Վերակառուցման և Զարգացման Եվրոպական Բանկի չորրորդ թողարկման պարտատոմսերը ցուցակվեցին ՆԱՍԴԱՔ ՕԷՄԷՔՍ Արմենիայում

Արմինֆո.2015թ. օգոստոսի 13-ին Վերակառուցման և Զարգացման Եվրոպական Բանկի (ՎԶԵԲ) ՀՀ դրամով արտահայտված 4-րդ թողարկման պարտատոմսերը ցուցակվել են ՆԱՍԴԱՔ ՕԷՄԷՔՍ Արմենիայում` ընգրկվելով հիմնական Abond ցուցակում: Այս մասին ԱրմԻնֆո գործակալությանը տեղեկացվել է բորսայի մամուլի ծառայությունից:

Աղբյուրի համաձայն, ՎԶԵԲ-ի 2 մլրդ ՀՀ դրամ ընդանուր ծավալով, 10,000 ՀՀ դրամ անվանական արժեքով, մեկ տարի շրջանառության ժամկետով, լողացող տոկոսադրույքով պարտատոմսերը շրջանառվելու են Բորսայում EBRDB4 հապավմամբ, ինչպես նաև թույլատրվելու են հասցեական և ՌԵՊՈ գործարքների կնքմանը: Պարտատոմսերին Հայաստանի կենտրոնական դեպոզիտարիայի կողմից շնորհվել է AMEBRDB14UK0 ծածկագիրը:

Հիշեցնենք, որ այս թողարկումը ՎԶԵԲ-ի՝ լողացող տոկոսադրույքով պարտատոմսերի արդեն երկրորդ թողարկումն է, որը ցուցակվել է Բորսայի պարտատոմսերի հիմնական Abond ցուցակում:

Հիշեցնենք, որ հուլիսի 29-ին ՎԶԵԲ 4-րդ թողարկման պարտատոմսերը հաջողությամբ տեղաբաշխվեցին ՆԱՍԴԱՔ ՕԷՄԷՔՍ Արմենիա բորսայում: Բանկի պարտատոմսերի կտրման գնով եկամտաբերությունը (սակարկություններում ձևավորված) կազմել է 12.0328%: ՎԶԵԲ պարտատոմսերով լողացող արժեկտրոնի մեծությունը որոշվում է որպես ՀՀ Կենտրոնական բանկի կողմից հրապարակվող 6-ամսյա պետական պարտատոմսերի եկամտաբերության և 0.25% մարժայի գումար, որը նախատեսված է հետագա արժեկտրոնների վճարումների համար: Այդ թողարկման անդերրայթերն է Ամերիաբանկը, իսկ տեղաբաշխման ընթացքում որպես գնորդ են հանդես եկել բորսային 4 անդամներ: Ներկայումս բորսայում շրջանառվում են ՎԶԵԲ 2-րդ և 3-րդ թողարկման (EBRDB2 ևEBRDB3) դրամային պարտատոմսերը, յուրաքանչյուրը` 2 մլրդ.դրամ ծավալով: Երկրորդ թողարկման պարտատոմսերը բորսայում տեղաբաշխվեցին 2015 թվականի հունվարի 30-ին, իսկ 3-րդ թողարկմանը` փետրվարի 11-ին: Երկրորդ թողարկման արժեկտրոնների եկամտաբերությունը կազմում է 17%, իսկ 3-րդ թողարկմանը` 14.5%: Շրջանառության մեջ է դրվել 200 հազար պարտատոմս, յուրաքանչյուրը 10 հազար դրամ անվանական արժեքով: Դրանց շրջանառության ժամեկտը կազմում է 6 ամիս, այսինքն, 2-րդ թողարկումը կմարվի այս տարվա հուլիսի 30-ին, իսկ 3-րդ թողարկումը` օգոստոսի 11-ին: ՎԶԵԲ պարտատոնսերը շրջանառվում են Abind ցուցակում: ՎԶԵԲ առաջին թողարկման պարտատոսերի մարման ժամկետը լրացել է այս տարվա փետրվարի 2-ին, որոնց թողարկման ծավալը նույնպես կազմում էր 2 մլրդ.դրամ, իսկ եկամտաբերությունը` լողացող:

Նշենք, որ ՎԶԵԲ-ի ՀՀ դրամով արտահայտված պարտատոմսերի առաջին թողարկումը կայացավ Հայաստանում դրամային բոնդերի առաջին տրանշը թողարկելու մասին (2013-ի դեկտեմբերին) Միջազգային ֆինանսական կորպորացիայի (IFC) որոշումից անմիջապես հետո:  IFC պարտատոմսերի առաջին տրանշի ծավալը կազմեց 2 մլրդ.դրամ, մարման ժամկետը` 3 տարի, իսկ եկամտաբերությունը`9.7%, կես տարին մեկ անգամ արժեկտրոնային վճարումներով: Դա եղավ Հայաստանում դրամով արտահայտված կորպորատիվ պարտատոմսերի առաջին հրապարակային թողարկումը միջազգային կառույցների կողմից, ինչն արվեց բորսայական տեղաբաշխումների նոր տեխնոլոգիաներից օգտվողների շրջանն ընդլայնելու, ինչպես նաև կապիտալի շուկայում ներդրումային հնարավորությունների ընդլայնման անհրաժեշտ հարթակ ստեղծելու նպատակով: 

Նշենք, որ «ՆԱՍԴԱՔ ՕԷՄԷՔՍ Արմենիա» ԲԲԸ-ն Հայաստանում գործող միակ ֆոնդային բորսան է: 26.01.2009թ.-ից «Հայաստանի ֆոնդային բորսա» ԲԲԸ-ն պաշտոնապես վերանվանվել է «ՆԱՍԴԱՔ ՕԷՄԷՔՍ Արմենիա» ԲԲԸ-ի: 05.06.2009թ.-ից ՆԱՍԴԱՔ ՕԷՄԷՔՍ Արմենիա-ն «Հայաստանի Կենտրոնական Դեպոզիտարիա» ԲԲԸ-ի միակ բաժնետերն է: 2008 թվականի հունվարի 7-ից ՕԷՄԷՔՍ ընկերությունը (ներկայումս` ՆԱՍԴԱՔ ՕԷՄԷՔՍ) հանդիսանում է «ՆԱՍԴԱՔ ՕԷՄԷՔՍ Արմենիա» ԲԲԸ 100% սեփականատերը: