Սոցիալական փաթեթների տարածումը մասնավոր հատվածի վրա կավելացնի բժշկական ապահովագրության պահանջարկը: ԱրմԻնֆո գործակալության թղթակցի հետ զրույցում նման կարծիք է արտահայտել ՌԵՍՈ ապահովագրական ընկերության տնօրեն Սամվել Գրիգորյանը:
Նա նշել է, որ ներկայումս սոցիալական փաթեթ պետական ծրագիրը տարածվում է միայն պետական հատվածի աշխատողների վրա, որոնց առավելագույն թիվը հասնում է 170-180 հազարի, բայց մասմավոր հատվածն այդ ծրագրում ընդգրկելու դեպքում այն կարող է հասնել 500-600 հազարի:
«Ոչ բյուջետային կազմակերպությունների աշխատողներին սոցիալական փաթեթի պետական ծրագրում ընդգրկելը կխթանի առողջության ապահովագրության կամավոր տեսակները, ինչի հետևանքով երկրում կձևավորվի ապահովագրական մշակույթ, ընդ որում, առաջին փուլում - բժշկական ապահովագրությնա գծով»,-նշել է Ս.Գրիգորյան:
Նրա խոսքով, պարտադիր բժշկական ապահովագության ներդրման ծրագիրն առաջին փուլում ենթադրում է ներգրավել ինչպես պետական, այնպես էլ մասնավոր կազմակերպությունների բոլոր աշխատողներին, ընդ որում, առաջին հերթին ներգրավելով նրանց, որոնց աշխատանքային պայմաները մարդու առողջությանը վտանգ են ներկայացնում են: «Իհարկե, պարտադիր բժշկական ապահովագրությունը որոշակ բեռ կդառնա գործատուների ուսերին, բայց մյուս կողմից, կբարձրացնի բնակչության սոցիալական պաշտպանվածությունը»,-գտնում է Ս.Գրիգորյանը:
Միևնույն ժամանակ, նա հավելել է, որ բյուջետային աշխատողներն այս տարվանից, պետական միջոցների հաշվին, պետք է անցնեն տարեկան պրոֆիլակտիկ բժշկական հետազոտություն, որպեսզի իրավունք ստանան մասնակցել 2016 թվականի սոցիալական փաթեթի ծրագրին:
Հիշեցնենք, որ 2014 թվականին պետծառայողների սոցիալական փաթեթի սպասարկումը փոխանցվեց առողջապահության նախարարությանը, բայց 2015-ին կրկին վերադարձվեց ապահովագրողներին: Սոցիալական փաթեթը, որը նախատեսված է պետծառայողների համար, Հայաստանում ներդրվել է 2012 թվականի հունվարին, որի բաղադրիչներից մեկն է հանդիսանում պարտադիր բժշկական ապահովագրությունը:
Ըստ ԱրմԻնֆո գործակալության` Հայաստանի ապահովագրական ընկերությունների Ռենկինգի, բժշկական ապահովագրության գծով վճարները 2014 թվականին հասել են 4.3 մլրդ դրամի, կազմելով Հայաստանի ապահովագրողների ընդհանուր պորտֆելի 14.4% -ը, տարեկան կտրվածքով նվազելով 60.8%: Միևնույն ժամանակ, հատուցումները կազմել են 4.5 մլրդ դրամ, մեկ տարում նվազելով 27.2%: Բժշկական ապահովագրության գծով գործող ապահովագրական պայմանագրերի թիվը 2014 թվականի վերջին կազմել է 8 261 պայմանագիր, նախորդ տարվա 113 129 պայմանագրի փոխարեն: