«Armenia» նորաստեղծ ավիաընկերություն. Գորշ ձիուկը և հայկական ավիացիայի ապագան

Արմինֆո. «Նոր ստեղծվող «Armenia» ավիաընկերությունը վստահություն չի ներշնչում»,-մարտի 12-ին լրագրողների հետ հանդիպման ընթացքում նման հայտարարությամբ է հանդես եկել Հայաստանի Քաղաքացիական ավիացիայի գլխավոր վարչության նախկին ղեկավար Շահեն Պետրոսյանը, մեկնաբանելով օդային ուղևորափոխադրումների հայկական շուկա դուրս եկող նոր ավիաընկերության շուրջ ստեղծված աժիոտաժը:

Նրա խոսքով, այդ ընկերության ֆինանսական վիճակի մասին տեղեկությունների չհրապարակման պայմաններում անհնար է խոսել այդ ընկերության լուրջ լինելու մասին: «Խոսակցություններից ու խոստումներից բացի ընկերության ներկայացուցիչները որևէ այլ բան չեն հնչեցչել: Թե ով է իրականում կանգնած դրա ետևում, և ինչ նպատակներ է հետապնդում – անհայտ է»,-հայտարարել է նա: Միևնույն ժամանակ, փորձագետը չի բացառել, որ ընկերությունը դուրս կգա հայկական ավիաշուկա, մի քանի ամիս կաշխատի, որից հետո կհայտարարի իր սնանկության մասին:

Հիշեցնենք, որ «Armenia» նորաստեղծ ավիաընկերության ղեկավարները հայտարարել էին, որ հաջորդ ամսից պատրաստվում են իրականացնել առաջին չվերթները Երևանից: Ըստ ընկերության բաժնետեր Ռոբերտ Հովհաննիսյանի, ավիաընկերությունն արդեն գրանցվել է, ստացել է շահագործման հավաստագիրը և անցնում է կանոնավոր առևտրային չվերթների իրականացման թույլտվության ստացման եզրափակիչ փուլը:

Նշենք, որ, ըստ Հայաստանի քաղաքացիական ավիացիայի գլխավոր վարչության տեղեկությունների, «Armenia» ավիաընկերության հիմնադիրներն են՝ Աշոտ Թորոսյանը (51%), Ռոբերտ Հովհաննիսյանը (25%) և Թամազ Գաիաշվիլին (24%): Թամազ Գաիաշվիլին հանդիսանում է նաև վրացական «Airzena» ավիաընկերության հիմնադիրը և այդ ընկերության տնօրենների խորհրդի նախկին նախագահը, իսկ Ռոբերտ Հովհաննիսյանը նրա նախկին տեղակալն է: «Airzena» ավիաընկերությունը հիմնադրվել է 1993 թվականին, իսկ 1999ի սեպտեմբերին դարձել Վրաստանի ազգային ավիափոխադրողը: 2004-ի օգոստոսին «Airzena»-ն վերանվանվեց՝ «Georgian Airways»-ի, չնայած նախկին բրենդը շարունակվում է պահպանվել: «Georgian Airways»-ի գլխավոր տնօրենն է Գիվի Դավիթաշվիլին: Ըստ «Կոմերսանտ» թերթի, վերջերս վրացական ավիափոխադրողը խնդիրներ է ունեցել վրացական շուկայում՝ ուղևորափոխադրումների կրճատման պատճառով: Airzena-ի պրոբլեմներն առաջին հերթին կապված շուկայում ռուսական ավիաընկերությունների դիրքերի ամրապնդման հետ, ասվում է հոդվածում: Այդ պատճառով էլ ընկերության նախկին ղեկավար Յասե Զաութաշվիլին չի բացառել, որ ընկերությունը կարող է լքել վրացական շուկան: Ռուսական «Աէրոֆլոտ»-ը վրացական շուկա մտավ 2014 թվականին: Զաութաշվիլին վերջինիս մեղադրեց դեմպինգի մեջ և հայտարարեց սպառնալիքի մասին, որ ռուսական ընկերությունները կարող են լիովին զբաղեցնել վրացական շուկան: Մեկնաբանելով ստեղծված իրավիճակը, «Airzena»-ի նախկին գլխավոր տնօրեն Յասե Զաութաշվիլին հայտարարել է, որ քանի որ ներկայումս Հայաստանում չկա ազգային ավիափոխադրող, ապա նոր ավիաընկերությունն, ամենայն հավանականությամբ, կարող է զբաղեցնել այդ նիշան:

Նոր ավիաընկերության գլխավոր ուղղությունը Զաութաշվիլլին համարում է Ռուսաստանը և Եվրոպան: Նա նշել է, որ Airzena-ն կրճատել է գործունեության մասշտաբները և կադրերին ուղարկել արձակուրդ: Ընկերության հիմնադիրները որոշել են ակտիվանալ այլ ուղղությամբ: Դրա պատճառը նա համարում է թուրքական, ուկրաինական, ռուսական և այլ ացվիաընկերությունների ամրապնդումը շուկայում: Դրա հետ մեկտեղ, մամուլում տեղեկություն է հայտնվել, որ «Georgian Air Services»-ի մենեջմենտը, որը հանդիսանում է Airzena-ի «շարժիչ ուժը», աշխատակիցներին ստիպում է գրել աշխատանքից ազատվելու դիմումներ: Ինչպես «ПирWели» գործակալությանը հայտնել է ավիաընկերության աշխատակիցներից մեկը, այսօր տեղի է ունեցել արտակարգ ժողով, որին մասնակցել է նաև ավիաընկերության նախկին գլխավոր տնօրեն և «Georgian Air Services»-ի փաստացի ղեկավար Թամազ Գաիաշվիլին: «Կանչեցին բոլոր աշխատակիցներին, և Գաիաշվիլին անձամբ մեզ հայտարարեց, որ մենք պետք է գրենք աշխատանքից ազատման դիմումներ ու հեռանանք: Պատճառները ճշգրտել չցանկացան, ինչպես նաև այն, թե քանի աշխատակից են պատրաստվում հեռացնել»,-հայտարարել է այդ աշխատակիցը, հավելելով, որ կադրային կրճատումները, հավանաբար, կապված են ֆինանսական պրոբլեմների հետ, որոնք առաջացան մի քանի միջազգային չվերթների փակման պատճառով: Իսկ ավիաընկերության հասարակայնության հետ կապերի ղեկավար Նինո Գիորգոբանին կտրականապես հերքել է ժողովի անցկացման մասին տեղեկությունները: Գործակալությունը հիշեցրել է, որ «Արմավիա»ի սեփականատեր Միխայիլ Բաղդասարովին առաջարկվել էր գնել Airzena-ն, իսկ վերջինս հայտարարել էր, որ «այդ առաջարկը կարելի է դիտարկել, քանի որ ընկերությունը բավականին արդյունավետ է»:

Սակայն, ինչպես հայտնի է դարձել հայկական ԶԼՄ-ներին, «Արմենիա» ավիաընկերության բաժնետոսմերի 51% փաթեթը միայն ձևականորեն է պատկանում գյումրեցի ատամնատեխնիկ Աշոտ Թորոսյանին: Բայց վերջինս պնդում է, որ ոչ մի օլիգարխ կամ պետպաշտոնյա, ինչպես նաև վարչապետի որդին, չեն օգտագործում իր անունը, և հենց ինքն է հանդիսնում իրական սեփականատերը: Սակայն, ինչպես գրում են ԶԼՄ-ները, նրան ճանաչողները, ինչպես նաև Գյումրիում նրա հետ աշխատողները, հոռետեսորեն են վերաբերվում նրա խոսքերին: Ըստ գյումրեցիների, Աշոտ Թորոսյանն ատամնատեխնիկ է, ապրում է բավական համեստ միջոցներով, իսկ երբեմն էլ պարտքերի մեջ է լինում: Իսկ Աշոտ Թորոսյանի շրջապատի անձինք նշում են, որ նա ունի հարուստ ազգականներ Վրաստանում: Սակայն, ինչպես ԱրմԻնֆո-ի թղթակցին հայտարարել է «Արմենիա» ավիաընկերության մամուլի քարտուղար Գևորգ Խաչատրյանը, «ընկերության բաժնետերերի անձնական կյանքի վերաբերյալ տեղեկատվությունը հրապարակման ենթակա չէ», չցանկանալով մեկնաբանել մի շատ սովորական հարց՝ թե արդյոք նույն անձն են հանդիսանում ընկերության հիմնական բաժնետերը և գյումրեցի ատամնատեխնիկը: Նա խորհուրդ է տվել մեկ շաբաթ սպասել, որից հետո, «ընկերության առաջին անձանց մակարդակով կներկայացվի ԶԼՄ-ներին և հանրությանը հետաքրքրող ողջ տեղեկատվությունը, ինչպես ընկերության սեփականատերերի, այնպես էլ մտադրությունների մասին»: