումները, ինչպես նաեւ այն, որ Համաշխարհային բանկը եւ Արժույթի միջազգային հիմնադրամը (ԱՄՀ) ավելի զուսպ են արտահայտվել 2019 թվականի արդյունքներով Հայաստանի սպասվող տնտեսական աճի վերաբերյալ, ըստ նախարարի, բացատրվում է այն հանգամանքով, որ նրանք ավանդաբար ավելի զգույշ եւ պահպանողական են իրենց կանխատեսումներում, քան երկրների կառավարությունները: Դա, ինչպես նշել է տնտեսական զարգացման նախարարը, պայմանավորված է նրանով, որ տվյալ հեղինակավոր միջազգային կազմակերպություններն ունեն գնահատումների մեթոդաբանության որոշակի ինստիտուցիոնալ համակարգ, որը հիմնված է նախորդ ժամանակների միջին ցուցանիշների վրա: «Նրանց համար տնտեսության կառուցվածքային փոփոխությունները ազդեցությունը գնահատելը, որպես կանոն, ավելի դժվար է, քան կառավարության համար: Համապատասխանաբար, կանխատեսումները մի շարք դեպքերում տարբեր են: Եվ, այո, մենք ավելի լավատես ենք, քան իրենք՚, - հայտարարել է Տիգրան Խաչատրյանը։

 

Հիշեցնենք, որ 2019 թվականին Հայաստանի տնտեսության աճը, Համաշխարհային բանկի կանխատեսմամբ, կկազմի 4,3 տոկոս, ԱՄՀ - ն ակնկալում է 0,2 տոկոսային կետով ավելի բարձր՝ 4,5 տոկոս: Միևնույն ժամանակ, Հայաստանի կառավարությունը ակնկալում է ավելի բարձր ամփոփիչ ցուցանիշ՝ 4,9 տոկոս։  Իսկ կառավարության հնգամյա ծրագիրը հավակնում է տարեկան առնվազն 5 տոկոս ՀՆԱ-ի աճի։

 

Մինչդեռ Համաշխարհային բանկը Հայաստանի տնտեսության վիճակի մասին իր զեկույցում նշում է, որ ՀՆԱ-ի աճը կդանդաղի, սակայն կպահպանի կայուն տեմպերը: Տնտեսության վրա բացասաբար կարող են ազդել տարածաշրջանի գործընթացները և համաշխարհային տնտեսության աճի դանդաղումը։  Մասնավորապես, կնվազեն ապրանքների և ծառայությունների արտահանման ծավալները։  Զեկույցում ասվում է նաև, որ Հայաստանում տնտեսական բարեփոխումները համառ ջանքեր կպահանջեն, քանի որ այլ կերպ հնարավոր չի լինի հասնել նշանակալի արդյունքների, աշխատատեղերի ստեղծման, աշխատավարձերի բարձրացման, սոցիալական խնդիրների լուծման և երկիր ներդրումների ներգրավման:

 

Համաշխարհային բանկի փորձագետներն արձանագրում են. «չնայած սոցիալական ցուցանիշների բարելավմանը` երկրում դեռ շատ մարդիկ կան, որոնք ապրում են աղքատության մեջ։  Ընդ որում, գործազրկության մակարդակը նվազել է՝ 2018-ին հասնելով 15,7 տոկոսի։  Սա վերջին 10 տարիների լավագույն ցուցանիշն է՚:

 

ԱՄՀ-ն ավելի պահպանողական է իր սպասումներում եւ այս տարի կանխատեսում է ավելի քիչ տնտեսական աճ արտասահմանից դրամական փոխանցումների կրճատման ֆոնին, ինչը, սակայն, հիմնադրամի փորձագետների կարծիքով, կարող է փոխհատուցվել ներդրումների աճով: Հայաստանում աճի տեմպերի կանխատեսվող նվազումը, ԱՄՀ գնահատականներով, հիմնականում, պայմանավորված է արտաքին ռիսկերով, այդ թվում՝ «համաշխարհային առեւտրում լարվածության աճով, համաշխարհային ֆինանսական շուկաներում մրրկայնությամբ եւ տարածաշրջանային աշխարհաքաղաքական լարվածության աճով՚: