ՎՏԲ-Հայաստան Բանկն ու Visa ընկերությունը մեկնարկում են «Ամառը ՎՏԲ-ի հետ» ամենամյա ակցիան

ՎՏԲ-Հայաստան Բանկը և Visa ընկերությունն անցկացնում են անկանխիկ վճարումները խթանող «Ամառը ՎՏԲ-ի հետ» հերթական արշավը, որի մասնակիցները կարող են շահել մրցանակներ:

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, արշավին ավտոմատ կերպով մասնակցում են ՎՏԲ-Հայաստան Բանկի բոլոր Visa քարտապանները, ինչպես նաև այն հաճախորդներն, ովքեր այդ ակցիայի շրջանակում ձեռք կբերեն ՎՏԲ-Հայաստան Բանկի Visa քարտ: Դրա համար անհրաժեշտ է մինչև սեպտեմբերի 15-ն ընկած ժամանակահատվածում ՎՏԲ-Հայաստան Բանկի Visa քարտերով վճարել ցանկացած գումարի գնումների և ծառայությունների դիմաց երկրի տարածքում և արտասահմանում գտնվող ցանկացած առևտրի և սպասարկման կետերում` ներառյալ առցանց գնումները:

Խթանող արշավի արդյունքում ակցիայի մասնակից-ՎՏԲ-Հայաստան Բանկի բոլոր այն քարտապանների միջև, ովքեր 300.000 ՀՀ դրամ և այն գերազանցող գումարի անկանխիկ գնումներ են կատարել մինչև սեպտեմբերի 15-ն ընկած ժամանակահատվածում, հեռուստատեսությամբ ուղիղ հեռարձակմամբ կխաղարկվի 10 նվեր` 500.000 դրամ արժողությամբ:

«Մեր համագործակցությունը Visa ընկերության հետ տարեցտարի ամրապնդվում է, և մենք արդեն մեկնարկում ենք վեցերորդ համատեղ արշավը: Փորձը ցույց է տալիս, որ խթանող արշավները մեծ ժողովրդականություն են վայելում մեր հաճախորդների շրջանում, զուգահեռ աճում է  Visa քարտապանների թիվն ու անկանխիկ գործարքների ծավալը: Նշեմ, որ Հայաստանի բանկային շուկայում Visa քարտապանների քանակով մենք առաջին տեղում ենք և պահպանելու ենք մեր դիրքը»,-նշել է ՎՏԲ-Հայաստան Բանկի Գլխավոր տնօրեն-Տնօրինության նախագահ Յու. Գուսևը:

Ըստ ԱրմԻնֆո գործակալության` «Հայաստանի բանկերը քարտային բիզնեսում» վերլուծական տեղեկագրի, իր ակտիվ քարտերի թվով ՎՏԲ-Հայաստան Բանկը հանդիսանում է շուկայի առաջատարը, 2015 թվականի ապրիլի 1-ի դրությամբ ունենալով ավելի քան 401 հազ.ակտիվ քարտ, տարեկան աճը` 24%, որից գրեթե 385 հազարը Visa քարտեր են (այդ թվում `ավելի քան 88 հազար կենսաթոշակային քարտեր): Բանկը MasterCard-ի անդամ դարձավ մոտ 2 տարի առաջ, մինչեւ 2015-ի ապրիլը հասցնելով թողարկել ավելի քան 16 հազար քարտ, տեղ զբաղեցնելով առաջատարների տասնյակում: Պլաստիկ գործարքների ծավալով նույնպես բանկն առաջատարն է` ավելի քան 186 մլրդ դրամ, տարեկան աճը` 33%: 2015-ի ապրիլի 1-ին բանկն ունեցել է 298 սեփական POS- տերմինալ և 157 բանկոմատ: Մինչև 2013 թ., ՎՏԲ-Հայաստան Բանկը թողարկում և սպասարկում էր միայն միջազգային Visa քարտեր, իսկ նույն տարվա սեպտեմբերին դառնալով MasterCard միջազգային վճարային համակարգի, ձեռնամուխ եղավ Cirrus / Maestro, MasterCard Standard եւ MasterCard Gold քարտերի թողարկմանը և սպասարկմանը: Բացի այդ բանկը սպասարկում է նաև տեղական ArCa քարտերը: Բանկն ունի իր սեփական պրոցեսինգը:

Նշենք, որ «ՎՏԲ-Հայաստան Բանկ» ՓԲԸ ՎՏԲ միջազգային ֆինանսական խմբի մասնակից է դարձել 2004թ. ապրիլին: «ՎՏԲ Բանկ» ԲԲԸ հանդիսանում է «ՎՏԲ-Հայաստան Բանկ» ՓԲԸ 100% բաժնետոմսերի փաթեթի միանձնյա բաժնետերը: Բանկը հիմնական ցուցանիշների մի ամբողջ շարքով մշտապես ներառվում է ՀՀ բանկային համակարգի առաջատարների թվի մեջ: Ներկա դրությամբ բանկն ունի ամենալայն մասնաճյուղային ցանցը ողջ երկրում` 67 մասնաճյուղ: -կ-