Կառավարությունն ուսումնասիրում է ԵԱՏՄ երկրների հետ տրանսպորտային հաղորդակցության բարելավման տարբեր տարբերակներ. նախարար

Արմինֆո.Կառավարությունն ուսումնասիրում է Եվրասիական տնտեսական միության երկրների հետ տրանսպորտային հաղորդակցության բարելավման տարբեր տարբերակներ, այդ թվում՝ նաև <Կովկաս նավահանգիստ> լաստանավային անցման ձեռքբերման տարբերակը: Այս մասին նոյեմբերի 8-ին տարածաշրջանային եւ եվրասիական ինտեգրման խորհրդարանական մշտական հանձնաժողովում լսումների ժամանակ հայտարարել է ՀՀ էկոնոմիկայի նախարար Տիգրան Խաչատրյանը ՝ պատասխանելով տնտեսագետ Թաթուլ Մանասերյանի հարցին ։

Տնտեսագետն առաջարկել է վերադառնալ <Կովկաս նավահանգիստ> լաստանավային անցման ձեռքբերման նախագծի քննարկմանը: <Չէր խանգարի, որ պետությունն ինքը այդ գործընթացում անմիջական մասնակցություն ունենա ՝ ստեղծելով բաց բաժնետիրական ընկերություն, որի բաժնետոմսերը կարող էին հետագայում տեղաբաշխել ներդրողների մոտ>, - ասել է Թաթուլ Մանասերյանը:  Նա նշել է, որ չնայած <Վերին Լարս> անցակետի տեխնիկական հագեցվածության ուղղությամբ ձեռնարկվող քայլերին՝ <կանաչ միջանցքների> ստեղծմանը եւ էլեկտրոնային ազդարարման համակարգի ներդրմանը՝ խնդիրը կմնա, քանի որ տարեցտարի նկատվում է բեռնափոխադրումների աճ:

Ի պատասխան՝ ՀՀ էկոնոմիկայի նախարար Տիգրան Խաչատրյանը նշել է, որ երկրի կառավարությունն ուսումնասիրում է <Վերին Լարս>-ին այլընտրանքային բոլոր հնարավոր հուսալի ուղիները ՝ արտադրանքը ԵԱՏՄ շուկաներ արտահանելու համար:

Մինչդեռ, ինչպես կարծում է տարածաշրջանային եւ եվրասիական ինտեգրման հանձնաժողովի նախագահ Միքայել Մելքումյանը, <լաստանավային> նախագծի իրականացումը մանրակրկիտ վերլուծություն է պահանջում, այդ թվում՝ փոխհատուցվելիության, լաստանավերի քանակի, բեռնվածության եւ այլնի գծով: Պատգամավորը հիշեցրել է, որ մեկ տոննա բեռի միջին արժեքը լաստանավային անցման միջոցով 10% -12% - ով գերազանցում է <Վերին Լարս> անցակետի միջոցով բեռների փոխադրման արժեքը: Բացի այդ, կպահանջվի Վրաստանի հետ միջպետական համաձայնագրի կնքում, որտեղ անհրաժեշտ կլինի հաշվի առնել նաեւ Փոթիի նավահանգստում տերմինալի առկայությունը: <Բայց քննարկել այդ հնարավորությունը անհրաժեշտ է>, - փաստել է պատգամավորը ՝ հիշեցնելով, որ Ցխինվալի եւ Բաթումի լոգիստիկ հնարավորությունները քաղաքական չկարգավորվածության պատճառով դեռ երկար ժամանակ փակ կլինեն հայ արտահանողների համար:

Նշենք, որ ըստ ԱրմԻնֆո-ի տվյալների, միայն վերջին մեկ տարում <Վերին Լարս> անցակետով անցել է 12 հազար բեռնատար, այդ թվում՝ Հայաստանից: Հաշվի առնելով այն հանգամանքը, որ անցակետը անբարենպաստ եղանակային պայմանների պատճառով տարեկան առնվազն 40 օր չի գործում, կարելի է եզրակացնել, որ ամեն ժամ անցակետում 650 մեքենա է սպասարկվում: Ստեփանծմինդա (Վրաստան) - Վերին Լարս (Ռուսաստան) մայրուղով անցնում է Հայաստանից Ռուսաստան տանող միակ ցամաքային երթուղին: Վրացական կողմը մտադիր է մինչեւ տարեվերջ ձեռնամուխ լինել Ռուսաստանի սահմաններ տանող նոր ճանապարհի կառուցմանը: Այդ նպատակով Ասիական զարգացման բանկը (ABB) Վրաստանին 415 մլն դոլարի վարկ է տրամադրել 23 - կիլոմետրանոց շրջանցիկ ճանապարհը կանցնի Քվեշեթի-Կոբի երթուղով, որը Հյուսիս-Հարավ տարանցիկ միջանցքի մաս է կազմում: Նախագծի ավարտից հետո տարանցիկ հաղորդակցությունը հնարավոր կդառնա տարվա ցանկացած ժամանակ