Իր 150-ամյա հոբելյանի կապակցությամբ HSBC Բանկ Հայաստանը 150 մլն.դոլար կուղղի համայնքային ծրագրերի և բարեգործական կազմակերպությունների աջակցությանը

Արմինֆո. Իր ողջ պատմության ընթացքում Էյչ-Էս-Բի-Սի-ն մշտապես հիմնվել  է  հաճախորդների, բաժնետերերի և աշխատակիցների աջակցության վրա:  150-ամյակի առթիվ բանկը ցանկանում է իր շնորհակալությունը հայտնել՝ 150 միլիոն դոլարի հավելյալ ֆոնդ հատկացնելով համայնքային ծրագրերի և բարեգործական կազմակերպությունների աջակցությանը 2015-2017թթ-ին:  

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, 2014թ-ին HSBC ավելի քան 50,000 աշխատակից քվեարկել է՝ ընտրելու բարեգործության  ոլորտները: Արդյունքում հաղթել է երեք ուղղություն. երիտասարդները և նրանց կրթությունը, բժշկական ապահովությունը և ուսումնասիրությունները,  շրջակա միջավայրը և վայրի բնության պահպանումը: Հանգամանորեն ընտրվել են նաև 140 բարեգործական կազմակերպությունները ողջ աշխարհում, որոնց կտրամադրվեն այդ ֆոնդի միջոցները: Արդյունքում, կազմակերպություներից յուրաքանչյուրն իր ոլորտում կկարողանա դրական և շարունակական փոփոխություններ ներմուծել: Կազմակերպությունների ընտրությունը հիմնված է HSBC-ի աշխատակիցների քվեարկության արդյունքների վրա:

Հայաստանում HSBC-ն տարեկան մոտ 50 միլիոն դրամ է ներդնում բարեգործական ծրագրերում՝ աջակցելով կրթական և շրջակա միջավայրի պահպանման ոլորտներին: Մեր ներդրումները նպատակ ունեն նորարար և որակյալ կրթությունը հասանելի դարձնել երեխաների խոցելի խմբերի համար: Համագործակցելով Թումո Ստեղծարար տեխնոլոգիաների կենտրոնի, «Մեղվիկ» ՀԿ-ի, Վայրի բնության և մշակութային արժեքների պահպանման (FPWC) և Կովկասի բնության (CNF) հիմնադրամների,  Հայաստանի Երիտասարդական նվաճումներ (JAA) ՀԿ-ի և այլոց հետ 2014թ-ի ընթացքում HSBC-ն մոտ 40 միլիոն դրամի չափով ներդրում է կատարել Հայաստանում իրագործվող 26 կրթական ծրագրերում:

HSBC-ն ներդրումներ է իրականացնում նաև շրջակա միջավայրի պահպանման այնպիսի ծրագրերում, որոնք ուղղված են կլիմայական փոփոխությունների և բնական ռեսուրսների սպառման  մարտահրավերների հաղթահարմանը: 2014թ-ին Էյչ-Էս-Բի-Սի Հայաստանը 7 միլիոն դրամ է հատկացրել բնական ռեսուրսների արդյունավետ կառավարման ծրագրերին, որոնք  հիմնականում ուղղված են ջրային ռեսուրսների պահպանմանն ու կլիմայական փոփոխությունների խնդիրների հաղթահարմանը: Համագործակցելով հասարակական կազմակերպությունների հետ՝ բանկն  օժանդակում է նաև  վտանգված տեսակների պահպանման, կենսաբազմազանության ապահովման և էկոտուրիզմի զարգացման նախաձեռնություններին: 

«Մենք ուրախ ենք տոնել մեր 150-ամյակը՝ ներկայացնելով այս 150 միլիոն դոլար արժողությամբ հավելյալ բարեգործական ֆոնդը: Որպես բիզնես` մենք համոզված ենք, որ կրթությունը, բժշկական ապահովությունը և խմելու մաքուր ջուրը կենսական նշանակություն ունեն համայնքների համար, որոնք  էլ իրենց հերթին հանդիսանում են բարգավաճ տնտեսության և բիզնես միջավայրի գրավականը»,-ասել է HSBC Խմբի նախագահ Դուգլաս Ֆլինթը:

Ըստ աղբյուրի 150 միլիոն դոլարի ֆոնդը կգումարվի Էյչ-Էս-Բի-Սի-ի կողմից համայնքներին  տրամադրվող տարեկան 114 միլիոն դոլարին՝ որն ամբողջ աշխարհում բանկը ներդնում է տարբեր համայնքային ծրագրերում:  

Նշենք, որ HSBC Holdings plc-ն՝ HSBC Խմբի ծնող ընկերության գլխամասը, գտնվում է Լոնդոնում: Խումբն իր հաճախորդներին ծառայություններ է տրամադրում իր ավելի քան 6,100 գրասենյակներից, որոնք գտնվում են 72 երկրներում և տարածաշրջաններում՝ Ասիայում, Եվրոպայում, Հյուսիսային և Լատինական Ամերիկայում, ինչպես նաև Մերձավոր Արևելքում և Հյուսիսային Աֆրիկայում: Էյչ-Էս-Բի-Սի-ն հանդիսանում է աշխարհի ամենախոշոր և հզոր ֆինանսական կառույցներից մեկը, ում ակտիվները 2015թ. հունիսի 30-ի դրությամբ կազմել են 2,572 միլիարդ ԱՄՆ դոլար:

HSBC Բանկ Հայաստանը հիմնադրվել է 1996 թ-ին՝ որպես փակ բաժնետիրական ընկերություն «Midland Armenia Bank» ԲԸ անվանումով: 1999 թ-ին վերանվանվել է «Էյչ-Էս-Բի-Սի Բանկ Հայաստան» ՓԲԸ-ի: Բանկը համատեղ ձեռնարկություն է, որի 70%-ը պատկանում է HSBC Խմբին, իսկ 30%-ը` արտերկրի հայ գործարարներին: Էյչ-Էս-Բի-Սի Հայաստանը սպասարկում է շուրջ 36,000 հաճախորդի Երևան քաղաքում գտնվող իր 10 գրասենյակների և մոտ 383 աշխատակիցների միջոցով: 2015 թ-ի հունիսի 30-ի դրությամբ բանկի ակտիվները կազմել են 274,887,065,000 ՀՀ դրամ: Բանկը հանդիսանում է Հայաստանի արտարժույթի շուկայի առաջատարներից մեկը: