Հինգշաբթի, 6 Մայիսի 2010 17:18
Byblos Bank Armenia-ն ընթանում է բանկային ծառայությունների պահանջարկի ոգով
ԱրմԻնֆո. ԱրմԻնֆո. Byblos Bank Armenia-ի Ֆինանսների և վարչարարության Դեպարտամենտի ղեկավար Հայկ Ստեփանյանի հարցազրույցը ԱրմԻնֆո գործակալությանը
ԻՆչպե՞ս կարող եք բնութագրել 2010 թվականի առաջին եռամսյակը Ձեր բանկի համար
Ընդհանուր առմամբ, 2009 թվականի վերջին եռամսյակի համամատ տարին բավականին հաջող սկսվեց` ինչպես մանրածախ, այնպես էլ կորպորատիվ բիզնեսի գծով, ինչը կապված էր երկրի տնտեսության ակտիվացման հետ: Առաջին եռամսյակում, մեր բանկը կարողացավ ներգրավել մի քանի խոշոր կորպորատիվ հաճախորդների, որի արդյունքում բանկի ակտիվներն աճեցին մոտ 30%-ով, հասնելով 22 մլրդ.դրամի, իսկ վարկային պորտֆելն աճեց 25%-ով, հասնելով 15 մլրդ.դրամի: Մենք մտադիր ենք ընթացիկ տարվա ընթացքում շարունակել աճի տեմպերը, ապահովելով վարկային պորտֆելի կրկնակի աճ, ստանալ շահույթ, ինչպես նաև ընդլայնել մասնաճյուղերի ցանցը: Ընդ որում, սեփական միջոցներից բացի, նշված նպատակներին կուղղվեն նաև միջազգային կառույցների ռեսուրսները, որոնց հետ ներկայումս բանակցում ենք և առաջին վարկային պայմանագրերի ստորագրումը նախատեսվում է ընթացիկ տարվա առաջին կիսամյակում: Յուրաքանչյուր ծրագրով նախատեսում ենք ներգրավել մոտ 10 մլն.դոլար` փոքր և միջին բիզնեսի ֆինանսավորման նպատակով:
Byblos Bank Armenia-ն առաջինն էր Հայաստանում, որն օգտվեց Եվրոբանկի սինթետիկ վարկերից: Միջոցներն արդեն ստացե՞լ եք
Ընթացիկ տարվա մարտին Վերակառուցման և զարգացման եվրոպական բանկի (EBRD) հետ 10 մլն.դոլարի վարկի պայմանագիր ստորագրեցինք, որը Հայաստանում EBRD-ի ֆինանսական պատմության մեջ առաջին անգամ ներառում է նաև տեղական ազգային արժույթի բաղադրիչը: EBRD վարկային ծրագիրը, որը նախատեսված է մասնավոր ձեռնարկությունների վարկավորման համար, իր մեջ ներառում է 5 մլն.դոլարին համարժեք հայկական դրամի սինթետիկ վարկ, որը կօգտագործվի տեղական բիզնեսի և շրջանառու կապիտալի ֆինանսավորման ուղղությամբ: Իսկ լրացուցիչ 5 մլն.դոլարը կուղղվի մեր բանկի ավելի խոշոր վարկերի համաֆինանսավորմանը: Սա շատ կարևոր փորձ է Հայաստանի համար, ինչը կարող է օգտագործվել նաև հետագայում, հատկապես ՓՄՁ վարկավորման ընթացքում: Սինթետիկ վարկը, որը կտրամադրվի մեկ տրանշով, մենք սպասում ենք ստանալ մայիսին: Ազգային արժույթով ստացված սինթետիկ վարկը թույլ կտա նվազեցնել արտարժութային ռիսկերը, ավելացնել ազգային արժույթով վարկավորման ժամկետները, միաժամանակ մեծացնելով դրամային վարկերի պորտֆելը:
Սակայն Եվրոբանկի կողմից արտարժութային ռիսկերի հեջացումը կարող է բարձրացնել փողերի գինը: Ինչպիսի՞ արդյունավետությամբ դրանք կարող են տեղաբաշխվել հայկական շուկայում: Եվ ինչպիսի՞ն են բանկի տոկոսադրույքներն այսօր
Գաղտնիք չէ, որ այսօր շուկայում ՀՀ դրամով ռեսուրսներն ավելի թանկ են, քան արտարժույթով ռեսուրսները, որոնք բանկային համակարգը սովորաբար ստանում է միջազգային կառույցներից, իր վրա վերցնելով բոլոր ռիսկերը: Սինթետիկ վարկերի պարագայում արտարժութային ռիսկերն իր վրա է վերցնում Եվրոբանկի կողմից ընտրված հատուկ Հեջ-ֆոնդը, սակայն դժվար թե կարելի է ասել, որ վարկառուների կողմից դրամով ստացված այդ փողերի գինը կարող է էապես տարբերվել շուկայականից: Տարբերություն, անպայման, կլինի, սակայն այդ վարկերը վարկառուներին ձեռնտու են տարբեր նկատառումներով, իսկ հիմնականում, մարման ժամկետներով (3.5 տարի): Հավատացեք, այսօր Հայաստանում արդեն կա ձեռնարկությունների այն հատվածը, որը լիովին պատրաստ է օգտվել այդ միջոցներից:
Այսօր մեր բանկում դրույքները միջնաժամկետ են: Վարկերը տրամադրում ենք 14-18% սահմաններում, կախված վարկի տեսակից, ընդ որում, դրամով ավանդներն ընդունվում են տարեկան 8% դրույքով, իսկ արտարժույթով ավանդները` 7% դրույքով:
Բանկը նախատեսել էր ակտիվացնել ոչ տոկոսային եկամուտների աղբյուրները: Ինչպիսի՞ քայլեր են այսօր ձեռնարկվում այդ ուղղությամբ
Բանկի հաճախորդների թիվը օրեցօր աճում է, այդ թվում նաև մեր կողմից տրամադրվող քարտային ծառայությունների հաշվին, որոնք ապահովում են ոչ տոկոսային եկամուտներ:
Կուզենայի նշել, որ այսօր մենք ակտիվորեն աշխատում ենք արտասահմանյան ֆիզիկական անձանց հետ, այն երկրների, որտեղ ներկայացված է մեր բաժնետերը` Byblos Bank SAL-ը: Դրանք և արաբական, և եվրոպական երկրներ են: Այդ հաճախորդների հետ առայժմ աշխատում ենք միայն ավանդների ներգրավման գծով, որոնց պորտֆելը ապրիլի 1-ի դրությամբ կազմել է 6.6 մլրդ.դրամ (որտեղ 5.2 մլրդ.դրամը` ժամկետային ավանդներ են), 150% տարեկան աճով: Սակայն մեր օտարերկրյա հաճախորդների համար մտադիր ենք շուտով գործարկել նրանց համար հատուկ պատրաստված պրոդուկտներ:
Միջազգային ֆինանսական կորպոռացիան (IFC) դարձել է Byblos Bank SAL-ի փայատեր: Ի՞նչ ձևով դա կանդրադառնա Byblos Bank Armenia-ի վրա` այդ կառույցի ծրագրերին մասնակցելու առումով
IFC-ի կողմից Byblos Bank SALի կապիտալում մասնաբաժին ունենալը վկայում է խոշոր միջազգային կառույցների կողմից մեր բաժնետիրոջ նկատմամբ ունեցած հետաքրքրության մասին: Դեռ վաղ է խոսել Byblos Bank Armenia-ի գործունեության վրա այդ փաստի ազդեցության մասին, սակայն ապագայում IFC հետ անմիջական համագործակցությունը չի բացառվում:
Հարցազրույցը վարեց Լիլիթ Ասլանյանը
ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ
Հայաստանում ՊԲԱ-ն պետական մարմինների ներխուժում է մասնավոր դաշտ եւ հերթական հարկ՝ նոր անվանակոչմամբ․ փորձագետ
Աշխատում էին համապարփակ բժշկական ապահովագրության վրա, ստացան՝ համընդհանուր։ Հայաստանը շուկայական տնտեսության մոդելից լայնածավալ հետքայլ է կատարում դեպի վարչահրամայական տնտեսություն. Հայկազ Ֆանյան
Մարիամ Համբարձումյան. Հայաստանի կրթական համակարգն առայժմ չի կարողացել անցնել այն տրանսֆորմացիան, որն այսօր անհրաժեշտ է բիզնեսի համար
Շաքարի ներմուծումը Հայաստան 2025թ. առաջին կիսամյակում կրճատվել է 66%-ով
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները