Ուրբաթ, 29 Ապրիլի 2011 12:20
Գրավիչ պայմաններով բանկերի ներգրավումը գյուղվարկավորմանը դրականորեն կանդրադառնա Հայաստանի գյուղատնտեսական ոլորտի վրա
Արմինֆո. Գրավիչ պայմաններով բանկերի ներգրավումը գյուղվարկավորմանը դրականորեն կանդրադառնա Հայաստանի գյուղատնտեսական ոլորտի վրա: Նման կարծիք է արտահայտել ՀՀ Նախագահ Սերժ Սարգսյանը այսօր ՀՀ Կենտրոնական բանկում կայացած խորհրդակցությունում:
Հանրապետության ղեկավարը նշել է, որ բանկերի ղեկավարների հետ այսօրվա հանդիպումը նախատեսել էր Հայաստանի տնտեսության զարգացման գերակայությունների մասին իր տնտեսական թիմի հետ խորհրդակցությունից հետո: Նախագահի խոսքով, խորհրդակցության ժամանակ քննարկվել են նաև բանկային համակարգի հետ կապված հարցեր, ընդունվել են որոշումներ, որոնց կատարման ընթացքի մասին Կենտրոնական բանկի նախագահն ամեն շաբաթ զեկուցում է: Սերժ Սարգսյանն առաջարկել է այսօրվա հանդիպման ժամանակ անդրադառնալ այդ աշխատանքների իրականացման ընթացքում առաջացած խնդիրներին, քննարկել դրանց ընթացքն արագացնելու ուղղությամբ համատեղ անելիքները:
Նշելով, որ հանքարդյունաբերության ոլորտում գործունեություն ծավալող խոշոր ընկերությունների ղեկավարների հետ երեկ ունեցած իր հանդիպման ժամանակ անդրադարձ է եղել նաև հարկային, մաքսային համակարգում տեղի ունեցող փոփոխություններին, Նախագահ Սարգսյանը կարևորել է բարեփոխումների այդ ծրագրի, ինչպես նաև մակրոտնտեսական ցուցանիշների ու գնաճի հետ կապված հարցերը բանկային համակարգի ներկայացուցիչների հետ ևս քննարկելը: Խորհրդակցության մասնակիցները մտքեր են փոխանակել նաև բանկային համակարգի, պետության և մասնավոր տնտեսությունների միջև համագործակցության ու առկա խնդիրների մասին, որոնց լուծման ուղղությամբ առևտրային բանկերի ղեկավարները ներկայացրել են իրենց մոտեցումներն ու առաջարկությունները:
Անդրադառնալով գյուղատնտեսության վարկավորման ուղղությամբ իրականացվող աշխատանքին` Նախագահ Սարգսյանը նշել է, որ այդ բնագավառում բանկային համակարգի ներգրավվածությունը և վարկավորման բարենպաստ պայմանները չեն կարող իրենց դրական ազդեցությունը չունենալ ոլորտի վրա:
ՙԿարծում եմ, որ մենք շարունակելու ենք այս ուղղությամբ միջոցառումները: Ուղղակի, խնդրում եմ և՛ Կենտրոնական բանկի նախագահին, և՛ ձեզ բոլորիդ, որ այս հարցում լինենք խիստ սկզբունքային և անենք ամեն ինչ, որպեսզի վարկային միջոցները ոչ միայն հասնեն գյուղացիական տնտեսություններին, այլ օգտագործվեն նպատակային` հենց գյուղատնտեսական աշխատանքների համար: Ստեղծվող բարենպաստ պայմանները նրա համար են, որպեսզի գյուղատնտեսական արտադրանքն ավելանա, հողը մշակվի, որպեսզի գյուղացին աշխատի և բարձր եկամուտ ստանա: Մեր խնդիրն է` խթանել գյուղատնտեսական արտադրանքը՚,-ասել է Նախագահը:
Խոսելով մակրոտնտեսական ցուցանիշների և գնաճի զսպման մասին` Հանրապետության ղեկավարն ընդգծել է, որ ոչ միայն ֆինանսական հատվածի կողմից, այլ նաև մնացած գործիքներն օգտագործելով իրականացվող համալիր միջոցառումների շնորհիվ առաջիկա ամիսներին արդեն հնարավոր կլինի որոշակի արդյունքների հասնել և տեսանելի ցուցանիշներ ունենալ:
ՙԵս չեմ փոխել իմ կարծիքը և համարում եմ, որ մեր բանկերն իրենց վարկային քաղաքականությամբ փոքր, միջին, ինչու ոչ՝ նաև խոշոր տնտեսություններին տրվող վարկերով կարող են էապես ազդել մեր տնտեսական քաղաքականության վրա: Կարծում եմ, որ այստեղ էլ շահը երկկողմանի է, նույնիսկ եռակողմ` բանկային համակարգ, մասնավոր տնտեսություններ և պետություն: Երեկ հնարավորություն եմ ունեցել մանրամասնորեն ծանոթանալու բանկային համակարգի ցուցանիշներին: Առաջին եռամսյակի ցուցանիշները շատ ոգևորիչ են: Այս զարգացումները պետք է շարունակենք, և մենք՝ որպես պետություն, մշտապես փորձելու ենք խթաններ գտնել այդ զարգացման համար՚,-ընդգծել է Նախագահ Սարգսյանը:
Խորհրդակցության ժամանակ ՀՀ կենտրոնական բանկի նախագահ Արթուր Ջավադյանը ներկայացրել է բանկային համակարգի զարգացումները, առկա խնդիրները, դրանց լուծման ուղղությամբ նախատեսվող աշխատանքներն ու պետական և մասնավոր հատվածի հետ բանկային համակարգի համագործակցությունը, որից հետո տեղի է ունեցել մտքերի փոխանակում:
Փորձագետ․ Հայաստանում էլեկտրաէներգիայի սակագների զսպումը կրում է խիստ ժամանակավոր բնույթ
Քաղաքագետ․ ԵԱՏՄ-ից Հայաստանի դուրս գալը կհանգեցնի նրա կախվածության ադրբեջանական և թուրքական շուկաներից
Արթուր Ավետիսյան․ Ապագա ԱԷԿ-ի մոդելի ընտրության շուրջ բոլոր մտորումները խոսակցություններից այն կողմ չեն գնա, քանի դեռ չկա ռազմավարական զարգացման տեսլական
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները