Ուրբաթ, 18 Ապրիլի 2014 16:08
Հայաստանի բանկային հատվածում «ՎՏԲ-Հայաստան Բանկն» առաջատար է դարձել վարկային պորտֆելի գծով
ԱրմԻնֆո: 2013 թվականի վերջին «ՎՏԲ-Հայաստան Բանկը» ՀՀ բանկերի շրջանում առաջին տեղն է զբաղեցրել ընդհանուր վարկերի ցուցանիշով` զբաղեցնելով բանկային վարկավորման շուկայի 12.2%-ը: Ապրիլի 18-ին մամուլի ասուլիսում այդ մասին հայտարարել է «ՎՏԲ-Հայաստան Բանկի» գլխավոր տնօրեն-տնօրինության նախագահ Յուրի Գուսևը:
Միջազգային ֆինանսական հաշվետվության ստանդարտներին (ՄՖՀՍ) համապատասխան հրապարակված «ՎՏԲ-Հայաստան Բանկի» ֆինանսական արդյունքների համաձայն, բանկի ընդհանուր վարկային պորտֆելը (վարկեր և փոխառությունները հաճախորդներին մինչև պահուստները) 2013թ.-ին աճել է 38.1%` հասնելով մինչև 232.1 մլրդ ՀՀ դրամ կամ ընդհանուր ակտիվների 76.8%:
Վարկավորման ծավալաների ավելացումն իր հերթին նպաստել է բանկի ակտիվների զգալի տարեկան աճին. Բանկի ակտիվները 2013թ. ընթացքում ավելացել են 43.1%` հասնելով 302.3 մլրդ ՀՀ դրամ: 2013 թ. ավարտին Բանկը զբաղեցրել է 2-րդ տեղը ՀՀ բանկերի շրջանում համապարփակ ակտիվներով (շուկայի 10.2%):
Բանկի համապարփակ պարտավորությունները, որոնք կազմված են ներքին և արտաքին շուկայից ներգրավված ժամկետային ու ցպահանջ միջոցներից, աճել են 46.4%` հասնելով 265.0 մլրդ ՀՀ դրամի: Հաճախորդներից ներգրավված միջոցների ծավալն ավելացել է 40.9%-ով և կազմել է 148.9 մլրդ ՀՀ դրամ: Պարտավորությունների շրջանում նախկինի պես մեծ մասնաբաժին է կազմում հաճախորների միջոցները` 56.2%:
«Անցած տարվա արդյունքներն ամփոփելով կուզեի նշել, որ այն դարձել է Բանկի համար մեծ հաջողությունների և նոր ձեռքբերումների տարի: Գործունեության հիմնական ցուցանիշների աճը, շուկայի մասնաբաժնի ավելացումը բոլոր առաջնահերթ ուղղություններով, շուկայական միտումների հմուտ օգտագործումը և տրամադրվող ծառայությունների որակի շարունակական բարձրացումը լուրջ աշխատանքի արդյունքներ են, որը կատարվում է Բանկի աշխատակիցների կողմից ամեն օր և թույլ է տալիս ամեն տարի հասնել նոր նպատակների` հաստատելով ՎՏԲ-Հայաստան Բանկի` որպես ՀՀ առաջատար բանկի կարգավիճակը», - նշել է Յուրի Գուսևը:
Նրա հավաստմամբ, անցած տարի ՎՏԲ-Հայաստան Բանկը, ինչպես և նախկինում առաջարկել է բանկային ծառայությունների ամբողջ համալիրը ինչպես մասնավոր, այնպես էլ կորպորատիվ հաճախորդների համար, մշակել է նոր լուծումներ` ուղղված ծառայությունների հասանելիության բարձրացմանը, պրոդուկտային շարքը համապատասխանել է հաճախորդների սպասումներին, իսկ տեխնոլոգիական հիմքի կատարելագործումը և սպասարկման բարելավումը թույլ է տվել մեր հաճախորդներին խնայել իրենց ժամանակը: «Զարգացման մտածված մարտավարությունը տալիս է իր արդյունքները. ընկերությունների ու ֆիզիկական անձանց ավելի ու ավելի մեծ թիվ է դառնում Բանկի հաճախորդ: Ովքեր դարձել են մեր հաճախորդը, հաստատում են իրենց հավատարմությունը` օգտվելով Բանկի տրամադրած նոր ծառայություններից ու պրոդուկտներից», - ընդգծել է բանկիրը:
Բանկը 2013 թվականի արդյունքներով ունեցել է 5.6 մլրդ դրամ շահույթ: 2013թ. Բանկի կապիտալը կազմել է 37.3 մլրդ ՀՀ դրամ: Գործառնական գործունեությունից եկամուտը 2012թ. նույն ցուցանիշների համեմատ ավելացել է 29.3%-ով և կազմել 22,7 մլրդ ՀՀ դրամ: Կապիտալի եկամտաբերության մակարդակը (ROE) 2013թ. արդյունքներով կազմել է 16.7%, իսկ ակտիվների եկամտաբերության մակարդակը (ROA) կազմել է 2.2%, CIR-ը`54.6%: Անցյալ տարի բանկն իր ծառայություններն է մատուցել շուրջ 458 հազար հաճախորդներին-ֆիզիկական անձանց և 5 հազար հաճախորդներին-իրավաբանական անձանց, փոքր, միջին և խոշոր բիզնեսի ներկայացուցիչներին: Բանկը շարունակում էր ընդլայնել իր բաժինը շուկայում ի շնորհիվ ՎՏԲ բրենդի հանդեպ բարձր վստահության և հաճախորդների որակյալ սպասարկմանը: 2013թ. բարեկարգվել են Բանկի 37 մասնաճյուղեր, որտեղ ստեղծվել են հատուկ հատվածներ հաճախորդների տարբեր գործարքների սպասարկման համար, մասնաճյուղերի ներքին և արտաքին տեսքը բերվել է միասնական ոճի, վերանորոգված մասնաճյուղերում տեղադրվել են հերթերի կառավարման համակարգեր: « Բանկի գլխավոր խնդիրը իր հաճախորդների համար վստահելի ու պրոֆեսիոնալ գործընկեր լինելն է` ապահովելով որակյալ ու արագ սպասարկում, ինչպես նաև պահպանելով անվտանգությունն ու կայունությունը: Մենք կանգ չենք առնում ձեռք բերված արդյունքների վրա և ձգտում ենք մշտապես զարգանալ, բարձրացնել մեր աշխատանքի որակն ու բիզնեսի արդյունավետությունը: Մենք վստահ ենք, որ 2014թ. կլինի ավելի արդյունավետ ու հեռանկարային, և մենք կամրագրենք վարկային և ավանդային պորտֆելների աճի բարձր տեմպը», - ամփոփել է Յու.Գուսևը:
Նշենք, որ «ՎՏԲ-Հայաստան Բանկ» ՓԲԸ ՎՏԲ միջազգային ֆինանսական խմբի մասնակից է դարձել 2004թ. ապրիլին: «ՎՏԲ Բանկ» ԲԲԸ հանդիսանում է «ՎՏԲ-Հայաստան Բանկ» ՓԲԸ 100% բաժնետոմսերի փաթեթի միանձնյա բաժնետերը: Բանկը հիմնական ցուցանիշների մի ամբողջ շարքով մշտապես ներառվում է ՀՀ բանկային համակարգի առաջատարների թվի մեջ: Ներկա դրությամբ բանկն ունի ամենալայն մասնաճյուղային ցանցը ողջ երկրում` 67 մասնաճյուղ:
Հայաստանում ՊԲԱ-ն պետական մարմինների ներխուժում է մասնավոր դաշտ եւ հերթական հարկ՝ նոր անվանակոչմամբ․ փորձագետ
Աշխատում էին համապարփակ բժշկական ապահովագրության վրա, ստացան՝ համընդհանուր։ Հայաստանը շուկայական տնտեսության մոդելից լայնածավալ հետքայլ է կատարում դեպի վարչահրամայական տնտեսություն. Հայկազ Ֆանյան
Մարիամ Համբարձումյան. Հայաստանի կրթական համակարգն առայժմ չի կարողացել անցնել այն տրանսֆորմացիան, որն այսօր անհրաժեշտ է բիզնեսի համար
Շաքարի ներմուծումը Հայաստան 2025թ. առաջին կիսամյակում կրճատվել է 66%-ով
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները