Երեքշաբթի, 11 Նոյեմբերի 2014 18:06

ՀՀ ԿԲ վերաֆինանսավորման տոկոսադրույքը թողել է անփոփոխ՝ 6.75 տոկոս

ԱրմԻնֆո. ՀՀ Կենտրոնական բանկը վերաֆինանսավորման տոկոսադրույքը թողել է անփոփոխ՝ 6.75%: Ինչպես ԱրմԻնֆո գործակալությանը տեղեկացվել է ՀՀ Կենտրոնական բանկի մամուլի ծառայությունից, որոշումն ընդունվել է 2014 թ. նոյեմբերի 11-ին, ԿԲ խորհրդի նիստում:

Աղբյուրի համաձայն, 2014 թ. հոկտեմբերին արձանագրվել է 1.0% գնաճ՝ նախորդ տարվա նույն ամսվա 0.3%-ի դիմաց, որի պարագայում 12-ամսյա գնաճը մոտեցել է տատանումների միջակայքի ստորին սահմանին՝ ամսվա վերջին կազմելով 2.2%: Խորհուրդը կարծում է, որ առաջիկա ամիսներին գնաճը կշարունակի մոտենալ իր նպատակային ցուցանիշին և կկայունանա դրա շրջակայքում:

Արտաքին հատվածում հիմնականում պահպանվում են արտաքին պահանջարկի վերականգնման դանդաղ տեմպերը, ինչի ներքո ապրանքահումքային շուկաներում շարունակվում են դրսևորվել գնանկումային միտումներ: Այնուամենայնիվ, Խորհուրդն արձանագրում է, որ աշխարհաքաղաքական զարգացումները դեռևս պահպանում են էական անորոշություններ՝ կապված գործընկեր երկրների տնտեսական հեռանկարների և ապրանքահումքային շուկաների հետ:

ՀՀ տնտեսությունում 2014 թ. երրորդ եռամսյակից դիտվել է տնտեսական ակտիվության որոշակի ավելացում, այնուամենայնիվ, տնտեսական աճը շարունակում է մնալ ցածր մակարդակում: Չնայած արտաքին և ներքին տնտեսություններում պահպանվող ցածր պահանջարկին, ԿԲ խորհուրդը միակարծիք է, որ մինչ օրս իրականացված դրամավարկային պայմանների շարունակական թուլացումը և ընդլայնողական հարկաբյուջետային քաղաքականությունը կարճաժամկետում կհանգեցնի համախառն պահանջարկի ընդլայնմանն ու գնաճի տեմպերի վերականգնմանը: Վերջինիս հնարավոր է նպաստի նաև հոկտեմբերից մի շարք ապրանքատեսակների գծով դրոշմապիտակների ներդրումը: Արդյունքում, 2015 թ. և կանխատեսվող հորիզոնի մնացած հատվածում 12-ամսյա գնաճը կգտնվի նպատակային ցուցանիշին մոտ` տատանվելով թույլատրելի միջակայքի սահմաններում:

Միջնաժամկետ հատվածում արտաքին և ներքին տնտեսական հետագա զարգացումներին ԿԲ-ն կարձագանքի դրամավարկային քաղաքականության ուղղությունների համապատասխան ճշգրտմամբ՝ ապահովելով այդ ժամանակահատվածում գնաճի նպատակի իրագործումը: Տոկոսադրույքի մակարդակի որոշման հիմքում ընկած մանրամասն տեղեկատվությանը կարող եք ծանոթանալ նոյեմբերի 21-ին հրապարակվելիք Գնաճի հաշվետվությունում (Դրամավարկային քաղաքականության 2014 թ. չորրորդ եռամսյակի ծրագրում):

Նշենք, որ 2014 թվականին մեգառեգուլյատորը 4 անգամ ընդունել է վերաֆինանսավորման տոկոսադրույքն իջեցնելու մասին որոշում: Օգոստոսի 12-ին այն 7%-ից իջեցվեց մինչև 6.75% (այդ ժամանակ լոմբարդային ՌԵՊՈ դրույքները սահմանվեցին` 8.25%, իսկ ներգրավված ավանդներինը` 5.25%), մինչ այդ, հունիսի 24-ին 7.25%-ից իջեցվեց մինչև 7% (իսկ լոմբարդային ՌԵՊՈ դրույքները 8.75%-ից իջեցվեցին մինչև 8.5%, իսկ ներգրավված ավանդներինը` 5.75%-ից մինչև 5.5%): Մինչ այդ վերաֆինանսավորման տոկոսադրույքը մայիսի 13-ին 7.5%-ից իջեցվեց մինչև 7.25% (լոմբարդային ՌԵՊՈ դրույքները և ներգրավված ավանդների տոկոսադրուքները համապատասխանաբար նվազեցվեցին մինչև8.75% և 5.75%): Իսկ այս տարվա փետրվարի 11-ին վերաֆինանսավորման տոկոսադրույքը 7.75%-ի իջեցվեց մինչև 7.5%, իսկ լոմբարդային ՌԵՊՈ դրույքները և ներգրավված ավանդների տոկոսադրույքները 9.25%-ից և 6.25%-ից իջեցվեցին մինչև` համապատասխանաբար 9% և 6%:

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ

RUB	4.56	0.06
USD	383.47	0.72
EUR	449.96	2.75
GBP	519.91	2.59
CAD	277.17	1.47
JPY	25.95	0.08
CNY	53.85	0.12
CHF	481.44	2.76

Նորություններ

ՀՀ ԿԲ վերաֆինանսավորման տոկոսադրույքը թողել է անփոփոխ՝ 6.75 տոկոս