Արմինֆո. Հայաստանի տնտեսությունն աճում է բարձր տեմպերով, ասվում է Եվրասիական զարգացման բանկի ամենամսյա Մոնիտորում: Զեկույցի հեղինակները նշում են, որ տնտեսական ակտիվության ցուցանիշը 2019 թվականի օգոստոսին ավելացել է 7,6 %-ով (2019 թվականի հունվար - օգոստոս ամիսների +7,0 %): Արդյունաբերական արտադրությունն աճել է 16,8% - ով ' օգտակար հանածոների արդյունահանման ծավալների 55,0% աճի ֆոնին, ինչը, հիմնականում, բացատրվում է Թեղուտի լեռնահարստացուցիչ կոմբինատի աշխատանքի վերսկսմամբ:
Մշակող արդյունաբերության թողարկումն աճել է 10,2 %-ով՝ արտահանման ուղղվածություն ունեցող ագրոարդյունաբերական համալիրի ճյուղերի աճի պայմաններում:
Մանրածախ առեւտրի շրջանառությունն աճել է 10,1 %-ով ՝ աշխատավարձի ուժեղ դինամիկայի (+4,0 %) եւ բնակչության բանկային վարկավորման (+32,0 %) աջակցությամբ:
"Մենք ակնկալում ենք, որ երկրի ՀՆԱ-ն զգալիորեն կբարձրանա 2019 թվականի երրորդ եռամսյակում ՝ նախորդ տարվա նույն ժամանակահատվածի համեմատ գյուղատնտեսության ոլորտում ուժեղ արդյունքների ֆոնին: Մեր կանխատեսումը ենթադրում է, որ 2019 թվին ՀՀ տնտեսության աճը կկազմի 6,5 տոկոս, ընդհանուր առմամբ: Սեպտեմբերին գնաճը օգոստոսի 0,6 %-ից նվազել է մինչեւ 0,5 %: Գների ցածր աճը բացատրվում է, առաջին հերթին, պարենամթերքի արժեքի նվազեցմամբ (1,4%)՝ 2018 թվականից ավելի բարձր բերքի պայմաններում։ Կարելի է ակնկալել, որ սննդամթերքի գների կողմից ճնշումը նվազեցնող ցուցանիշը թույլ չի տա գնաճի ընդհանուր ցուցանիշի վերականգնում մինչև ՀՀ ԿԲ նպատակներին համապատասխանող մակարդակ (4+/- 1,5) 2019 թվականին՝ չնայած պարենային շուկայից դուրս գների աճի զգալի տեմպերի պահպանմանը", - նշում են Բանկի փորձագետները:
Հայաստանի կենտրոնական բանկը 2019 թվականի սեպտեմբերի 10-ին կառավարող խորհրդի նիստի արդյունքներով վերաֆինանսավորման տոկոսադրույքն իջեցրել է 0.25 տոկոսային կետով՝ մինչև 5.5 %: ՀՀ ԿԲ ղեկավարությունը նշել է երկրում գնաճի ցածր մակարդակը՝ ընդգծելով արտաքին հատվածի կողմից գնանկումային ճնշումը: Կարգավորիչն ակնկալում է գնաճի բարձրացում մինչև նպատակային մակարդակ (4+/-1,5%) 2021-2022 թթ. խթանող դրամավարկային քաղաքականության ազդեցության ներքո։
Ընթացիկ գործառնությունների հաշվի սալդոյի դեֆիցիտը 2019 թվականի II եռամսյակում կազմել է 278 մլն ԱՄՆ դոլար, գործնականում, մնալով անփոփոխ 2018 թվականի նույն ժամանակահատվածի համեմատ (274 մլն ԱՄՆ դոլար)։ Ապրանքների եւ ծառայությունների արտաքին առեւտրի վիճակի բարելավումը (արտահանման նկատելի աճի շնորհիվ) փոխհատուցել է ներդրումային եկամուտների հաշվեկշռի վատթարացումը ։ Օտարերկրյա ուղղակի ներդրումների ներհոսքը 2019 թ. II եռամսյակում աճել է մինչև 56,6 մլն ԱՄՆ դոլար (2018 թ. երկրորդ եռամսյակում 14,1 մլն ԱՄՆ դոլար), ինչը թույլ է տվել ՀՀ ԿԲ-ին 2019 թ.II եռամսյակում ավելացնել պահուստային ակտիվների ծավալը 2154,2-ից մինչև 2220,4 մլն ԱՄՆ դոլար:
Կառավարությունը հաստատել է պետական բյուջեի նախագիծը, որը նախատեսում է ավելի մեղմ ֆիսկալ քաղաքականություն 2020 թվականին: Բյուջեի ծախսերը հաջորդ տարվա համար նախատեսված են 1880 մլրդ դրամի մակարդակում, ինչը 232 մլրդ դրամով ավելի է, քան սպասվում է 2019 թ.: Նախատեսվում է իրականացնել 357 մլրդ դրամի կապիտալ ներդրումներ, ինչը 137 մլրդ դրամով ավելի է, քան 2019 թ. - ին: 2020 թ. բյուջեի դեֆիցիտը նախատեսված է 183 մլրդ դրամի չափով: