Շաբաթ, 31 Մայիսի 2014 13:57
«Տարվա գործարք 2013» մրցանակը EBRD շնորհեց Ամերիաբանկին
ԱրմԻնֆո. Ամերիաբանկն արժանացել է Վերակառուցման և զարգացման եվրոպական բանկի (ՎԶԵԲ) «Տարվա գործարք 2013» մրցանակին: Ինչպես ԱրմԻնֆո գործակալությանը տեղեկացվել է Ամերիաբանկի մամուլի ծառայությունից, ս.թ. մայիսի 16-ին Վարշավայում մրցանակը հանդիսավոր պայմաններում հանձնվեց Ամերիաբանկի Կորպորատիվ գործառնությունների գծով տնօրեն Գագիկ Սահակյանին` ՎԶԵԲ-ի Առևտրի աջակցման ծրագրի տարեկան մրցանակաբաշխության շրջանակներում կայացած 2014թ. տարեկան ժողովի ժամանակ:
Աղբյուրի համաձայն, «Տարվա գործարք 2013»-ն Ամերիաբանկի և Կոմերցբանկի միջև կնքված գործարքն է, որը երաշխավորվել է ՎԶԵԲ-ի կողմից: Ընդ որում, Նիդերլանդների զարգացման բանկը (FMO) նույնպես մասնակից է եղել այս գործարքին` ծածկելով քաղաքական և վճարման ռիսկերի որոշակի մասը: Գործարքն ունի կարևոր ռազմավարական նշանակություն Հայաստանի հեռահաղորդակցման ոլորտի զարգացման համար:
«Ամերիաբանկը բարձր է գնահատում երկարամյա համագործակցությունը ՎԶԵԲ-ի հետ, որի արդյունքում իրականացվել են Հայաստանի տնտեսության զարգացման համար կարևոր նշանակություն ունեցող մի շարք նախագծեր: Մասնավորապես այս գործարքի կնքումը, որը հնարավոր դարձավ մի քանի խոշոր և հեղինակավոր ֆինանսական կառույցների մասնակցությամբ, առանձնահատուկ նշանակություն ունի Հայաստանի հեռահաղորդակցության ոլորտի զարգացման համար: Մենք նաև կարևորում ենք այն հանգամանքը, որ գործարքը կնքվեց առանձնակի նպաստավոր պայմաններով: Միտված լինելով երկրում հեռահաղորդակցության ոլորտը նոր մակարդի բարձրացնելուն` այն միաժամանակ կնպաստի նոր աշխատատեղերի ստեղծմանը ինչպես Երևանում, այնպես էլ Հայաստանի տարբեր մարզերում»,-նշել է Գագիկ Սահակյանը:
Նշենք, որ 2013թ. Ամերիաբանկը ՎԶԵԲ-ի կողմից արժանացել է «Ամենաակտիվ թողարկող բանկ» և «Հայկական առաջին հաստատող բանկ» մրցանակներին: Նշենք, որ շնորհիվ միջազգային ֆինանսական շուկայում ձեռք բերած ճանաչման` որպես հուսալի և վստահելի գործընկեր Ամերիաբանկը շարունակում է ակտիվ համագործակցությունը միջազգային ֆինանսական կառույցների և օտարերկրյա հեղինակավոր բանկերի հետ: Եվ այդ արդյունավետ համագործակցության արդյունքում Բանկն ունի ավելի քան 110 մլն ԱՄՆ դոլարի հաստատված սահմանաչափ:
Ըստ ԱրմԻնֆո գործակալության` Հայաստանի բանկերի Ֆինանսական Վարկանիշի, 2014 թվականի հունվարի 1-ի դրությամբ Ամերիաբանկի ակտիվները կազմել են 315 մլրդ.դրամ, տարեկան աճը`է 28.6%, զբաղեցնելով առաջին տեղը համակարգում: Ակտիվների կառուցվածքում վարկային ներդրումները կազմել են 55.1% կամ 173.6 մլրդ.դրամ (4 տեղ), տարեկան աճը` 13.5%: Բանկի վարկային պորտֆելում կորպորատիվ բաղադրիչը կազմել է 139.8 մլրդ.դրամ (1-ին տեղ), տարեկան աճը` 19.5%: 2013 թվականն Ամերիաբանկը եզրափակել է 6.2 մլրդ.դրամ զուտ շահույթով:
Աղբյուրը նշում է, որ Ամերիաբանկն առևտրի ֆինանսավորման ոլորտում շարունակում է ընդլայնել համագործակցությունը ներկրողների և արտահանողների հետ: Այդ են վկայում ընթացիկ տարվա առաջին եռամսյակի արդյունքներով գրանցված ցուցանիշները, մասնավորապես` թողարկված ակրեդիտիվների ծավալը նախորդ տարվա նույն ժամանակաշրջանի համեմատությամբ աճել է 43%-ով, իսկ քանակը` 40%-ով: Զգալի աճ է գրանցվել նաև թողարկված երաշխիքների մասով` հաշվետու ժամանակահատվածում թողարկված երաշխիքների ծավալն աճել է նախորդ տարվա նույն ժամանակաշրջանի համեմատությամբ 148%-ով, իսկ քանակը` 90%:
Նշենք, որ «Ամերիաբանկ» ՓԲԸ Հայաստանի դինամիկ զարգացող բանկերից է և դասվում է երկրի ամենակայուն և խոշոր ֆինանսական հաստատությունների շարքին: Այն Հայաստանում առաջին ներդրումային բանկն է և սկսած 2007թ-ից` տրամադրում է նորարարական բանկային ծառայությունների լայն տեսականի: «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ:
Հայաստանում ՊԲԱ-ն պետական մարմինների ներխուժում է մասնավոր դաշտ եւ հերթական հարկ՝ նոր անվանակոչմամբ․ փորձագետ
Շաքարի ներմուծումը Հայաստան 2025թ. առաջին կիսամյակում կրճատվել է 66%-ով
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները