Բորսայում և արտարժույթի միջբանկային շուկայում բանկերի ակտիվությունը զսպել է դրամի արժեզրկումը

Ինչպես ԱրմԻնֆո-ին հաղորդեցին ԿԲ հասարակայնության հետ կապերի ծառայությունից, հոկտեմբերի 26-30-ը ՆԱՍԴԱՔ ՕԷՄԵՔՍ ԱՐՄԵՆԻԱ բորսայի  հարթակում գնվել եւ վաճառվել է 5,550,000 ԱՄՆ դոլար` 472.96 դրամ մեկ ԱՄՆ դոլարի դիմաց միջին փոխարժեքով: Ընդ որում բանկերը բորսայում ակտիվ են եղել` բացի երկուշաբթի և չորեքշաբթի օրերից: Իսկ արտարժույթի միջբանկային շուկայում իրականացվել է 4,300,000 ԱՄՆ դոլարի առք եւ վաճառք` 473.10 դրամ մեկ ԱՄՆ դոլարի դիմաց միջին փոխարժեքով: Դատելով ըստ խոշոր բորսայական ծավակներից մեկի` (հինգշաբթի` 5 մլն դոլար), ըստ երևույթին, այս անգամ նույնպես եղել է Կենտրոնական բանկի միջամտություն: Նշենք, նոր ԿԲ նախորդ միջամտություններն իրականացվել են հոկտեմբերի 2-ին` ենթադրաբար 6 մլն դոլար, սեպտեմբերի 19-ին` 22,2 մլն դոլար և օգոստոսի 28-ին` 95 մլն դոլար:

 

Աղբյուրի համաձայն, հոկտեմբերի 26-30-ը Արտարժույթի ներբանկային շուկայում բանկերի կողմից գնվել է 82,098,043 դոլար (մեկ շաբաթում 17% աճ) 471.06 դրամ ԱՄՆ մեկ դոլարի դիմաց միջին փոխարժեքով, եւ վաճառվել 68,878,593 ԱՄՆ դոլար 472.85 դրամ ԱՄՆ մեկ դոլարի դիմաց միջին փոխարժեքով: Նույն ժամանակահատվածում ներբանկային շուկայում բանկերի կողմից գնվել է 5,343,442 EUR (մեկ շաբաքում 32% անկում) 518.11 դրամ մեկ եվրոյի դիմաց միջին փոխարժեքով, եւ վաճառվել 20,796,969 EUR (մեկ շաբաթում 45% աճ) 521.45  դրամ մեկ եվրոյի դիմաց միջին փոխարժեքով: Ներբանկային շուկայում բանկերի կողմից գնվել է նաև 755,507,138 ռուբլի (մեկ շաբաթում 17% անկում)  7,37 դրամ մեկ ռուբլու դիմաց միջին փոխարժեքով, եւ վաճառվել 325,479,142 ՌԴ ռուբլի (մեկ շաբաթում 16,7% աճ) 7,47 դրամ մեկ ռուբլու դիմաց միջին փոխարժեքով: 

 

Հոկտեմբերի 19-25-ն ընկած ժամանակահատվածում բանկերի կողմից դրամով տեղաբաշխված միջոցների ծավալը կազմել է 47.7 մլրդ դրամ, իսկ ԱՄՆ դոլարով տեղաբաշխված միջոցների ծավալը՝ 37.3 մլն ԱՄՆ դոլար:  Նախորդ շաբաթվա (հոկտեմբերի 12-18) համեմատ դրամով տրամադրված վարկերի ծավալն ավելացել է 20,5 %-ով, իսկ դոլարով տրամադրված վարկերի ծավալը կրճատվել է 46%-ով:

 

Հիշեցնենք, որ 2014 թվականի վերջին ամիսներին Հայաստանի արտարժույթի շուկայում դիտվում էր արտարժույթի փոխարժեքի կտրուկ աճ, հատելով 570 դրամ մեկ դոլարի դիմաց սահմանագիծը: Արտարժույթի մանրածախ շուկայում դրամը դոլարի նկատմամբ հոկտեմբերից մինչև դեկտեմբերի 17-ի ներառյալ սկսեց արժեզրկվել, գրեթե 45%-ով, իսկ 2014 թվականի, ընդհանրապես, 40%-ով (հաշվի առնելով դեկտեմբերի 17-ի` 570 դրամ/դոլար առավելագույն շեմը և հուլիսի` 406 դրամ/դոլար նվազագույն շեմտ): Արտարժույթի բորսայական հարթակում 2014 թվականին իրականացված արտարժույթով գործարքների ընդհանուր ծավալը կազմել է 744.5 մլն.դոլար, ընդ որում, ամսական կտրվածքով ծավալներով աչքի է ընկել նոյեմբերը (117 մլն.դոլար): Տարվա ընթացքում բորսայական փոխարժեքը 407.14-ից թռավ մինչև 560 դրամ/դոլար ցուցանիշ (դեկտեմբերի 17-ին, աճելով 22% -ով): 2015 թվականի 9 ամիսներին արտարժույթի մանրածախ շուկայում դրամը դոլարի նկատմամբ ամրապնդվեց` 477 մինչև 473 դրամ/դոլար փոխարժեք, եվրոյի նկատմամբ` 571,5-ից մինչև 532 դրամ / եվրո, իսկ ռուսական ռուբլու նկատմամբ` 8.2-ից մինչև 7.2 դրամ/ռուբլի փոխարժեք: Հոկտեմբերի ընթացքում դրամը «լողացել էե` մերթ արժեվորվելով, մերթ արժեզրկվելով, հոկտեմբերի 30-ին դոլարի նկատմամբ դրամի միջին փոխարժեքը ձևավորվել է 473 դրամ /1դոլարի, եվրոյի նկատմամբ` 520 դրամ /1 եվրոյի, իսկ ռուսական ռուբլու նկատմամբ` 7,5 դրամ/1ռուբլու մակարդակներում: