Երկուշաբթի, 27 Փետրվարի 2012 20:49

Բիզնեսի վարկավորումն Անելիք Բանկի առաջնային գործիքն է

ԱրմԻնֆո <Անելիք Բանկ> ՓԲԸ Վարչության նախագահի առաջին տեղեկալ Բագրատ Ճզմաչյանի հարցազրույցը ԱրմԻնֆո լրատվական գործակալությանը և finport.am պորտալին

2011 թվականին <Անելիք Բանկ> ՓԲԸ-ն միջազգային կառույցներից և բնակչության ավանդներից ֆինանսական ռեսուրսներ ներգրավելու ճանապարհով ակտիվորեն զարգացնում էր պարտավորությունների պորտֆելը: Որքանո՞վ էր հաջողված անցնող տարին ներգրավված միջոցները շուկայում տեղաբաշխելու առումով:

2011 թվականին Բանկին հաջողվեց միջազգային կառույցներից ներգրավել գրեթե 10 մլն ԱՄՆ դոլարին համարժեք միջոցներ, ինչպես նաև, շեշտակի ավելացնել ավանդային պորտֆելը. նախորդ տարի բնակչությունից Բանկը ներգրավել է ավելի քան 12 մլրդ ՀՀ դրամին համարժեք ավանդներ, որի արդյունքում կարողացանք տրամադրել գրեթե 70 մլն ԱՄՆ դոլարին համարժեք վարկ: Կարծում եմ` տվյալ ցուցանիշները վկայում են Բանկի դինամիկ զարգացման մասին, առավելևս, եթե հաշվի առնենք այն հանգամանքը, որ 2011 թվականը դիտվում է, եթե ոչ տնտեսական ճգնաժամի, ապա նախաճգնաժամային տարի` ի նկատի ունենալով ԱՄՆ և Եվրոպայի մի շարք երկրներում տեղի ունեցող իրադարձությունները:

Որքա՞ն էր ներգրավված և տեղաբաշխված միջոցների տոկոսադրույքների միջև մարժայի դիմնամիկան: 2011 թվականի արդյունքներով Բանկն արդյոք ապահովե՞ց զարգացման իր ծրագրով ամրագրված շահույթը:

Ընդհանուր առմամբ, առևտրային բանկերն, աշխատում են համեմատաբար ցածր մարժայով, առավելևս, եթե վարկավորում են բիզնեսը: «Անելիք Բանկ»-ի համար բիզնեսի վարկավորումը հանդիսանում է առաջնային գործիք, և մեր վարկային պորտֆելում բիզնես-վարկերը գերակշռող են` մոտ 70%: Այդ իսկ պատճառով Բանկն աշխատում է բավականին փոքր մարժայով: Մեր ռազմավարությունը կայանում է նրանում, որ ցածր մարժան կոմպենսացնենք շրջանառության ծավալներով: Այդպես ձեռնտու է և մեզ, և թե Բանկի հաճախորդներին: Շահույթի մասով ասեմ, որ Բանկը 2011 թվականին բարձր ցուցանիշներ չի արձանագրել, քանի որ ֆինանսական ոլորտում և, մասնավորապես, բանկային համակարգում վատացել են վարկային պորտֆելի որակական ցուցանիշները, և իրականացվել են վարկերի գծով պահուստներ, ինչի հետևանքով Բանկի շահույթը մոտ 150 մլն դրամ էր, որը գոհացուցիչ չէ: Բայց, հաշվի առնելով վարկային և ավանդային պորտֆելների աճի նշված դինամիկան, մենք կձգտնեք ապահովել 2012-14 թվականներին պլանավորված շահույթը: Սակայն, պետք է հաշվի առնել նաև համաշխարհային տնտեսության ճգնաժամի 2-րդ ալիքը, որը սպասվում է 2012-13 թվականներին:

Տնտեսոթյան ոլորտներից երկրի բանկային համակարգն անցյալ տարի վարկային ամենափոքր ծավալների վարկային ռեսուրսներն ուղղեց շինարարության, տրանսպորտի և կապի ոլորտներին: Ինչպիսի՞ն էր <Անելիք Բանկ> ՓԲԸ վարկային պորտֆելի կառուցվածքը:

Հիմնական շեշտադրումը եղել է բիզնեսի վարկավորումը, որն աճել է մոտ 21%-ով, ընդհանուր առմամբ բիզնեսի վարկավորման պորտֆելը գերազանցում է 28 մլրդ ՀՀ դրամը: Քանի որ Բանկը գնում է իր եկամուտների դիվերսիֆիկացիայի ճանապաչհով, դրանից ելնելով` 2011 թվականին Բանկը վերսկսեց սպառողական վարկավորումը, ինչը մենք կփորձենք զարգացնել 2012 թվականին:
Բանկն անմասն չի մնացել նաև հիփոթեքային վարկավորումից, 2011-ին հիփոթեքային վարկավորման պորտֆելն աճել է 1,3 մլրդ դրամով` հասնելով 2,4 միլիարդի: Բանկում աճ է նկատվել նաև այլ տեսակի սպառողական վարկերի տրամադրման ծավալներում` մասնավորապես, քարտային վարկերի գծով:

2011 թվականին Բանկը բավականին արդյունավետ իրականացրել է նաև ուսման վարկավորում, որը ես շատ եմ կարևորում, քանի որ մենք բոլորս էլ գիտակցում ենք, որ կրթությունը բարեկեցության հիմքն է: Ճիշտ է, այս վարկատեսակը չի կարող ապահովել մեծ պորտֆել, սակայն ուրախացնող է վարկառուների թվաքանակի աճը, որը նշանակում է, որ «Անելիք Բանկ¦-ը կարողացել է առավել շատ թվով ուսանողների օգնել` լուծելու ուսման վարձի խնդիրը: 2011 թվականին մենք տրամադրել ենք մոտ 300 ուսանողական վարկ:

<Անելիք Բանկ> ՓԲԸ վերջին տարիներին հատուկ ուշադրութոյւն է դարձնում ժամանակակից տեխնոլոգիաների կիրառմանը և տարբեր պրոդուկտների գծով մոտեցումներին: Դրանցից որո՞նք կառանձնացնեիք որպես աճի <դրայվերներ>:

«Անելիք Բանկ¦-ը միշտ էլ կարևորել է նորարարությունները և իր բանկային գործիքներում փորձել է կիրառել դրանք: Օգտագործել նորարարական տեխնոլոգիաները` նշանակում է քայլել ժամանակին համընթաց:

Անցած տարի Բանկի ծրագիրը լիարժեքորեն անցավ online աշխատանքի սկզբունքի, որը հնարավորություն ընձեռեց ավելի արդյունավետորեն փոխկապակցել բոլոր մասնաճյուղերը և արագացնել ներդրված բանկային գործիքների տրամադրման ընթացքը: 2011 թվականին, հավատարիմ մնալով որդեգրած ռազմավարությանը, ներդրեցինք նաև նոր բանկային պրոդուկտ`«Բանկ-Հաճախորդ¦ համակարգի միջոցով մաքսային վճարումների իրականացում: Սա նորություն էր Հայաստանի բանկային համակարգում, և մենք առաջին և դեռևս միակ բանկն ենք, որն իր հաճախորդներին տրամադրում է նման գործիք: Ճիշտ է, ներդրված այս նոր համակարգը այդքան էլ լայն արձագանք չի գտել հաճախորդների շրջանում, սակայն դրա համար ժամանակ է անհրաժեշտ:

Ինչպիսի՞ արդյունքներ է արձանագրել «Անելիք» Դրամական Փոխադրումների Համակարգը 2011 թվականին:

2011 թվականը բավականին նպաստավոր տարի էր <Անելիք> Դրամական Փոխադրումների Համակարգի համար: Դրամական Փոխադրումների շրջանառության ընդհանուր ծավալը 2011 թվականին գերազանցել է 1 միլիարդ ԱՄՆ դոլարը: Չնայած այն բավականին զիջում է 2008 թվականի ցուցանիշը, բայց նախորդ տարվա համեմատ առկա է 13 % աճ:

«Անելիք Բանկ» ՓԲԸ-ն անում է հնարավոր ամեն ինչ, որպեսզի զարգացնի <Անելիք> Դրամական Փոխդրումների Համակարգը և բարձր պահի <Անելիք> ապրանքանիշը ոչ միայն Հայաստանում, այլև` ամբողջ աշխարհում` քանի որ այն գործում է աշխարհի ավելի քան 90 երկրներում, ունենալով 63,000 սպասարկման կետեր:

Ինչպե՞ս եք գնահատում Հայաստանի բանկային համակարգի կայունությունը և ի՞նչն է բանկային համակարգի հիմնական շարժիչ ուժը:

Բանկային համակարգը, լինելով Հայաստանի տնտեսության շարժիչ ուժը, նախորդ 20 տարիներին ապացուցեց իր կայունությունն ու հուսալիությունը: Առանց չափազանցության կարող եմ ասել, որ բանկային համակարգը տնտեսության ամենակայացած ճյուղն է, որն աներեր մնաց անգամ միջազգային ֆինանսատնտեսական ճգնաժամի տարիներին: Սրան նպաստում են մի շարք գործոններ, որոնցից ես կառանձնացնեի հայաստանյան բանկերի միջև առկա առողջ մրցակցությունը, որը հենց բանկային համակարգի հիմնական շարժիչ ուժն է: Իհարկե, բանկային համակարգի կայունության գրավականներից պետք է առանձնացնել նաև այդ դաշտի իրավական ու նորմատիվային համակարգի կանոնակարգումը, որն իրականացնում է ՀՀ Կենտրոնական Բանկը:

Որոշ փորձագետներ մինչև 2013 թվականն ընկած ժամանակահատվածը համարում են ճգնաժամի հետևանքներից <մաքրվելու> ժամանակաշրջան, այդ թվում նաև երկրի բանկային համակարգի համար: Հաշվի առնելով համաշխարհային վերջին իրադարձությունները, ի՞նչ եք մտածում այս մասին և ինչպիսի՞ն են Ձեր կանխատեսումները:

2008 թվականին սկսված ֆինանսատնտեսական ճգնաժամը ծանր հետևանքներ թողեց ամբողջ աշխարհի տնտեսության վրա: Դա չէր կարող չանդրադառնալ նաև մեր տնտեսության վրա, որը համաշխարհային տնտեսության մի մասն է կազմում: 2011 թվականին ճգնաժամը մի փոքր մեղմեց, սակայն 2012 թվականին, ցավոք, ըստ բազմաթիվ միջազգային հեղինակավոր տնտեսագետների, ինչպես նաև ելնելով այն իրադարձություններից, որոնք ներկայումս դիտվում են Եվրամիության երկրներում և ԱՄՆ-ում, կարելի է պնդել, որ սկսվելու է ճգնաժամի 2-րդ ալիքը: Կարծում եմ, որ այդ ցնցումները կտևեն երկար, և դա բնական է, քանի որ տնտեսական ճգնաժամերը միանգամից չեն առաջանում և միանգամից էլ չեն հաղթահարվում: Իմ կարծիքով, առաջիկա 3-4 տարիները կլինեն <վերականգնման և չափավոր աճի> տարիներ, որոնք ուղղված կլինեն ճգնաժամից տնտեսության վերջնական դուրս բերմանը:

ԱրմԻնֆո

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ

RUB	4.56	0.06
USD	383.47	0.72
EUR	449.96	2.75
GBP	519.91	2.59
CAD	277.17	1.47
JPY	25.95	0.08
CNY	53.85	0.12
CHF	481.44	2.76

Նորություններ

Բիզնեսի վարկավորումն Անելիք Բանկի առաջնային գործիքն է