Արմինֆո. Բիզնես Արմենիա հիմնադրամը կազմակերպչական փոփոխություններից հետո գործում է առանց կառավարության մասնակցության և պետական բյուջեի ուղղակի ֆինանսավորման։ Ինչպես ԱրմԻնֆո-ի թղթակցին հաղորդեել են Հիմնադրամի աշխատակազմից, Բիզնես Արմենիա հիմնադրամը կազմակերպչական փոփոխությունների ենթարկվելուց հետո շարունակում է գործունեությունը՝ երկրի տնտեսական աճի խթանման հիմնական առաքելությամբ։ Հիմնադրամի գործուներությունն ուղղված է ներդրումների և արտահանման, ինչպես նաև զբոսաշրջության զարգացման խթանմանը։ ՙԲիզնես Արմենիան, ունենալով գործարարության խթանման ահռելի փորձ, ներդրողներին, արտահանողներին, զբոսաշրջության ոլորտի գործարարներին կտրամադրի ֆինանսական, իրավական, մարքեթինգային, վերլուծական, հարկային, բիզնեսի համար անհրաժեշտ այլ խորհրդատվություն և աջակցություն՚, - նշում է Հիմնադրամի աշխատակազմը։
Ներկայումս Բիզնես Արմենիա հիմնադրամի կառավարման հարցերում ՀՀ պետական ներկայացուցիչներ ընդգրկված չեն, և ծրագրերի իրականացման ժամանակ Բիզնես Արմենիա հիմնադրամը դրանք համաձայնեցնելու է ոլորտների շահառուների հետ։ Դրանց շարքին են դասվում ներդրումների ներգրավումը, արտահանման աջակցությունը, ինչպես նաև ընդլայնված /վերականգնված/ զբոսաշրջության խթանումը։ ՙՀաշվի առնելով Հայաստանի Հանրապետության վերջին ժամանակների որդեգրված սկզբունքները՝ պետական ծրագրեի իրականացման համար ֆինանսական միջոցների հատկացումը կատարվելու է մրցութային եղանակով՝ Հիմնադրամը մասնակցելու է դրամաշնորհային մրցույթներին ծրագրեի ֆինանսավորումն ապահովելու համար։ Միաժամանակ, հիմնադրամը մատուցելու է խորհրդատվական ծառայություններ, որից ստացված միջոցներն ուղղվելու են կառույցի պահպանմանը և որը շահույթ ստանալու նպատակ չի հետապնդում՚, - նշել են աշխատակազմում։
Բիզնես Արմենիա Հիմնադրամը պահպանել է իր կազմակերպա-իրավական ձևը, շարունակում է հանդես գալ որպես հիմնադրամ, գործունեությունն, ինչպես նախկինում, շահույթ ստանալու նպատակ չի հետապնդում։
Բիզնես Արմենիա հիմնադրամը շնորհակալություն է հայտնում բոլոր ներդրողներին ու արտահանողներին, իր օտարերկրյա պաշտոնական ներկայացուցիչներին, հասարակական կազմակերպություններին ու դիվանագիտական կառույցներին՝ հիմնադրամի հետ համագործակցությամբ անցած տարիների ընթացքում Հայաստանի տնտեսության զարգացմանը նպաստելու համար։ Հիմնադրամը կոչ է անում հետագա համագործակցության՝ հանուն ավելի գրավիչ Հայաստանի։» Բիզնես Արմենիա հիմնադրամի գործադիր տնօրեն է նշանակվել Արտակ Պողոսյանը, որը մինչ այդ զբաղեցնում էր նույն հիմնադրամի ֆինանսատնտեսական և իրավական տնօրենի պաշտոնը։ Հիմնադրամի գործունեության հասցեն և կոնտակտային տվյալները նույնն են։
Հիշեցնենք, որ Հայաստանի զարգացման հիմնադրամը (DFA) ստեղծվել է 2015 թվականին։ Հոգաբարձուների խորհրդի որոշմամբ 2018 թվականին Հայաստանի զարգացման հիմնադրամը վերանվանվել է Business Armenia հիմնադրամի։ Կազմակերպության գործունեությունն ուղղված էր օտարերկրյա ներդրումների ներգրավմանը, միաժամանակ նպաստելով արտահանմանը, բարելավելով գործարար միջավայրը, իրականացնելով զարգացման տարածաշրջանային ծրագրեր և զարգացնելով զբոսաշրջային ոլորտը: Business Armenia հիմնադրամն իրականացրել է նախագծեր, որոնք նախատեսում են համագործակցություն պետական մարմինների և գործարարների միջև։ 2018 թվականին ՙԲիզնես Արմենիա՚ ցանցը, որը գործում է աշխարհի 35 պետություններում, ապահովել է երկրի տնտեսության մեջ 14 մլն դոլարի ներդրումների ներգրավում:
Միաժամանակ, կառավարության 5-ամյա գործունեության ծրագրի համաձայն, նախատեսվում է ներկայումս գոյություն ունեցող ՊՈԱԿ-ների, ՓԲԸ-ների, հիմնադրամների եւ Բյուրոյի փակում ՝ պետական ծախսերն օպտիմալացնելու նպատակով: Այս տարվա փետրվարին ծրագրի հաստատումից անմիջապես հետո Հայաստանի տնտեսական զարգացման և ներդրումների նախարար Տիգրան Խաչատրյանը, պատասխանելով ԱրմԻնֆո գործակալության հարցին, հայտարարել էր, որ Business Armenia-ն չի լուծարվի, այլ կանցնի վերակազմավորման որոշակի ճանապարհ: ՙԿա կառույցի նորանշանակ ղեկավար, և տնօրենը կներկայացնի իր տեսակետները ռեսուրսների մոբիլիզացման վերաբերյալ, կհամալրի դրանք նոր մարդկանցով ու գաղափարներով՝ իր առջև ունենալով մեկ կարևոր նպատակ. բոլոր ռեսուրսները պետք է ուղղվեն ավելի մեծ ու կարևոր խնդիրների իրականացմանը՚, - ասել էր նա: