Չորեքշաբթի, 14 Հուլիսի 2010 15:56

Anelik համակարգը պատրաստվում է դուրս գալ Մերձավոր Արևելք

ԱրմԻնֆո. «Անելիք Բանկի» Վարչության նախագահի տեղակալ Բագրատ Չզմաչյանի հարցազրույցը ԱրմԻնֆո գործակալությանը

Պրն.Չզմաչյան, ընթացիկ տարվա առաջին ամիսներին Հայաստանի տրանսֆերտների շուկան իրեն դրսևորեց խոստումնալից ձևով: Սակայն, ինչպես վկայում են վերջին ցուցանիշները, այդ սպասումներն այնքան էլ չեն արդարանում: Իսկ ինչպե՞ս են գործերը Anelik համակարգում:

Anelik համակարգով այս տարի աճի դինամիկան նկատվում է մշտապես, չնայած որ տեմպերը զիջում են մեր սպասելիքներին: Եթե առաջին եռամսյակում համակարգի շրջանառությունը աճեց 15%, ապա երկրորդ եռամսյակում «կողմնակի երևույթների» պատճառով աճի տեմպերը դանդաղեցին: Մասնավորապես, դա հիմնականում կապված էր Ղըրղըզստանի դեպքերի հետ, որտեղ, մեր հաշվարկներով, համակարգի շրջանառությունը պակասեց մոտ 40 մլն.դոլարով: Արդյունքում, ընթացիկ տարվա առաջին կիսամյակում Anelik համակարգի շրջանառությունն աճեց 10%-450%: Իմ կարծիքով, երրորդ եռամսյակում կտրուկ ցնցումների սպասել չարժե, սակայն տարեվերջին Anelik համակարգի շրջանառությունն էապես կաճի:

Քանակական առումով առանձնակի փոփոխություններ չեն դիտվում: Այսպես, այս տարվա վեց ամիսներին Anelik համակարգով իրականացվել է 600 հազ. դրամական փոխանցում, դա համարյա այնքան է, ինչքան նախորդ տարվա նույն ժամանակահատվածում, իսկ մեկ փոխանցման միջին չափերը կազմել է 750 դոլար: Ի դեպ, կոմիսիոն վճարները շուկայում ամենափոքրներից են` 0.5-0.8%, կախված փոխանցումների գումարից և ուղղությունից, մասնավորապես, դա այն դեպքում, երբ փոխանցումն ուղարկվում է մեր դուստր բանկից դեպի Անելիք Բանկի մասնաճյուղեր:

Ինչպիսի՞ն է Հայաստանի բաժինը Anelik համակարգի ընդհանուր շրջանառությունում:

Վերջին տարիներին Հայաստանը շարունակում է ապահովել Anelik համակարգի շրջանառության 10%-ը: Ընդ որում, Հայաստանում փոխանցումների միջին աճը գերազանցում է համակարգի տեմպերի աճն ընդհանրապես: Առաջին կիսամյակում Anelik համակարգի շրջանառությունը Հայաստանում, նախորդ տարվա նույն ժամանակահտվածի համեմատ աճել է 18%, հասնելով 45 մլն.դոլարի, այդ թվում, Հայաստանից դուրս եկող փոխանցումները կազմել են 6.1 մլն.դոլար, 49% տարեկան աճով: Anelik համակարգի միջոցով տրանսֆերտների քանակը Հայաստանում կազմում է 60000 փոխանցում:

Հետաքրքիր է, որ այս տարի էապես աճել են ռուսական ռուբլիով փոխանցումները: Եթե 2009 թվականի առաջին կիսամյակում ռուսական ռուբլիով փոխանցումները կազմում էին 15 մլն.ռուբլի, ապա ընթացիկ տարվա հունվար-հունիս ամիսներին դրանք արդեն հասել են 45 մլն.դոլարի: Դա բացատրվում է նրանով, որ Ռուսաստանից գալիս են մեծ թվով փոխանցումներ, որ շատ հաճախորդներ այժմ գերադասում են տարադրամը չփոխանակել, այլ միանգամից ուղարկել ռուբլիով, մանավանդ, որ Anelik համակարգը նրանց տալիս է այդ հնարավորությունը:

Արդեն մեկ տարի է, որ Անելիք Բանկն ունի նոր մաժորիտար բաժնետեր, ի դեմս լիբանանյան CreditBank-ի, որը նախատեսել է ընդլայնել Anelik համակարգի աշխարհագրությունը Մերձավոր Արևելքում: Արվե՞լ են արդյոք որոշակի քայլեր այդ ուղղությամբ:

Ելնելով նրանից, որ դրամական փոխանցումների սեփական համակարգն ունենալը լիբանանյան CreditBank-համար մի նոր փորձ է, նախապես, նրանց խնդրանքով մենք անցկացրեցինք համակարգի տեխնիկական աուդիտ, որպեսզի համոզվենք դրա բացարձակ անվտանգության մեջ: Ընթացիկ տարվա առաջին եռամսյակում KPMG ռուսական ներկայացուցչության կողմից աուդիտի անցկացումից հետո CreditBank-ը դարձավ Anelik համակարգի անդամ: Ներկայումս լուծվում են տեխնիկական բնույթի հարցեր և, իմ կարծիքով, երրորդ եռամսյակում Anelik համակարգը կսկսի դեպի Լիբանան իրականացնել դրամական փոխանցումներ: Ի դեպ, ինչպես խոստացել են մեր բաժնետերերը, հետագայում համակարգի աշխարհագրությունը կտարածվի ողջ Մերձավոր Արևելքի վրա: Հուսով ենք, որ մինչև տարեվերջ ակնհայտ կդառնա համակարգի գործունեության պատկերը Լիբանանում, չնայած այս ուղղությունում կտրուկ աճի մենք չենք դեռ սպասում, քանի որ հարկավոր է դեռ «փորձարկել» համակարգը: Չնայած, որ Լիբանանում ապրում է հայկական մեծ համայնք, այնուամենայնիվ, մեզ համար ավելի գերադասելի կլիներ համակարգի զարգացումn իրականացնել ոչ միայն Հայաստան հոսող տրանսֆերտներով, այլ ավելի լայն առումով` Մենձավոր Արևելքի երկրների միջև: Չէ՞ որ հայտնի է, որ այդ երկրներում գործում են դրամական փոխանցումների տարբեր համակարգեր, որոնց կոմիսիոն վճարներն ավելի բարձր են, քան Anelik համակարգի կողմից առաջարկվող կոմիսիոն վճարները:

Պրն.Չզմաչյան, ինչպես է Անելիք Բանկն աշխատում իր նոր բաժնետերերի հետ ճգնաժամային առաջին ալիքից հետո, մասնավորապես, վարկային շուկայում:

Վարկավորման մասով մեզ մոտ նկատվում է դրական դինամիկա: Անելիք Բանկի վարկային պորտֆելը տարեսկզբից աճել է 8%-ով, հասնելով 26.2 մլրդ.դրամի, անցնելով բանկի ակտիվների ավելի քան 51%-ից, որոնք հուլիսի 1-ի դրությամբ կազմում են 51 մլրդ. դրամ: Ներկայումս մենք իրականացնում ենք ակտիվ վարկավորման քաղաքականություն, ընդ որում, ժամկետից շուտ մարումներն իրենց հիշեցնել չեն տալիս: Վարկավորման ոլորտում հիմնական շեշտը մենք դնում ենք փոքր և միջին բիզնեսի վրա, իսկ վերջերս, CreditBank-ի հետ համատեղ 8 մլն.դոլարի մեկ խոշոր վարկ տրամադրեցինք` լայն դիապազոն ունեցող մի ընկերության: Մենք չենք պատրաստվում սահմանափակվել այդքանով, հետևաբար այսօր քննարկում ենք վարկային նոր հայտեր: Նախատեսում ենք մինչև տարեվերջ վարկային պորտֆելը հասցնել 35 մլրդ.դրամի: Ընդ որում, այդ մակարդակը կապահովվի ոչ միայն սեփական միջոցների, այլ նաև միջազգային ֆինանսական կազմակերպությունների կողմից սպասվող ռեսուրսների հաշվին, որոնց հետ ներկայումս տեղի են ունենում ինտենսիվ բանակցություններ: Խոսքը գնում է ռեսուրսների ներգրավման մասին, ինչպես ՓՄՁ, այնպես էլ էներգետիկ ոլորտներում:

Ինչպիսի՞ն էր իրավիճակն առաջին կիսամյակում, կապված տեղական շուկայից ռեսուրսների ներգրավման հետ:

Առաջին կիսամյակում Անելիք Բանկը 17%-ով ավելացրեց ժամկետային ավանդների պորտֆելը, հասցնելով 9.8 մլրդ.դրամի: Ի դեպ, այստեղ 90% կազմում են դոլարային ավանդները, իսկ աննշան դրամային ավանդները պատկանում են իրավաբանական անձանց: Սա վկայում է դրամի նկատմամբ դեռևս թույլ վստահության մասին:

Շուկայում նկատվում է դոլարային ռեսուրսների տոկոսադրույքների իջեցում: Ինչպիսի՞ն են այսօր տոկոսադրույքներն Անելիք Բանկում:

Իջեցումը նկատվում է միայն դոլարային տոկոսադրույքների համար: Դրամային ռեսուրսների տոկոսադրույքների իջեցման մասին այսօր խոսք անգամ լինել չի կարող, հաշվի առնելով, որ ԿԲ վերանայել է պարտադիր պահուստավորման նորմատիվը: Դրա հետևանքով շուկայից բանկ են հոսում ավելի ու ավելի շատ դոլարային ռեսուրսներ, բերելով պասիվային դոլարային մասի աճի, միևնույն ժամանակ աճում է նաև դրամային ռեսուրսների ծանրաբեռնվածությունը: Այսպես, եթե մինչև պարտադի պահուստավորման նորմատիվի վերանայումը մեր բանկը ԿԲ-ում պահուստավորում էր 400 մլն.դրամ, ապա այժմ` ավելի քան 1 մլրդ.դրամ: Նման պայմաններում դրամային ռեսուրսների տոկոսադրույքների իջեցման ոչ մի նախադրյալ չեմ տեսնում: Այսօր մենք դրամային ավանդները ներգրավում ենք տարեկան 12%-ով, իսկ դոլարային ավանդները` տարեկան 9%-ով, իսկ վարկերի միջին տոկոսադրույքը կազմում է տարեկան 16%:

Անելիք Բանկը առաջինն էր շուկայում, որը համագործակցում էր միանգամից երեք վճարային համակարգերի հետ` ArCa, Visa և MasterCard: Ներկայումս բանկը վարկավորո՞ւմ է պլաստիկ քարտերով:

Մենք հիմնականում վարկավորում ենք աշխատավարձային նախագծերի հաճախորդներին, այդ թվում, վարկեր ենք տրամադրում նաև VIP-հաճախորդներին, որոնք երկար տարիներ սպասարկվել են մեր բանկում: Ներկայումս Անելիք Բանկի կողմից թողարկված ակտիվ քարտերի քանակը կազմում է 32000, իսկ տարեսկզբից աճը կազմել է 10%: Օրերս մենք պայմանագրեր ենք ստորագրել առևտրի և սպասարկման տարբեր կետերի հետ, որտեղ մեր բանկի քարտապանները կարող են ստանալ 10-30% զեղչեր: Իսկ շուտով կթողարկվեն բուկլետներ, որտեղ կնշվեն առևտրի և սպասարկման կետերի մեր գործընկերների ամբողջական անվանումները:

Պրն. Չզմաչյան, ե՞րբ է պատրաստվում գլխամասային գրասենյալը տեղափոխվել նոր գրասենյակ:

Մենք պատրաստվում ենք գլխամասային նոր գրասենյակում սկսել մեր գործունեությունը այս տարվա դեկտեմբերին, ներկայումս այնտեղ ակտիվորեն իրականացվում են վերանորոգման աշխատանքներ: Բացի այդ, մինչև տարեվերջ մենք կունենանք մի նոր մասնաճյուղ ևս, իսկ 2011 թվականին մտադիր ենք բացել էլի 2-3 մասնաճյուղ, որոնցից մեկը Սևան քաղաքում:

Ինչպիսի՞ մաքուր շահույթ է Անելիք Բանկն ապահովել 2010 թվականի առաջին կիսամյակում:

Երկրորդ եռամսյակում Անելիք Բանկն ապահովել է նշանակալից շահույթ: Այսպես, եթե ընթացիկ տարվա առաջին եռամսյակի արդյունքներով բանկի մաքուր շահույթը կազմել է 40 մլն.դրամ, ապա առաջին կիսամյակի ավարտին այն կազմեց 267 մլն.դրամ:

ԱրմԻնֆո

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ

RUB	4.72	-0.01
USD	382.61	0.07
EUR	442.37	0.54
GBP	503.51	2.11
CAD	272.92	1.86
JPY	24.82	-0.13
CNY	53.74	0.02
CHF	474.64	0.73

Նորություններ

Anelik համակարգը պատրաստվում է դուրս գալ Մերձավոր Արևելք