Հայաստանի գրեթե բոլոր բանկերը Կենտրոնական բանկին ներկայացված իրենց ռազմավարական զարագացման ծրագրերում մտադիր են մինչև 2017 թվականը համալրել ընդհանուր կապիտալները: Այս մասին մայիսի 26-ին կայացած մամուլի ասուլիսում հայտարարել է ՀՀ Կենտրոնական բանկի ֆինանսական կայունության և ֆինանսական համակարգի զարգացման վարչության ղեկավար Անդրանիկ Գրիգորյանը: Նրա խոսքով, որոշ բանկեր արդեն համալրել են կապիտալը, իսկ մյուսները պատրաստվում են դա անել առաջիկայում, ինչի մասին ժամանակին կտեղեկացնեն:
Ըստ ԱրմԻնֆո գործակալության` Հայաստանի բանկերի ֆինանսական վարկանիշի, տարեկան կտրվածքով կանոնադրական կապիտալը համալրել են Հայբիզնեսբանկը (2014 թվականի երկրորդ եռամսյակում` 30.9%), ԻՆԵԿՈԲԱՆԿԸ (2014-ի երկրորդ եռամսյակում`52.6%), Մելլաթ Բանկը (2014-ի երկրորդ եռամսյակում` 47.5%), Անելիք բանկը (2014-ի ի երրորդ եռամսյակում`7%, կապիտալիզացիա`բաժնետոմսերի թողարկման հաշվին), Կոնվերս բանկը (2014-ի երրորդ եռամսյակում`43.5%, բաժնետոմսերի թողարկման հաշվին) և Արդշինբանկը (2014-ի չորրորդ եռամսյակում` 26.6%, շահույթի հաշվին), միևնույն ժամանակ, 2015-ի առաջին եռամսյակում կապիտալիզացիա իրականացրեց Առէկսիմբանկ-Գազպրոմբանկի խումբը (57.4%) և Արցախբանկը (68.6%):
Հիշեցնենք, որ 2017 թվականի հունվարի 1-ից ուժի մեջ է մտնում ՀՀ Կենտրոնական բանկի նոր նորմատիվը, որի համաձայն, Հայաստանի բանկերի ընդհանուր կապիտալի նվազագույն չափը սահմանվում է 30 մլրդ.դրամ, ներկայիս 5 մլրդ.դրամի փոխարեն, 2014 թվականի դեկտեմբերի 14-ին համապատասխան փոփոխություններ կատարելով «Բանկերի գործունեության կարգավորումը, բանկային գործունեության հիմնական տնտեսական նորմատիվները» ՀՀ օրենքի կանոնակարգ 2-ում: Խստացումն ուղղված է բանկերի միաձուլմանն ու միավորմանը, ինչը կբերի այդ հատվածի մասնակիցների խոշորացմանը, ապահովելով կապիտալի մասշտաբի դրական արդյունք, նպաստելով ավելի որակյալ և մատչելի բանկային սպասարկմանը, միաժամանակ ձևավորելով առողջ մրցակցային միջավայր: Բացի այդ, կբարձրանա բանկային գործունեության արդյունավետությունը և կամրապնդվի կայունությունը: Արդյունքում, բարենպաստ միջավայր կձևավորվի նոր տեխնոլոգիաների ու պրոդուկտների ներդրման համար, ինչը կբարձրացնի հայկական բանկերի ներգրավվածությունը կապիտալի միջազգային շուկային` համագործակցության հետագա խորացման համար: Դրա հետ մեկտեղ կբարձրանա բանկային համակարգի ճկունությունը և զանազան տնտեսական իրավիճակների հետևանքով առաջացած ցնցումներին դիմակայելու ունակությունը, ինչպես նաև կխորանա ֆինանսական միջնորդությունը:
Ներկայումս Հայաստանում գործում է 21 բանկ: Բանկային համակարգի միագումար ընդհանուր կապիտալը 2014 թվականի վերջին կազմել է 1.029 մլրդ.դոլար: Բանկերի զուտ շահույթը 2014-ին նվազել է 35%, մինչև 57.2 մլն.դոլար: (ՀՀ դրամի միջին փոխարժեքը 2014 թվականի դեկտեմբերի 31-ին կազմել է 474.97 դրամ/դոլար):
