Արմինֆո.Հստակ չափորոշիչների և սխեմաների բացակայության դեպքում դժվար է գնահատական տալ հուլիսի 10-ին Հայաստանի էներգահամակարգում տեղի ունեցած վթարին։ Այդ մասին հուլիսի 15-ին մամուլի ասուլիսի ժամանակ հայտարարել է "Հայէներգո" ՓԲԸ նախկին գլխավոր տնօրեն Սպարտակ Հակոբյանը։
Հիշեցնենք, որ հուլիսի 10-ին, տեղական ժամանակով 13.16-ին, դադարեցվել էին Հրազդանի ՋԷԿ-ի հինգերորդ բլոկն ու Երեւանի ՋԷԿ-ի բլոկը։ Միջադեպի հիմնական պատճառը, ինչպես նշել են պաշտոնատար անձինք, եղել Է Իրանի էներգահամակարգում լարման տատանումը, որի հետ Հայաստանը կապված է ասինխրոն ռեժիմով: Վթարի հետեւանքով կաթվածահար էր եղել Երեւանի մետրոյի աշխատանքը, սկսվել էին ջրամատակարարման խափանումներ, խնդիրներ էին առաջացել հեռահաղորդակցային կապի եւ երթեւեկության առնչությամբ՝ լուսացույցների անգործության պատճառով: Էներգետիկ հզորությունների դեֆիցիտի փոխհատուցման նպատակով 27 ՄՎ-ն առաքվել է Վրաստանից և մոտ 150 ՄՎտ-ն ՝ Իրանից։ Մոտ 20.00 բոլոր խնդիրները լուծվել էին:
Սպարտակ Հակոբյանի խոսքով՝ դեռևս նախորդ տարի Էներգետիկայի նախարարություն էին ներկայացվել հանրապետության էներգետիկ ոլորտի ցուցանիշները, սակայն մինչ օրս պատասխան չի ստացվել։ "Մեզ չեն ասում ոչ այո, ոչ էլ ոչ, ինչը չի կարող զարմանք չառաջացնել։ Նախկինում մեր բոլոր նախաձեռնություններին կամ դրական, կամ բացասական պատասխան է ստացվել։ Մինչդեռ ցուցանիշների բացակայության դեպքում դժվար է պատկերացնել, թե ինչպես կարելի է գնահատել կատարվածը", - ասել է Հակոբյանը։ Նա հավելել է, որ նմանատիպ վթար տեղի է ունեցել 6 տարի առաջ ՝ 2013թ. նոյեմբերի 2-ին, երբ բացի Սյունիքի մարզից, երկրի մնացած բոլոր շրջանները զրկվել էին էլեկտրաէներգիայից: Դատելով ամենից ՝ այդ վթարից եզրակացություն չի արվել։ Մինչդեռ, ինչպես շարունակել է "Հայէներգոյի" նախկին ղեկավարը, էներգետիկան կենդանի օրգանիզմ է, եւ մեկ հատվածում վթարն ազդում է մյուսի վրա: Սպարտակ Հակոբյանը կոչ է արել սպասել աշխատանքային խմբի աշխատանքի արդյունքներին, որից հետո որոշակի եզրակացություններ անել: Նա հիշեցրել է, որ 1997 թվականից ի վեր հայկական էլեկտրացանցը կապված է Իրանի էլեկտրացանցին էլեկտրահաղորդման օդային գծով, սակայն այդ ժամանակ հայկական կողմի պատճառով էլեկտրահաղորդման գծերի վրա հաճախ անջատումներ էին տեղի ունենում, ինչը ստիպել է իրանական կողմին ամբողջությամբ անջատել այն: Ուժեղացված աշխատանքի արդյունքում բոլոր թերությունները վերացվել են, եւ 1998-ից էլեկտրահաղորդման գիծը կրկին աշխատել է, բայց արդեն որակապես նոր մակարդակով: "Այն ժամանակ կար էնտուզիազմ եւ ստեղծագործական մոտեցում, մենք աշխատում էինք օրական 14-16 ժամ, այսօր նկատելի է այդ ցուցանիշների նվազում", - արձանագրել է երկրի էլեկտրաէներգետիկական համակարգի օպերատորի նախկին ղեկավարը:
Նրա խոսքով, ներկայումս շարունակվում է Իրան-Հայաստան 400 կՎ էլեկտրահաղորդման գծի շինարարությունը, որի շնորհիվ երկրի էներգետիկ անվտանգությունը զգալիորեն կբարձրանա: Սակայն, նշել է Սպարտակ Հակոբյանը, ամեն դեպքում, անհրաժեշտ է մշակել եւ ներդնել երկրի էլեկտրաէներգետիկական համակարգի աշխատանքի չափանորոշիչներ ու ցուցանիշներ։
Հայկական ԱԷԿ-ի նախկին գլխավոր տնօրեն Սուրեն Ազատյանը, իր հերթին, կարևորել է տեղի ունեցածի խորը վերլուծությունը և նման վթարների կրկնությունը բացառող միջոցառումների ծրագրի մշակումը: