Ուրբաթ, 27 Օգոստոսի 2010 11:40
IFC-ն համագործակցում է ՙԻնեկոբանկի՚ հետ Հայաստանում առևտրի ֆինանսավորումն ընդլայնելու նպատակով
ԱրմԻնֆո. Համաշխարհային բանկի խմբի անդամ IFC-ն այսօր ՙԻնեկոբանկի՚ հետ ստորագրել է պայմանագիր` ընդլայնելու առևտրի ֆինանսավորումը Հայաստանի փոքր և միջին ձեռնարկությունների համար: Մասնավորապես, IFC-ի գործադիր փոխնախագահ և գլխավոր տնօրեն Լարս Թանելը և ՙԻնեկոբանկի՚ գործադիր տնօրեն Ավետիս Բալոյանը ստորագրել են 2 մլն.դոլարի պայմանագիր, որը բանկին հնարավորություն կտա տրամադրել առևտրի ֆինանսավորման ավելի լավ լուծումներ իր ներկրող և արտահանող հաճախորդներին և ընդլայնել առևտրի ֆինանսավորման իր գործառնությունները: Համաձայն պայմանագրի, IFC-ն իր ՙԱռևտրի համաշխարհային ֆինանսավորման ծրագրի՚ միջոցով երաշխավորելու է առևտրի` ՙԻնեկոբանկի՚ կողմից ֆինանսավորված առանձին գործարքները:
ՙԱռևտուրը տնտեսական զարգացման անկյունաքարն է՚, ասել է Լ.Թանելը պայմանագրի ստորագրման ժամանակ: ՙՈրպես երկարաժամկետ գործընկերներ և բաժնետերեր, մեզ ուրախացնում է այն, որ առևտրի ֆինանսավորման աջակցությամբ մտնում ենք ՙԻնեկոբանկի՚ հետ համագործակցության մեկ այլ փուլ: Դա շահավետ կլինի և’ բանկի, և’ նրա հաճախորդների համար, ներառյալ` փոքր և միջին ձեռնարկությունները՚: Միաժամանակ նա նշել է, որ 2010 թվականի հունիսի 30-ի դրությամբ IFC ներդրումների ընդհանուր ծավալները Հայաստանում, տարվա կտրվածքով աճել են, հասնելով ռեկորդային` 35.3 մլն.դոլարի:
Ինչպես ԱրմԻնֆո գործակալության թղթակցի հետ զրույցւմ նշել է Ա.Բալոյանը, IFC-ի համագործակցությունը ՙԻնեկոբանկի՚ հետ սկիզբ է առել 2006թ.: Այդ ժամանակվանից ի վեր IFC-ն բազմաթիվ անգամ բանկին տրամադրել է ֆինանսավորում: Տարեսկզբին IFC-ն օգնել է բանկին մեծացնելու վերջինիս միկրովարկերի տրամադրման կարողությունները կատարողականի վրա հիմնված դրամաշնորհային ծրագրի միջոցով, որը հնարավոր է դարձնում եռամյա ժամանակահատվածում տրամադրելու ավելի քան 71,000 նոր միկորվարկեր անհատներին և փոքր ձեռնարկատերերին, հիմնականում Հայաստանի գյուղական շրջաններում:
ՙՄենք երախտապարտ ենք IFC-ի կայուն գործընկերության և շարունակական աջակցության համար՚, ասել է Ա.Բալոյանն արարողության ժամանակ: ՙIFC-ի ՙԱռևտրի համաշխարհային ֆինանսավորման ծրագիրը՚ մեզ կօգնի էլ ավելի զարգացնելու առևտրի ֆինանսավորմանն ուղղված մեր աշխատանքները` առաջարկելով առավել մրցակցային պայմաններ մեր հաճախորդներին և ընդլայնելով մեր միջազգային կապերը ծրագրին մասնակցող գործընկեր բանկերի համաշխարհային ցանցի միջոցով՚,-ավելացրել է նա: Միաժամանակ նա նշել է, որ բանկը նախատեսում է նոր պայմանագրեր կնքել մեկ-երկու եվրոպական կազմակերպությունների հետ, որոնցից յուրաքանչյուրից սպասվում է 10-15 մլն.դոլար: ՙՄինչև տարեվերջ նախծատեսում ենք ներգրավել մինչև 30 մլն. դոլարի վարկային ռեսուրսներ, որոնք կուղղվեն ՓՄՁ զարգացմանը՚,-ավելացրել է նա:
Նշենք, որ Հայաստանը դարձել է IFC-ի անդամ և բաժնետեր 1995թ.: IFC-ն տարիներ շարունակ ակտիվ գործունեություն է իրականացրել երկրում` տնտեսության մի շարք ոլորտներում ներդնելով 87 մլն ԱՄՆ դոլար 18 ծրագրերի մեջ: Ի լրումն իր ներդրումային գործունեության, IFC-ն Հայաստանում իրականացնում է նաև ակտիվ խորհրդատվական ծրագրիր` ուղղված բանկային համակարգի զարգացմանը, կայուն էներգետիկայի ֆինանսավորմանը և ներդրումային միջավայրի բարելավմանը:
Հանքարդյունաբերությունը շարունակում է մնալ Հայաստանի մարզերի սոցիալական հենարանը. հետազոտություն
Հայաստանում ՊԲԱ-ն պետական մարմինների ներխուժում է մասնավոր դաշտ եւ հերթական հարկ՝ նոր անվանակոչմամբ․ փորձագետ
Շաքարի ներմուծումը Հայաստան 2025թ. առաջին կիսամյակում կրճատվել է 66%-ով
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները