Հինգշաբթի, 1 Դեկտեմբերի 2011 17:19

Rietumu Banka Հայաստան է եկել ոչ միայն կապիտալի համար…

ԱրմԻնֆո. Լատվիական խոշորագույն բանկերից մեկի` Rietumu Banka կողմից Հայաստանի շուկա դուրս մուտք գործելու մասին երկրի բանկային շրջանակներում խոսում էին դեռևս ընթացիկ տարվա կեսերին: Իսկ օրերս Հայաստանի Կենտրոնական բանկը Rietumu Banka-ին տրամադրեց ներկայացուցչություն բացելու լիցենզիա և պաշտոնական թույլտվություն : Այժմ լատվիական բանկի գրասենյակը լիովին պատրաստ է իր սկզբնական առաքելությանը, միավորելով Rietumu Banka մայր բանկի և հայ հաճախորդների` ունևոր մասնավոր անձանց և կորպորատիվ հաճախորդների շահերը: Տեղական շուկայում կառաջարկվեն ինչպես Rietumu-ի ծառայությունները, որոնք արևմտյան պրակտիկայում արդեն մեծ պահանջարկ են վայելում, այնպես էլ հայկական առևտրային բանկերի հետ համատեղ պրոդուկտներ: Ընդ որում, տեղական բանկերի հետ Rietumu-ն չի ցանկանում մրցակցել, մնալով միայն ներկայացուցչության կարգավիճակում: Հայկական շուկայում լատվիական բանկի գործունեության առանձնահատկությունների մասին է ԱրմԻնֆո լրատվական գործակալությանը տված հարցազրույցում պատմում Հայաստանում Rietumu Banka-ի ներկայացուցչության տնօրեն Հովհաննես Գրիգորյանը, ով երկար տարիներ առանցքային պաշտոններ է զբաղեցրել երկրի բանկային համակարգում:

Պրն.Գրիգորյան, տարբեր երկրներում գործող Rietumu Banka-ի ներկայացուցչությունները խթանում են եվրոպական շուկաների նկատմամբ ունևոր մասնավոր անձանց հետաքրքրության բարձրացմանը: Այսօր Հայաստանում նույնպես քիչ չեն հարուստները, որոնք, մի շարք պատճառներով, իրենց հարաբերությունները կառուցում են եվրոպական կառույցների, և ընդհանրապես, Եվրոպայի երկրների հետ: Ֆինանավորման ո՞ր ուղղություններն են, որ Rietumu Banka-ն առաջնահերթային է համարում Հայաստանի համար:

Նախ կուզենայի նշել, որ Rietumu Banka իր ներկայացուցչությունը որոշեց բացել հատկապես Հայաստանում, քանի որ ձգտում է հետագայում խորապես համագործակցել այստեղ արդեն գոյություն ունեցող հաճախորդների հետ, ինչպես նաև հետևողականորեն մոնիտորինգի ենթարկել նրանց գործունեությունը: Բացի այդ, Հայաստանի քաղաքացիների կողմից եվրոպական բանկային ծառայությունների նկատմամբ պահանջարկն աստիճանաբար աճում է: Այդ պատճառով էլ ներկայացուցչությունը, որն ինքնուրույն չի իրականացնի գործառնություններ, կգործի որպես մի մարմին, որը տեղական հաճախորդներին կկապի Ռիգայում գտնվող մայր-բանկի հետ: Հանդես գալով որպես կուտակիչ կազմակերպություն, ներկայացուցչությունը կընտրի հայ հաճախորդների հետաքրքիր նախագծերը, վերջնական որոշումերի կայացման համար դրանք ներկայացնելով բանկի վարչությանը: Իհարկե, մեր բանկն ունի նաև ամբիցիաներ, ցանկանալով հայ հաճախորդների համար դառնալ <դեպի Արևմուտք յուրօրինակ կամուրջ>:

Ներկայացուցչության հիմնական գործունեության մեջ ընդգրկված կլինեն տնտեսության այն ոլորտների մարկետինգային հետազոտութոյւնների իրականացումը, որտեղ մայր բանկը կորոշի կատարել ներդրումներ: Հայաստանում ներդրումային նախագծերի իրականացման նկատմամբ բաժնետերերի պատրաստակամությունը հիմնավորված է երկրի քաղաքական և տնտեսական կայունությունով: Այսպիսով, լատվիական բանկի գործունեության հիմնական ուղղութուններից կլինի նաև ուղղակի մասնակցությունը հայկական ընկերությունների կապիտալներին: Ներկա պահին Ռիգայում մշակվում են Հայաստնում իրականացվելիք ներդրույմային քաղաքականության կոնկրետ ուղղությունները: Դրանք կարող են լինել էներգետիկ ոլորտի ներդրումներ, մասնավորապես, փոքր ՀԷԿ-երի գծով, ինչպես նաև լեռնարդյունաբերության և գյուղատնտեսության ոլորտների ներդրումներ:

Բանկի գործունեության մյուս ուղղությունն առևտրի ֆինանսավորումն է: Մեզ հետաքրքրում են այն ձեռնարկություններն ու արտադրությունները, որոնք առաջին հերթին ունեն արտահանման կողմնորոշում: Այսօր հանրապետության խոշոր տնտեսվարող սուբյեկտներն արդեն հետաքրքրություն են ցուցաբերում այդ ծառայության նկատմամբ, հաշվի առնելով, որ իրենք էլ սեփական բեռնափոխադրումների համար հաճախ օգտվում են Լատվիայի 3 միջազգային` Ռիգայի, Վենտսպիլսի և Լիեպայի նավահանգիստներից:

Ինչո՞վ կարող է լատվիական բանկը նախընտրելի լինել հայ հաճախորդներին, բացի նրանցից, որոնք արդեն գործարար կապեր ունեն Լատվիայի հետ:

Հաճախորդների վստահությունը կնվաճենք որակյալ սպասարկման միջոցով: Rietumu Banka-ն գործունեության 20 տարիներին իր քաղաքականութոյւնը զարգացրել է, հաշվի առնելով այն գործոնը, որ իր հաճախորդները փողատեր, իսկ ծառայությունների մատուցման հարցերում` կամակոր անձինք են: Rietumu Banka-ի տեխնոլոգիապես հագեցված ծառայությունները ոչնչով չեն զիջում այնպեսի <ֆինանսական շնաձկների> նույնանման ծառայություններին, ինչպեսիք են շվեյցարական, ֆրանսիական կամ գերմանական բանկերը, սակայն, սակագների գծով նրանք զգալիորեն ավելի մրցունակ են: Գլխավորն այն է, որ մենք մեր հաճախորդների հետ կառուցում ենք երկարաժամկետ և վստահելի հարաբերություններ: Մենք չենք զբաղվում պարզապես վարկավորումով, այլ աշխատում ենք անհատապես: Մեր հաճախորդներին տրամադրում ենք վարկային գործարքը ձևակերպելու ամբողջական ծառայություններ, ապահովում անհատական մենեջերով, ապահովելով նաև անհրաժեշտ ֆինանսական փաստաթղթերով, կախված նախագծի էությունից: Հետաքրքրական է, որ Rietumu Banka-ի աշխատակիցները, սկսած մենեջերներից, հաճախորդների կողմից ընկալվում են ոչ թե որպես պաշտոնական կլերկներ, այլ որպես պրոֆեսիոնալներ, որոնցից յուրաքանչյուրը մեծ պատասխանատվությամբ պատրաստ է զրուցել ցանկացած հաճախորդի հետ:

Rietumu Banka-ի ծառայութոյւններից մեկն էլ խոշոր ավանդային հաշիվ բացելուց հետո հաճախորդներին Լատվիայում կացություն ապահովելու հնարավորությունն է: Ինչպիսի՞ն են այդ ծառայության պայմանները, և, Ձեր կարծիքով, որքանո՞վ այն պահանջված կլինի հարուստ հայերի շրջանում:

Այն հայ գործարարները, որոնք ակտիվ գործունեություն են ծավալել Եվրոպայում, արդեն մեծ հետաքրքրություն են ցուցաբերում այդ ծառայության նկատմամբ: Քանի որ Լատվիան հանդիսանում է Եվրամիության անդամ, հետևաբար, կացության հնարավորություն ունեցողը 5 տարիների ընթացքում իրավունք է ստանում անարգել տեղաշարժվել Շենգենյան գոտու բոլոր երկրներով: Դա շատ ավելի հարմար է գործարարների համար, քանի որ երկար ժամկետով նրանց ազատում է ստանդարտ մուլտիվիզաներ ստանալու քաշքշուկներից: Այս ծառայությունը ներառում է 3 տարբերակ, որոնք ուղղված են ներդրումների ներգրավմանը, չէ որ Լատվիայի տնտեսության համար այդ երևույթը նշանակալից է: Մասնավորապես, Լատվիայում կացության իրավունք կարելի է ստանալ ընդամենը 1 ամսով, 70-150 հազ.եվրո արժեքով անշարժ գույք ձեռք բերելու միջոցով: Երկորդ տարբերակը Լատվիայում կացության իրավունքի ստացումն է Rietumu Banka-ում 5 տարով տեղադրելով 300 հազ.եվրո գումարով սուբօրդինացված ավանդ: Դա լիովին հարմար է, քանի որ ավանդատիրոջը բերում է բավականին բարձր տոկոսային եկամուտներ: Երրորդ տարբերակը լատվիական որևէ ընկերության կապիտալում առնվազն 36 հազ.եվրոյի ներդրում ունենալն է: Ընդ որում, այդ ընկերության շահութահարկի ընդհանուր չափը վերջին 3 տարիներին պետք է կազմի առնվազն 28 հազ.եվրո:

Ըստ ոչ պաշտոնական տվյալների, Rietumu Banka-ի դուստր ձեռնարկություններից մեկը մատուցում է օֆշորային ընկերությունների գրանցման և կառավարման ծառայություններ: Գաղտնիք չէ, որ օֆշորային գրանցումները մասսայականթյուն են վայելում նաև հայկական ընկերությունների, այդ թվում նաև առևտրային բանկերի շրջանում: Որքանո՞վ է Rietumu-ն պատրաստ աջակցել հայկական ընկերություններին օֆշորային բիզնեսը ձևակերպելու հարցում:

Ֆինանսական հոսքերի կառուցումն ու օպտիմալացումը յուրաքանչյուր գործարարի անձնական գործն է, որը ձգտում է օրենքի շրջանակներում ստանալ առավելագույն շահույթ: Այս առումով Rietumu Banka-ն բաց խաղ է վարում իր հաճախորդների հետ: Շրջանառվող ստերեոտիպերն այն մասին, որ բալթյան բանկերը <լվացքի մեքենաներ են>, չի համապատասխանում իրականությանը, համենայն դեպս`Rietumu Banka-ի պարագայում: Այս բանկում անգամ ֆիզիկական անձանց համար հաշվի բացումը հիշեցնում է կատարողական ընթացակարգ, քանի որ հաճախորդը պարտավոր է մանրամասն ներկայացնել այն բոլոր փաստաթղթերը, որոնք հիմնավորում են նրա ֆինանսական հոսքերը: Rietumu Banka-ն աշխատում է խոշոր բիզնեսի հետ և նրա համար թանկ է իր հեղինակությունը: Թե որքանով Հայաստանը որպես պետություն, կամ էլ հայկական ընկերությունները կկարողանան Rietumu Banka-ի կողմից դիտարկվել օֆշորային գործարքի տեսանկյունից, գտնում եմ, որ դեռևս վաղ է այդ մասին խոսելը:

Rietumu Banka տարբեր երկրներում ունի նաև դուստր լիզինգային ընկերություններ: Հաշվի առնելով Rietumu-ի կողմից տնտեսության տարբեր ոլորտներում, այդ թվում նաև գլուղատնտեսությունում ներդրումներ իրականացնելու պլանները, իրատեսակա՞ն է արդյոք Հայաստանում լիզինգային կառույցի հիմնումը:

Rietumu-ի լիզինգային ընկերություններն այսօր գործում են Ռուսաստանում, Ուկրաինայում, Բելառուսում, իսկ հետագայում, ինչու ոչ, նաև Հայաստանում: Դա ժամանակի և շուկայի ուսումնասիրության հարց է, և եթե մենք զգանք լիզինգային ծառայութոյւնների համապատասխան պահանջարկ, ապա ընկերություն կբացենք:

Լատվիական բանկը հետաքրքրություն է դրսևորում նաև տարբեր բանկերի հետ համատեղ նախագծերի իրականացմանը: Նախատեսվո՞ւմ է արդյոք նման համագործակցություն հայկական բանկերի հետ:

Այո, Rietumu Banka-ը նախատեսում է հայկական բանկերի հետ զարգացնել համագործակցությունը, այդ թվում նաև որոշ համատեղ նախագծերի շրջանակներում: Մասնավորապես, մենք արդեն երկրի որոշ խոշոր բանկերի առաջարկել ենք ինտերնետ-էկվայրինգի նախագիծը և զգացել ենք նրանց հսկայական հետաքրքրությունը: Ինտերնետի և վարկային քարտի միջոցով վճարումների զարգացումը, շահավետ պայմաններով, ոչ միայն խթանում է անկանխիկ վճարումների ավելացմանը, այլ նաև հաճախորդներին ապահովում է որոշ ապրանքներով, որոնք վաճառելու համար հարկավոր է ունենալ խանութներ, օրինակ, Երևանի Հյուսիսային պողոտայում: Եվ դա բավականին զարգացած պրակտիկա է աշխարհում: Սակայն նախագծերի իրականացման առանձնահատկությունները հայտնի կդառնան 2012 թվականի սկզբին:

Շնորհակալություն

Զրույցը վարեց Լիլիթ Ասլանյանը

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ

RUB	4.89	0.05
USD	381.51	0.05
EUR	450.03	0.06
GBP	515.61	0.07
CAD	279.04	0.03
JPY	24.46	0.00
CNY	54.46	0.08
CHF	484.83	0.07

Նորություններ

Rietumu Banka Հայաստան է եկել ոչ միայն կապիտալի համար…