Ուրբաթ, 11 Հունվարի 2013 19:32
ՀՀ անշարժ գույքի կադաստրի պետական կոմիտեի կողմից մերժված հայտերի թիվը 2008-2012 թթ. 35-40 տոկոսից կրճատվել է մինչև 5,5 տոկոս
ԱրմԻնֆո: 2012 թվականին ՀՀ անշարժ գույքի կադաստրի պետական կոմիտե ներկայացված հայտերի ընդհանուր թվում գերատեսչության կողմից մերժված հայտերի թիվը 5,5 տոկոսով կրճատվել է: Այդ մասին հունվարի 11-ին մամուլի ասուլիսում հայտարարել է ՀՀ անշարժ գույքի կադաստրի պետական կոմիտեի նախագահ Երվանդ Զախարյանը:
Նրա ասելով, 2008 թվականին տարբեր, ինչպես հիմնավոր, այնպես էլ անհիմն պատճառներով մերժված հայտերը կազմել են հայտերի ընդհանուր թվի 35-40 տոկոսը, 2009 թվականին դրանք նվազել են մինչև 25-30 տոկոս, 2010 թվականին` մինչև 10 տոկոս, 2011 թվականին` մինչև 7,9 տոկոս:
Հետևաբար, 2008 թվականից ի վեր մերժված հայտերի թիվը կրճատվել է 5 անգամ, ինչը հանգեցրել է քաղաքացիների և անշարժ գույքի կադաստրի պետական մարմինների միջև դատական պարզաբանումների կտրուկ նվազման: Այսպես, 2012 թվականին հայտերի մերժմանն առնչվող գործերով կայացված դատավճիռների թիվը կազմել է 24` 2011 թվականի 122-ի դիմաց:
ՙ2009 թվականին, երբ ես նոր էի նշանակվել ԱԿՊԿ ղեկավարի պաշտոնում, իմ աշխատանքի կեսն առնչվում էր միջնորդության խնդրանքով զանգերին, օրինակ, արագացնել անշարժ գույքի պետական գրանցման գործընթացը կամ այս կամ այն գործի ուսումնասիրումը: Այսօր այդպիսի զանգեր չկան: Դա վկայում է այն մասին, որ քաղաքացիները դժվարության չեն հանդիպում Կոմիտե դիմելիս: Նրանք պատասխան են ստանում անմիջապես սպասարկման գրասենյակներում` առանց Պետական կոմիտեի աշխատակիցների հետ ավելորդ շփման՚, - ընդգծել է Ե.Զախարյանը:
Նա նաև տեղեկացրել է, որ ավարտվել է կադաստրային փաստաթղթերի և գործերի թվայնացման գործընթացը, և վերջնականապես ձևավորվել է Անշարժ գույքի կադաստրի պետական կոմիտեի էլեկլտրոնային արիխիվը, որը ներառում է շուրջ 34.2 մլն փաստաթուղթ և 61.6 մլն էջ թվայնացված պատճեն: Տվյալների միասնական բազան անվտանգության նկատառումներով պահվում է երկու տարբեր վայրերում:
Ե.Զախարյանի տվյալներով, 2012 թվականին գույքի իրավունքի պետական գրանցման վերաբերյալ տեղեկատվության տրամադրման ծառայությունների դիմաց վճարումների միագումար ծավալը կազմել է 3.6 մլրդ դրամ` նախատեսված 4 մլրդ դրամի դիմաց:
Անդրադառնալով ԱԿՊԿ գործունեության առաջնային ուղղություններին հեռանկարում` Ե.Զախարյանը նշել է, որ գերատեսչությունը 2014-2016 թթ. ողջ հանրապետությունում մտադիր է սրբագրել գույքահարկի չափը: Կոմիտեի համար լուրջ խնդիր է նաև ավտոմատացված քարտագրման աշխատանքի համակարգի բացակայությունը, սակայն 2013 թվականի վերջին, ինչպես հավաստիացրել է ԱԿՊԿ ղեկավարը, այդ հարցը վերջնականապես կլուծվի:
Հիշեցնենք, որ Հայաստանի անշարժ գույքի կադաստրի համակարգում բարեփոխումներ են անցկացվել 2009 թվականից մինչև 2011 թվականը ներառյալ` ՀՀ նախագահ Սերժ Սարգսյանի հանձնարարությամբ: