2015թ. 1-ին եռամսյակի արդյունքներով Անելիք Բանկը գրանցել է զգալի աճ` վարկային և ավանդային պորտֆելներում

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, 2015թ. 1-ին եռամսյակում թողարկվել է 4,466 պլաստիկ քարտ, որը նախորդ տարվա նույն ժամանակահատվածի համեմատ ավել է 12%-ով։ Գրեթե նույնքան ավելացել է նաև բացված հաշիվների քանակը, ինչպես նաև կրկնակի աճ է գրանցվել դրամական փոխանցումների քանակով:

«2015 թվականի առաջին եռամսյակը Անելիք Բանկը փակել է բավականին լավ ցուցանիշներով, թե վարկային, թե ավանդային և թե քարտային ծառայությունների մասով: Սակայն, ես ցանկանում եմ նշել հատկապես հաճախորդների թվի աճը նախորդ տարվա նույն ժամանակահատվածի համեմատ, շուրջ 40%` հասնելով ավելի քան 76 հազարի, ինչը Բանկի նկատմամբ ավելացող վստահության լավագույն ապացույցն է:

Այս տարի Անելիք Բանկը նշում է հիմնադրման 25 ամյակը և այս տարիների ընթացքում մեզ հաջողվել է ունենալ շոշափելի ձեռքբերումներ։ Այսպես, 2014թ․ ավարտին Բանկի ավանդային պորտֆելը կազմել է 51,2 մլրդ ՀՀ դրամ, որից շուրջ 40 մլրդ ՀՀ դրամը ֆիզիկական անձանցից ներգրավված ավանդներն են:Ավելացել է նաև Բանկի վարկային պարտֆելը` 2014 թվականի վերջի դրությամբ կազմելով շուրջ 60 մլրդ ՀՀ դրամ»,-  նշել է «Անելիք Բանկ» ՓԲԸ Հասարակության հետ կապերի պատասխանատու Աստղիկ Մարտիրոսյանը։

Ըստ ԱրմԻնֆո գործակալության` Հայաստանի բանկերի ֆինանսական վարկանիշի, 2015 թվականի ապրիլի 1-ին Անելիք Բանկի ընդհանուր կապիտալը կազմել է 13,9 մլրդ.դրամ (տարեկան աճը`10.6%), իսկ կանոնադրական կապիտալը`15,3 մլրդ.դրամ (նախորդ տարվա 14,3 մլրդ.դրամի փոխարեն): Բանկի կուտակված վնասը 2015 թվականի 1-ին եռամսյակում կազմել է 1.7 մլրդ դրամ, տարեկան անկումը`12,4%: Բանկի միակ սեփականատերն է լիբանանյան Credit Bank SAL, բանկը, որը 2013 թվականի չորրորդ եռամսյակում իր մասնաբաժինը 89,95% -ից հասցրեց 100%-ի: