Արմինֆո. Սույն թվականի սեպտեմբերի 16-ին Միացյալ Թագավորություն ուսուցողական այցի շրջանակում Հայաստանի Արդյունահող ճյուղերի թափանցիկության նախաձեռնության (ԱՃԹՆ/EITI) պատվիրակությունը հյուրընկալվել է Միացյալ Թագավորության կառավարության Գործարարության, էներգետիկայի և արդյունաբերական ռազմավարության վարչությունում (BEIS Department)։ Ուսուցողական այցի հիմնական նպատակն իրական սեփականատերերի բացահայտման ՄԹ-ի առաջավոր փորձի ուսումնասիրությունն է։
Ինչպես ԱրմԻնֆո-ին հաղորդեցին ԱՃԹՆ-ից, հայկական պատվիրակության կազմում աշխատաժողովին մասնակցել են ՀՀ տարածքային կառավարման և ենթակառուցվածքների նախարարի տեղակալ, ԱՃԹՆ-ի բազմաշահառու խմբի (ԲՇԽ) անդամ Լիլիա Շուշանյանը, Հայաստանի ԱՃԹՆ-ի քարտուղարության ղեկավար Լուսինե Թովմասյանը, «Թրանսփարենսի Ինթերնեշնլ հակակոռուպցիոն կենտրոն» հասարակական կազմակերպության գործադիր տնօրեն, ԱՃԹՆ ԲՇԽ-ի անդամ Սոնա Այվազյանը, «Զանգեզուրի պղնձամոլիբդենային կոմբինատ» ՓԲԸ-ի իրավաբանական դեպարտամենտի ղեկավար, ԱՃԹՆ ԲՇԽ-ի անդամ Պերճ Խաչատրյանը, «Լիդիան Արմենիա» ՓԲԸ-ի կայուն զարգացման գծով փոխնախագահ, ԲՇԽ-ի անդամ Արմեն Ստեփանյանը, ՀՀ արդարադատության նախարարության իրավաբանական անձանց պետական ռեգիստրի գործակալության պետի տեղակալ Տաթևիկ Մկրտչյանը, ՀՀ արդարադատության նախարարության կառուցվածքային բաժիններում առանձին գործառույթների համակարգման խորհրդատու Անի Վարդերեսյանը և Երևանում Գերմանիայի միջազգային համագործակցության ընկերության (GIZ) ազգային համակարգող Գոռ Խաչատրյանը:
Կայացած աշխատաժողովի ժամանակ Հայաստանի պատվիրակությունը ՄԹ Գործարարության, էներգետիկայի և արդյունաբերական ռազմավարության վարչությունից և Ընկերությունների պալատից տեղեկացել է Միացիալ Թագավորության ընկերությունների իրական սեփականատերերի ռեգիստր հիմնելու, իրավական կարգավորումների, ռեգիստրի վարման փորձի մասին:
Աշխատաժողովին մասնակցել են ՄԹ-ի Գործարարության, էներգետիկայի և արդյունաբերական ռազմավարության վարչության տնօրենի ընկերությունների օրենքի բարեփոխումների գծով օգնական Սթիվեն Ուեբսթերը, իրական սեփականատերերի թափանցիկության քաղաքականության խորհրդատու Օլգա Բինիոնսը, Ընկերությունների պալատի նշանակալի ազդեցություն ունեցող անձանց համապատասխանության և տվյալների պաշտպանության և իրավական ապահովման բաժնի ղեկավար Լի Ռոբինսը, քաղաքականության ավագ խորհրդատու Լին Քրոսը և տեխնիկական ճարտարապետ Քրիս Մորգանը։
Աշխատաժողովի մասնակիցները ներկայացրել են Ընկերությունների պալատի՝ նշանակալի ազդեցություն ունեցող անձանց՝ իրական սեփականատերերի ռեգիստրի վարման գործառույթները, իրավական կարգավորությունները, համագործակցությունն այլ պետական գործակալությունների և հասարակական կազմակերպությունների հետ, ինչպես նաև այլ երկրների հետ համագործակցության շրջանակը։ Ներկայացվել է տեղեկատվության հավաքագրման, տվյալները հանրության համար հասանելի դարձնելու, անձնական տվյալների պաշտպանության, իրական սեփականատերերի բացահայտման պահանջների կատարման իրավական կարգավորումները։
Հայաստանի պատվիրակության անդամներն ուսումնասիրել են ՄԹ ռեգիտրի տեխնիկական բնութագրիչները, առցանց և թղթային տարբերակներով տվյալների ներկայացման գործընթացները, ներկայացված տվյալների ստուգման ներդրված պրակտիկան։ Վարչության ներկայացուցիչները ներկայացրել են նաև ընթացիկ բարեփոխումները և ոլորտում սպասվող միջազգային զարգացումները։
Հանդիպում է կայացել նաև ՄԹ ԱՃԹՆ-ի պատասխանատուներ՝ Գործարարության, էներգետիկայի և արդյունաբերական ռազմավարության վարչության ներկայացուցիչ, ՄԹ ԱՃԹՆ-ի քարտուղարության քաղաքականության հարցերով խորհրդատու Մայք Նաշի և Նավթի և Գազի գործակալության գլխավոր տնտեսագետ և ֆիսկալ վերլուծաբան Մայք Էրփի հետ։ Հայաստանյան պատվիրակության անդամները և Մեծ Բրիտանիայի ԱՃԹՆ-ի պատասխանատուները փոխանակել են ԱՃԹՆ-ի ներդրման իրենց փորձը: Ներկայացվել է մինչ այժմ երկրների կողմից իրականացված ԱՃԹՆ-ի աշխատանքները, ԱՃԹՆ-ի վավերացման ԱՃԹՆ-ի փորձը, ինչպես նաև քննարկվել են ԱՃԹՆ-ի նոր՝ ծրագրի մակարդակով հաշվետվողականության, տվյալների համակարգային բացահայտման և բնապահպանական հաշվետվողականության պահանջներ և երկրների՝ դրանց իրակացմանն ուղղված քայլերը։
Միացյալ Թագավորություն ուսուցողական այցը կազմակերպվել է Գերմանիայի միջազգային համագործակցության ընկերության կողմից իրականացվող «Աջակցություն գլոբալ Արդյունահանող ճյուղերի թափանցիկության նախաձեռնության իրականացմանը Հայաստանում, Վրաստանում և Ուկրաինայում» ծրագրի շրջանակում։